ئاوێزان نوری

ئاوێزان نوری ساڵی1981 لە سلێمانی لەدایکبوو لە شاری کەرکووک ژیاوە، لەتەمەنی پێنج ساڵیدا خولیای وێنە کێشان و شیعر نوسینی بۆ دروست بوو پاش ئەوەی باوکی لەرێی کتێبەکانی نالی و مەحوی و گۆران و بێکەس فێری نوسین و خوێندنەوەی کرد، خوێندنی تەواو نەکرد لەگەڵ ئەوەشدا تا ئەمڕۆ خاوەنی ٥٧بڕوانامەو ڕێزلێنان و درعی نێودەوڵەتی و ناوخۆییە لە بوارەکانی (ئەدەب، ڕاگەیاندن، مافی مرۆڤ، ئاشتی)ەو هەروەها لە 2010 لەلایەن چەند ڕێکخراوێکی نێو دەوڵەتی خەڵاتی ژنە سەرکردەی پێبەخشرا.

لەدوای دایکی یەکەم کەس کە مژدەی شاعیربونی پێبەخشی، مامۆستا عەبدولکەریمی مودەریس بوو، سەرەتای بڵاوبونەوەی شیعرەکانی دەگەڕێتەوە بۆ2003-2004 لە گۆڤارو ڕۆژنامەکانی کەرکوک، خاوەنی سێ بەرهەمی شیعرییە بەناوەکانی (پیاسەیەک بە کوچەکانی قەدەردا 2005, بەرسیلە عیشقێ بۆ خودا 2006, لە جەستەی گەڵایەکدا دەمرم 2010) بەرهەمێکیشی ساڵی 2008بەچاپگەیاندو کە نوسینی کۆمەڵێک نامەو سەرگوزشتەو گێڕانەوەیەک بوو بەناوی نامەکانی نامۆ بەڵام وەکو فەشەلی نوسینی ڕۆمان هەڵیوەشاندەوەو نەیخستە بەردیدی خوێنەر تا لە ئایندەدا ئیشی باشتری لەسەر بکات، لە ئێستاشدا کۆمەڵێک بەرهەمی شیعری ئامادەیە بۆ چاپ بەناوی (لەو دیوی هەڵوەرینەوە، چرۆ دەکەن حەزەکانم).

زۆرێک لە شیعرەکانی وەرگێڕدراونەتە سەر زمانی (فارسی، عەرەبی، ئینگلیزی، فەڕەنسی) هەروەها سەر زاراوەی شیرینی کرمانجی و هەورامی، خاوەنی دەیان خەڵاتی ئەدەبیە لەوانە:

• خەڵاتی یەکێتی لاوانی کوردستان
• خەڵاتی یەکێتی ژنانی کوردستان
• خەڵاتی بنکەی ئەدەبی گەلاوێژ
• خەڵاتی هونەرمەندانی کوردستان
• خەڵاتی یەکێتی نوسەرانی کورد، هەولێر، سلێمانی، کەرکوک
• خەڵاتی بەڕێوبەرایەتی گشتی و ڕۆشنبیری هونەر.
• خەڵاتی وەزارەتی ڕۆشنبیری
• خەڵاتی فێستیڤاڵی نەتەوەیی کوردی.
• خەڵاتی کوردستان TV
• خەڵاتی ڕۆژنامەنوسانی کوردستان
• خەڵاتی فێستیڤاڵی Reel کە لەلایەن گروپێک ئینگلیزو سکۆتلەندی بەڕێوەچوو لەکوردستان و دواتر گوازرایەوە وڵاتی بەریتانیاو سکۆتلەند لە ١١شار شیعرەکانی بەکوردی خوێنرانەوەو وەرگێڕانەکانەکەشی کەلە لایەن شاعیرەکانی انگلیزو سکۆت کرابون خوێنرانەوە.
• خەڵاتی نینتی (خانمی ژیان) سێهەمین فێستیڤاڵی جیهانی ئەدەب کە سێ دەقی شیعری بە سێ زمانی کوردی و عەرەبی و ئینگلیزی وەرگێڕدران و خوێنرانەوە.
• خەڵاتی فێستیڤاڵی شانۆی سەرشەقام
• خەڵاتی کەناڵی ئازادی کەرکوک
• خەڵاتی وەزارەتی ڕۆشنیری لاوان

• خەڵاتی فێستیڤاڵی عەونی لە بەڕێوبەرایەتی ڕۆشنبیری و هونەری کۆیە

ئەندامی کارای سەندیکای ڕۆژنامەنوسانی کوردستان.

ئەندامی 7تۆڕی ڕێکخراویی لەسەر ئاستی نیشتمانی و نێودەوڵەتی.

2004وەکو ڕاگەیاندکاری یەکێتی ژنانی کوردستان لەکەرکوک دەستبەکاربوو، هاوساڵ لەگەڵ کۆمەڵێک نوسەرو ڕۆشنبیری شارەکە ڕێکخراوێکیان بەناوی سەنتەری پەنا بۆ داکۆکی کردن لە مافەکانی ژنان دامەزراند.

2005 بووە ژمێریاری بنکەی ئەدەبی و ڕوناکبیری گەلاوێژ لە کەرکووک.

2006بوو بە ئامادەکارو پێشکەشکاری بەرنامەیەکی ئەدەبی بەناوی پەنجەرە لە کەناڵی کەرکووک.

2007وەکو نوسەرو هەڵەبڕی گۆڤاری کۆماری ڕۆژ دەستبەکاربوو هاوکات وەکو بەڕێوەبەری پڕۆژە لە سەنتەری پەنا.

