دوو شاعیری گەورە و نامیلکەیەکی بچوک

نووسین و ئامادەکردنی؛ عومەر مەعروف بەرزنجی

کامەران موکری (1929 - 1986)

هەژار موکریانی (1920 -1991)

یادکردنەوەو رێزگرتنی جەژن و رۆژە مێژووییەکانی نەتەوەی کورد، لە مێژە رێچکەی خۆی دۆزیوەتەوەو هەنگاوی بەردەوامی ناوە، ساڵ لەدوای ساڵ یادکردنەوەیان رازاوەتر و باڵایر دەبن، هەندێ ساڵیش بووەتە پڕۆژەیەکی سەنگینی ئەدەب و روناکبیری سەردەم.

ساڵی 1954 لە گەرمەی خەبات و هەژانی سەرجەم گەلانی عێراق و، بەرزبوونەوەی بڵێسەی تێکۆشان و گەشەسەندنی بیر و رای کوردایەتی و، نرخی بزوتنەوەی ئاشتیخوازان و هەوڵدان بۆ سەرخستن و بنەبرکردنی تۆوی هەڵایسانی شەڕ و نەمانی مۆتەکەی کوشتن و بڕین و بەدەستهێنانی ئازادییەکی سەرتاپاگێری و دەستگرتن بە داوێنی مافی نەتەوایەتییەوە. لەوساڵەدا کە نوێنەرانی بەرەی نیشتمانی مامۆستایان (برایم ئەحمەد) و (شێخ مارفی بەرزنجی) سەرقاڵی پرۆسیسی هەڵبژاردن بوون، ئاهەنگێکی بەدیمەنی یادکردنەوە بە بۆنەی یادکردنەوەی جەژنی نەورۆزی کوردەوە لە شاری سلێمانی سازکرا، هەردوو شاعیری گەورە (عەبدولڕەحمان شەرەفکەندی ناسراو بە هەژاری موکریانی 1920 - 20-02-1991) و (حەمەی ئەحمەی تەها ناسراو بە کامەران موکری 1929 - 08-12-1986) بەشداری شیعر خوێندنەوەیان کرد.

شیعرەکەی کامەران بەناوی (ئاشتی) یەوە بوو، هەژاریش ناونیشانی (نەشمیل) ی بۆ شیعرەکەی دانابوو، کە ساڵێ پێشتر هەمان شیعری بۆ کۆنگرەی دووەمی گەنجان و قوتابیان ناردبوو کە لە (بوخارست) بەسترابوو. هەردوو شیعرەکە بریتیبوون لە دوو تابلۆی رازاوەی نیشتمانی و ئاودراو بە بیری کوردایەتی و سەرتاپا دیمەنت جوان و وێنەی شیعری، سەرەرای ئەمانەیش خواستی کوردان و کسپەی جەرگ سوتاوان و رەواو پیرۆزی ئاشتی رەنگیان دابووەوە.

لەو ساڵەدا گەنجان و قوتابیانی کوردستان لەتەک رێکخراو و بەشەکانی تری گەلدا لە جۆشی خەبات و تێکۆشانێکی سەر و مڕدا بوون و ئەم بۆنە پیرۆزەیان قۆستەوە، یەکسەر هەردوو شیعرەکەیان بەناوی (ئاشتی) و بە پێشەکییەکی پۆشتەو لە نامیلکەیەکی (22) لاپەرەییدا و لەسەر ئەرکی قوتابیانی کورد لە کۆلیجی (حقوق) و لە چاپخانەی (رابیتە) ی بەغدا بە چاپگەیاندووە. لەسەر بەرگی یەکەمی لە پاڵ ناوی (ئاشتی) دا نووسراوە (لە پێناو ئاشتی و دیموکراسی و سەربەخۆیی) و لە خواریشەوو نووسراوە کە (لە ژێر چاودێری جەلال تالەبانی دەرچووە). لە بەرگی دووایشدا مژدەی ئەوە دراوە کە بەرهەمی چاپکراوی داهاتویان (دیوانی بێکەس) دەبێ.

دوای بڵاوکردنەوەی نامیلکەکە هەردوو شاعیر و ئەوانەی دەستیان لە چاپکردن و چاودێری و هەڵسوراندنیدا بووە فرمانی دەستگیرکردنیان بۆ دەرچووە.

نامیلکەی (ئاشتی) چاپکراوێکی دانسقەو بەڵگەیەکی مێژوویی و ئەدەبی زیندووە، نموونەیەکە بۆ چالاکی خەباتی ئەوسای رێکخراوەکان، ئەوەیش پێویستە بوترێ کە ئەم چاپکراوە تابڵێی دەگمەنەو ئەو ژمارانەی کە لە وڵاتدا پارێزراون ناگەنە پەنجەکانی تاقە یەک دەست.