سەرچاوەی ئەحمەد زرنگ- نەوەی پیرەمێرد ببینە

حاجی تۆفیق بەگی مەحمووداغای هەمزاغای مەسرەف '''[[پیرەمێرد]]'''، لە "غەزالە"خانمی عەبدوڵڵا ئەفەندیی عەزیزاغای هەووەڵ هاوسەری، کوڕێکی "مەهدی" ناو و دوو کچی "ئامینە" و "ڕەحمە" ناوانی خستووەتەوە. رەحمەخانم، لە "مستەفا ئەفەندیی ئەحمەد ئەفەندی" کە 26ی مارتی 1942 کۆچی دواییی کردووە؛ (فایەق هۆشیار، ئەحمەد زرنگ، فاتمەو پەروین)ی هەبوون.
[[پەڕگە:448204238 .jpg|وێنۆک]]

ئەحمەد، کە "پیرەمێرد" خۆی ناسناوی "زرنگ"ی بۆ هەڵبژاردووە، ئێوارەی شەممەی رێکەوتی 14ی حوزەیرانی 1930 لە سلێمانی لەدایک بووە. قوتابخانەی سەرەتاییی (فەیسەڵییە)ی لە سلێمانی، سێی ناوەندیو سانەویی- ساڵی 1949- لە کەرکووک و کۆلێجی حقووقی – ساڵی 1954- لە بەغدا تەواو کردووە.

هەر لە ساڵی 1950 بەدواوە بووەتە هاوکارێکی رۆژنانەی "ژین" بووە؛ لە بەغداوە، بە یارمەتیی بەهەشتی عەلادین سەجادی مەرەکەب و کاغەزو پیتی بۆ چاپخانەکەی دابین کردووە. ئەو ماوەیە ناوبەناو کاروباری ئیدارەخانە یا نووسینی "ژین"ی راپەڕاندووە، تا لە ژمارە 1214ی رۆژی 9ی ئەیلوولی 1954ەوە ئیدی بووەتە بەڕێوەبەری ئیدارەخانەو نووسینو "نووری ئەمین مەحموود"یش بەڕێوەبەری بەرپرسی بووە. ئەگەرچی ئەو ساڵە کە زانکۆی بڕیوە، هەلێکی مسۆگەری خوێندنی بەرزی لە فەرەنسە بۆ رەخساوە، بەڵام لەبەر بێخاوەنیی رۆژنامەکەو گیرانی مامۆستا گۆران"ی سەرنووسەری، نەچوە. لەو ساڵەیشەوە، بەدەم رۆژنامەوانییەوە، پارێزەریی کردووە تا 1964.

رۆژی 18ی کانوونی یەکەمی 1957 بە ئەندامی مەجلیسی بەلەدییەی '''[[سلێمانی]]''' هەڵبژێردراوە. پاش 14ی تەمووزی 1958 چووەتە بەغداو خانوەکەیی بە بارمتە (رهن) داناوەو دوو پارچە زەویی فرۆشتووە، پارەی پاشەکەوتکراوی دیکەیشی هەبوە، دوو مەکینەی نوێی چاپی پێ کڕیون؛ یەکەمیان قەوارە بەتاڵ بۆ دەرکردنی رۆژنامەی قەوارە گەورە، دووەمیان بچووک بۆ چاپی کتێب. تا وای لێ هاتووە رۆژنامەکەی – لەبریی هەفتەی جارێک- هەفتەی دووجار دەر کردووە.
ئەو ماوەیە کە "ئەحمەد زرنگ" سەرۆکی نووسینو ئیدارەخانەی "ژین" بووە، چەند جارێک رووبەڕووی لێپرسینەوەو تەنگ پێهەڵچنینی حکوومەت بووەتەوە، تا رۆژنامەکە لەدوای دەرچوونی ژمارە (1714)ەوە رۆژی 7ی شوباتی 1963، وەک هەموو رۆژنامەیەکی دیکەی عیراق، بە هاتنە سەر کاری عەبدوسسەلام عارفو بەعسیەکان، بەتەواوی راگیراوە.

9ی حوزەیرانی 1963 یەکێک بووە لە گیراوەکانی '''[[سلێمانی]]'''. پاش بەربوونی، هەوڵی تازەکردنەوەی مۆڵەتی رۆژنامەکەی داوە، بەڵام رێی پێ نەدراوەتەوە. ئەمجا رووی کردووەتە وەزیفەو ساڵی 1964 بە دادوەری دادگای '''[[هەڵەبجە]]''' دامەزرێنراوە، پاشان براوەتە شارەکانی (دیوانییە) و ('''[[کەرکووک]]'''). 1972 بووە بە ئەندامی دەستەی تەمییزی چاککردنی کشتوکاڵ،1990یش بووە بە سەرۆکی هەمان دەستە. 1993 خانەنشین کراوە، بەڵام 1996 خراوەتەوە سەرهەمان وەزیفەی پێشوو. کە ئەو ساڵانەی دوایی بە ماڵەوە هاتەوە بۆ کوردستان، کرایە سەرۆکی ئەنجومەنی راژە.

ئەم دوایییە، پاش ئەوەی –بەداخەوە- جەڵتەی مێشک لێی داو چەند حەفتەیەک خستی، رۆژی 27ی شوباتی 2011 (یەکشەممە) کۆچی دوایی کردو تەرمەکەی لە گردی (مامەیارە) بەخاک سپێردرا.مامۆستا ئەحمەد زرنگ مستەفا کەسایەتیی ناسراو و یاساناس و رۆژنامەنووس نیوەڕۆی ٢٧/٢/٢٠١١، لەشاری سلێمانی کۆچی دواییکرد، بەڕێوڕەسمێکی شایستە لەگردی مامەیارە لەتەنیشت باپیرەیەوە (پیرەمێرد)ی نەمر بەخاکسپێردرا.

خوالێخۆشبوو لەناوەڕاستی پەنجاکانی سەدەی رابردووەوە تا کودەتای بەعس لە١٩٦٣ سەرنووسەری رۆژنامەی ژین بوو کە لەسلێمانی دەردەچوو، لەژیانی وەزیفەدا ساڵانێک دادوەر بوو لەدیوانیەو لەوەو دواش دادوەری چاکسازیی کشتوکاڵ بوو لەبەغدا، لەحکومەتی ھەرێمی کوردستانیشدا سەرۆکی ئەنجومەنی راژە بوو تا خانەنیشن کرا.

پرسەو سەرەخۆشیمان بۆ بنەماڵەو کەسوکارو خێزان و خزمانیان، لەیەزدان دەخوازین جێی بەھەشتی بەرین بێت و خواسەبووری ھەموولایەک بدات.

سەرچاوەی: '''[[بنکەی ژین]]'''

'''[[داناز عەبدولرەحمان]]'''



[[پۆل:کەسایەتی]]