لەگەڵ هەموو ئەمانە ساڵی 2008 بە فەرمی کارکردنی لە رێکخراوی سەنتەری پەنا هەڵبژارد کە لە ڕووی یاسایی و کۆمەڵایەتی و ئابوری و وشیاری کاردەکات، سەرەتای کارکردنی وەکو بەڕێوەبەری پڕۆژەو توێژەری کۆمەڵایەتی دەست بەکاربوو، ئێستا بەرپرسی یەکەمی ڕێکخراوەکەیە.

ئەزمونەکانی لە بواری چالاکی مەدەنی و ژناندا، سەرپەرشت بەرپرسی 62پڕۆژەی گەورە لە خزمەتی خێزان و کۆمەڵگەدا کە بەشێکیان:

• 2008-2009بەرپرسی پڕۆژەی یەکسانی کە تێیدا 12ڕاهێنەری پێگەیاند بۆ بڵاوکردنەوەی وشیاری یەکسانی لەسەرجەم دامودەزگا حکومیەکانی ناو شاری کەرکوک و مامۆستایان بە پاڵپشتی دارایی USAID
• 2010بەرپرسی پڕۆژەی پێشکەشکردنی خزمەتگوزاری یاسایی و کۆمەڵایەتی بۆ ژنان بە پاڵپشتی دارایی NPA
• 2015 ئیشرافی پڕۆژەی روبەرونەوەی هاوسەرگیری لەدەرەوەی دادگا، هەروەها بەرپرسی پڕۆژەی پێگەیاندن و بەتواناکردنی مناڵان بۆ ئاشتی بە پاڵپشتی دارایی یونامی.
• 2015 ئیشرافی پڕۆژەی گوندی خاڵیی لە خەتەنەکردنی ژنان.
• بەرپرسی پڕۆژەی روبەڕوبونەوەی هاوسەرگیری پێشوەخت بە وشیارکرنەوەی دایکان و باوکان و کچانی ناوەندی و دواناوەندی.
• ئیشرافی پڕۆژەی پاڵپشتی کەمینەکانی عێراق و ڕاوێژو هاوکاری دەرونی قوربانیانی دەستی داعش.
  
• 2010 ئیشرافی تۆڕی (ژنان لە بونیاتنانی ئاستیدا)دەرخستنی رۆڵی ژن بوو، لەڕێگەی زنجیرەیەک راپۆرت و بەرنامەو ڕۆژنامە.
• 2011-2012 سەرپەرشتی پرۆژەی نا بۆ شێواندنی کۆئەندامی زاوزێی مێینە لە ڕێگەی وشیاری و کۆبونەوەی فراوان و ئەنجامدانی توێژینەوەیەکی مەیدانی لە کەرکووک بە هاوکاری وادی ئەڵمانی.
• 2012 محررو دیزاینەری ڕۆژنامەی Pana For Pace کە تێیدا کار لەگەڵ گروپێک کچە ڕۆژمانوسە سەرەتاییەکان دەکرا بۆ بەتواناکردنیان لە بواری نوسینی ڕاپۆرت و بڵاوکردنەوەی لە ڕۆژنامەکەدا.
• 2013سەرپەرشتیاری پرۆژەیەک بە یەکسانی جێندەری و وشیاکردنەوەی دایکان و باوکان لە پەروەردەکردن و مامەڵەکردن لەرێگەی نمایشی زنجیرەیەک شانۆگەری سەرشەقام، لەنێو خوێندگەو شوێنە گشتیەکان.
• 2014چووە پەرلەمانی سوید بۆ فشارخستنە سەر حکومەتی عێراقی بۆ ڕاگرتنی یاسای جەعفەری، کە تێیدا شەرعیەت دەدرا بە بەشودانی کچان لە تەمەنی نۆ ساڵیدا.
• 2016 بەرپرسی پڕۆژەی پاراستنی مافی ژنان لەرێی پارێزەرو دادگا بە پاڵپشتی دارایی ڕێکخراوێکی سویدی.
• 2017 سەردانیکردن و هاوکاریکردنی ژنانی زیندان لە ڕووی دەرونی و یاسایی و کۆمەڵایەتی و تەندروستی.
• 2017-2018ئیشرافی پڕۆژەیەکی ئابوری و پێگەیاندنی 120ژن بۆ بوون بە خاوەن کار لە کەرکوک.
• 2019-2020 ڕێکخەری گشتی پرۆژەیەکی سویدی .
• 2021سەرپەرشتیاری توێژینەوەک سەبارەت بەتوندوتیژی لە عێراق.
• 2021-2023 ئەدڤۆکەیت و بەرپرس لە بەرقەرارکردنی پڕۆژە یاسای توندوتیژی خێزانی لە عێراق لەڕێی کۆبونەوەو کۆکردنەوەی پاڵپشتی پرۆژەکە

لەگەڵ پەرلەمانتارو کەسایەتی ناوەندەکانی بڕیارو راگەیاندن و تۆڕەکان و ڕێکخراوەکانی عێراق و مامۆستایانی ئایینی. 2008-2023 و ئامادەکاری زنجیرەیەک بەرنامەی تەلەفزیۆنی بە سێ زمانی کوردی، عەرەبی، تورکمانی بۆ سەرجەم کەناڵ و ئیزاعاکانی ناو کەرکووک سەبارەت بە مافەکانی خێزان و ژنان.

بابەتە پەیوەستکراوەکان

• پیاسه‌یه‌ک به‌ کوچه‌کانی قه‌ده‌ردا
• نامه‌کانی نامۆ
• به‌رسیله‌ عیشقێ بۆ خودا