16-12-2024

دوێنێ یەکشەممە رۆژی 15-12-2024 لانیکەم 7 گەنجی کورد بەناوەکانی:

سیامەند سەید ئەحمەدی، کەمال مەسعودی، جەلال سەدەفی، قادر خرامان فەر، یوسف قال، ئارام مەزبولە و زانیار سەید ئەحمەدی خەڵکی گوندی بەیرەمی سەر بە مەهاباد لەلایەن هێزە ئەمنییەکانی دەوڵەتی ئێرانەوە دەستبەسەر و گواسترانەتەوە بۆ شوێنێکی نادیار.

بەپێی وتەی شایەتحاڵان هێزە ئەمنییەکان بە بێ خستنەڕووی رێگەپێدانی دادگا هەڵیانکوتاوەتە سەر ماڵی ئەو هاووڵاتیانە و دەستبەسەریان کردوون.

تائێستا هۆکاری دەستبەسەرکردنی ئەو کەسانە و شوێنی راگرتنیان نەزانراوە.

....

لە سلێمانی دوو ناوەندی دیکە بۆ کۆکردنەوی هاوکاریی ڕاگەیاندرا

سلێمانی

لە چوارچێوەی هەڵمەتەکانی کۆکردنەوەی هاوکاری بۆ ڕۆژئاوای کوردستان، ناوەندی مۆزەخانەی ئەمنە سوورەکە و دەزگای ڕۆشنبیریی جەمال عیرفان کرایەوە، هاوڵاتییان دەتوانن ڕۆژانە لە کاتژمێر ٩:٠٠ـی بەیانییەوە تا ٤:٠٠ـی ئێوارە هاوکارییەکانیان بگەیەنن.

ئەمڕۆ، لە ئەمنەسوورەکەی شاری سلێمانی، بە بەشداریی کۆمەڵێک لەو کەسایەتییانەی هەڵمەتەکانی هاوکارییان بۆ کۆچبەرانی ڕۆژئاوای کوردستان ڕاگەیاندبوو، دوو ناوەندی دیکەیان بۆ کۆکردنەوەی کۆمەکەکان کردەوە.

ئاکۆ غەریب، بەڕێوەبەریی مۆزەخانەی ئەمنە سوورەکە، لەبارەی کامپەینەکەوە ڕوونکردنەوەی بۆ ