18-11-1980

شەهیدبوونی جەمیل ڕەنجبەر بە بۆردوومانی فڕۆکە.

- سەعات سێی پاشنیوەرۆی ڕۆژی 18-11-1980 هێزێکی یەکێتیی نیشتمانیی کوردستان لە گوندی جەلکان بەرەو گوندی پیرانەڕەش لە دەڤەری پشدەر لەگەڵ بەشێک لەهێزێکی سەرکردایەتی دەکەونە ڕێ، ڕووبەڕوی هێرشی هێلیکۆپتەرەکانی سوپای بەعس/عێراق دەبنەوە، لەوێدا 07 پێشمەرگە شەهید دەبن و 12ی دیکەش بریندار دەبن، یەکێک لە بریندارەکان عومەر سەید عەلی دەبێت.

ڕۆژی (18.11.1980)دا لە نزیک گوندی پیرانەڕەش لە ناوچەی سەنگەسەر، دوو فڕۆکەی سمتی ڕژێمی بەعس، بە دۆشکە، شەستتیر، ڕۆکێت و نارنجۆک پەلاماری هێزێکی پێشمەرگەیان داو بوونە هۆکاری شەهید کردنی کادیری ڕۆشنبیر، سەرکردەی دواڕۆژ و هەڵبەستوانی شۆڕشگێڕ شەهید جەمیل ڕەنجبەر و هەشت هاوڕێی تری پێشمەرگەی هەرێمەکانی چوار و هەشتی یەکێتی و بریندارکردنی کۆمەڵێک پێشمەرگەی تر، کە تەواوی شەهیدەکان کادیر و پێشمەرگەی کۆمەڵەی ڕەنجدەرانی کوردستان بوون.

ەو هێزە، کە هەرێمەکانی (2، 4، 5، 8)ی یەکێتیی نیشتمانیی کوردستان دەبێ، ژمارەیان نزیکەی پێنج سەد پێشمەرگە دەبێت، دوو ڕۆژ پێشتر لە شێنێ و ناوزەنگ کە دوو گوندی سەر بە شارەدێی (هەڵشۆن)ن بە ڕێنیشاندەری (ئ. ج. م) بەرپرسی لقی کەرکوک بەرەو گوندەکانی (پیرانەڕەش، جەلکان، ماخۆبزنان و مەمکان)، کە سەر بە شارەدێی (سەنگەسەر)ن بەڕێ دەکەون، بەڵام ئەو چاوساغ و ڕێنیشاندەرە دوو شەو و دوو ڕۆژ هێزەکە دەهێنێ و دەبات ناگەنە هیچ ئاوەدانییەک، لە شەوی دووەم دەیانگەیەنێتە ئەو چوار گوندەی سەنگەسەر. هێزەکە بەهۆی درێژی ڕێگاکە، بێ خۆراکی و نمەنمی بارانەوە زۆر هیلاک دەبێت. لەو چوار گوندەیە هەرێمی دوو، هەرێمی پێنجی قەرەداغ دەیانەوێت بەرەو سنووری خۆیان بڕۆن و هەرێمەکانی چوار و هەشتیش دەیانەوێت پێکەوە بەرەو دەشتی هەولێر بڕۆن. جەمال مەحمود حامید (1960/ کەرکوک)، پێشمەرگەی هەرێمی دووی کەرکوک، کە لە شێنێ و ناوزەنگ تا (پیرانەڕەش، جەلکان، ماخۆبزنان و مەمکان) لەگەڵ هێزە پێنج سەد کەسییەکە بووە، دەڵێ: (دوای بەڕێکەوتنی هێزێکی هاوبەشی هەرێمی چوار و هەرێمی هەشتی دەشتی هەولێر لە گوندی پیرانەڕەش و بە مەبەستی ڕۆیشتنیان بەرەو سنووری پارێزگای هەولێر، کە ژمارەیان نزیکەی دوو سەد پێشمەرگە دەبوو، دوو کۆپتەری سمتی هاتە سەریان و بە هەموو جۆرە چەکێک تەقەی لێکردن، ئێمە وەکو هەرێمی دووی کەرکوک بە سەرپەرشتی غەریب سەعید عەسکەری جێگری فەرماندەی هەرێمی دووی کەرکوک لەناو گوندی ماخۆبزنان سەنگەرمان گرت. ڕادیۆمان لابوو، خستمانە سەر ئێف ئێم، جاشێکی کورد بە فەرماندەیەکی سوپای دەگوت: کۆپتەر زەربەی باشی لێداون، باشی پێکاون، گەر بێتوو بەهۆی کۆپتەرەوە سوپا لە بەرزایی و ناو گوندەکان دابەزێنن، دەتوانن پێشمەرگە بەئاسانی و بەدەست بەدیلیان بگرن).

شەهید جەمیل ڕەنجبەر، هەڵبەستوان، ڕۆشنبیر و مرۆڤێکی بە مانای وشە مارکسی، لینینی، نوێنەری پرۆلیتاریا، هەژاران و ڕەنجدەرانی کوردستان بوو، ئەو کادیرێکی بەتوانای سەرکردایەتی داهاتووی ڕەنجدەر و زەحمەتکێشان بوو، بەڵام بەداخەوە، شەهیدبوونی ئەو، ئارام، ئازاد هەورامی، شیهابی شێخ نوری، جەعفەر عەبدولواحێد، جەمالە ڕەش، سەفا کەرکوکی، یوسف شەریف، سەعدی خەلیل (سیروان)، خالید سابیر (نەبەز)، حەیدەر جوکل، جەمیل ئەحمەد مەحمود (دەرسیم) و دەیان شەهیدی تر، ڕێگەی خۆشکرد بۆ هاتنە پێشەوەی دەیان و سەدان کەسی تری بێتوانا، بێکەلک، هەڵپەرست، خۆپەرست، گەندەڵ، داوێن پیس و دۆلار دز، لە ناوەوەو دەرەوەی کۆمەڵەی ڕەنجدەرانی کوردستان و یەکێتی، وەکو ڕژێمی خەلافەتی ئیسلامی دەسەڵات لە باوک بۆ کوڕو نەوە بگوازنەوە.

شەهیدانی پیرانەڕەش ئەوانەی خوارەوەن:

• 1. جەمیل ساڵح عەزیز جەمیل ناسراو بە مامۆستا جەمیل ڕەنجبەر (1948/ هەولێر/ قوشتەپە/ گۆمەگڕو). ڕۆشنبیر و هەڵبەستوان بوو، لە ڕۆژی (14.05.1977) گیراوە، لە ڕۆژی (18.08.1979) ئازاد کراوە و کۆتایی هەمان ساڵ پەیوەندی بە هێزی پێشمەرگەی کوردستان کردووە. لێپرسراوی لیژنەی شەهید ئاودێر و بەرپرسی سیاسی هەریمی (8)ی دەشتی هەولێر بووە. لە ڕۆژی (18.11.1980) لەگەڵ هەشت پێشمەرگەی هاوسەنگەریدا لە پیرانەڕەشی ناوچەی سەنگەسەر بەر بۆردومانی فڕۆکەی بەعس کەوتن و ڕەوانشاد کران.
• 2. جەنگی ئەسعەد کاکەخان (1957/ هەولێر/ کۆیە)، پێشمەرگەی هەریمی (8)ی دەشتی هەولێر.
• 3. حەسەن ئیسماعیل حاجی عوسمان ناسراو بە پێشڕەو (1957/ هەولێر/ دیبەگە/ بیرەبات)، لە ساڵی (1978)دا بۆتە پێشمەرگە لە هەریمی (8)ی دەشتی هەولێر.
• 4. حەسەن یونس (هەولێر)، پێشمەرگەی هەرێمی (8)ی دەشتی هەولێر.
• 5. دڵشاد محەمەد قادر کەریم (1953/ هەولێر/ کۆیە)، لە ساڵی (1978)دا لە هەریمی (8)ی دەشتی هەولێر بۆتە پێشمەرگە.
• 6. ڕەئوف عەلی حەسەن، پێشمەرگەی هەرێمی (4)ی دوکان.
• 7. سامی ساڵح حەمەد مەحمود خەندان (1957/ هەولێر/ دیبەگە). لە ناوەڕاستی ساڵی حەفتاکانی سەدەی ڕابردوو پەیوەندی دەکات بە ڕێکخستنەکانی کۆمەڵەی ڕەنجدەرانی کوردستان و دواتر لە مانگی ئەیلولی ساڵی (1980)دا لە هەریمی (8)ی دەشتی هەولێر دەبێتە پێشمەرگە.
• 8. سدیق ئیبراهیم حەسەن مەحمود (1957/ سلێمانی/ ماوەت/ گاپیڵۆن/ وڵاغلو)، لە ڕۆژی (05.03.1978)دا لە هەرێمی (4)ی دوکان بۆتە پێشمەرگە.
• 9. محەمەد خدر حەمە خدر (1954/ گۆمتان/ ناودەشت/ قەڵادزە/ سلێمانی).