ئازاد هەورامی

ئازاد عەبدولمەجید عەبدولغەفار ناوی تەواوی ئەم سەركردەیەیە‌و بەئازاد هەورامی ناسراوە.

ساڵی 1954 لەگەڕەكی ئیمام قاسمی شاری کەرکووک لەدایكبووە‌و بەرەچەڵەك خەڵكی ناوچەی تەوێڵەی هەورامانن‌ و هەر بۆیەش نازناوی هەورامی هەڵگرتووە.

تاپۆلی شەشەمی ئامادەیی لەشاری کەرکووک خوێندووە‌و بەهۆی هەڵسوڕانی سیاسییەوە نەیتوانیوە درێژە بەخوێندن بدات.

سەرەتای ساڵی 1970 پەیوەندی بەیەكێتیی قوتابیانی كوردستانەوە كردووە‌و وەك پێشمەرگە بەشداری شۆڕشی ئەیلولی كردووە.

ئازاد هەورامی خاوەنی بیروباوەڕی چەپ بووە، هەر بۆیەش لەساڵی 1973ەوە پەیوەندی بەكۆمەڵەی رەنجدەرانی كوردستانەوە كردو هەوڵ‌و خەباتێكی بێ‌ وچانی دا بۆ بڵاو كردنەوە‌و بەرجەستەكردنی بیرو باوەڕی رێكخراوەكەی.

ساڵی 1976 لەشۆڕشی نوێدا بووە بەپێشمەرگە‌و لەناوچەی چەمی رێزان مەفرەزەیەكی سەرەتایی دروست كردووە‌و درێژەی بەتێكۆشانی سیاسی‌و پێشمەرگانە دا.

چەندین بەرپرسیارێتی باڵای لەكۆمەڵەو یەكێتیدا هەبووە‌و لەساڵی 1978 بە ئەندامی مەكتەبی سیاسیی یەكێتی دیاری كراوە.

بەرپرسی چەندین ئۆرگانی كۆمەڵەو یەكێتی بووە لەوانە بەرپرسی (لقی دووی كەركوكی یەكێتی، دەزگای رۆشنبیری كۆمەڵە، مەڵبەندی بادینانی یەكێتی).

بەداخەوە ئەم سەركردە مەزن‌و دیارەی یەكێتیی نیشتمانیی كوردستان لەدوا قۆناغەكانی ئەنفال‌و لە رۆژی 30ی ئابی1988 لە گوندی كونەكۆتری دۆڵی باڵەیان بەهۆی بۆردومانی فڕۆكەكانی رژێمی بەعسەوە بەسەختی بریندار بوو، بەیانیی رۆژی دواتر لە كاتی گواستنەوەی لە شێخ ئایشەوە بۆ ئاڵوەتان بەهۆی سەختی برینەكەیەوە شەهید بوو ‌و چووە ریزی نەمرانی نیشتمانەوە.

درود بۆ رۆحی پاك‌و بێگەردی شەهید ئازاد هەورامی سەركردەی خاكی‌و خۆشەویست‌و روناکبیرو هونەرپەروەر.

سەرچاوە: ئینسکلۆپیدیای یەکێتیی نیشتمانیی کوردستان -٢٠١٦