ئاماری روداوەکانی شاری سلێمانی لە ساڵی 2022دا

بەڕێوەبەرایەتی پۆلیسی سلێمانی بڵاویکردەوە، لە ساڵی 2022دا هێزەکانیان زیاتر لە 21 هەزار کەسیان بە تۆمەتی جۆراوجۆر دەستگیرکردوە و لەم کاتەشدا 10 هەزار و 637 کەسیان بە فەرمانی دادوەری

دەستگیرکراون، هاوکات لە ساڵی رابردو ئامارەکانی کوشتن کەمیکردوە و 41 روداوی کوشتن هەبوە.

نۆ هەزار و 303 دۆسیەی لێکۆڵینەوەمان لەسەر روداوی جۆراوجۆر کردوەتەوە

سەرکەوت ئەحمەد، وتەبێژی بەڕێوەبەرایەتی پۆلیسی سلێمانی ئەمڕۆ بە رۆژنامەنوسانی راگەیاند، ساڵی رابردو هێزەکانیان نۆ هەزار و 303 دۆسیەی لێکۆڵینەوەیان لەسەر روداوی جۆراوجۆر کردوەتەوە و 90%ـی دۆسییەکان یەکلاییکراونەتەوە.

روداوەکانی کوشتن کەمیکردوە

ئەوەشی خستەڕو، لەو ماوەیەدا زیاتر لە 21 هەزار کەس دەستگیرکراون، لەو ژمارەیەش 10 هەزار و 409 کەس دوای دەستگیرکردنیان بە کەفالەت ئازاد کراون، هەروەها بەراورد بە ساڵی 2021 روداوەکانی کوشتن کەمیکردوە، بەجۆرێک ساڵی رابردو 41 روداوی کوشتن هەبوە و ساڵی 2021ـیش 61 روداوی کوشتن هەبوە.

690 دۆسیەی دیکەی تایبەت بە خراپ بەکارهێنانی ئامارەکانی پەیوەندیکردن هەبوە

وتەبێژی بەڕێوەبەرایەتی پۆلیسی سلێمانی وتیشی، ساڵی رابردو 212 کەس دەستگیرکراون کە لە پارێزگاکانی دیکەی عێراق وهەرێم فەرمانی دەستگیرکردنیان هەبوە، هەروەها 690 دۆسیەی دیکەی تایبەت بە خراپ بەکارهێنانی ئامارەکانی پەیوەندیکردنیش هەبوە.

سەرچاوە: خەندان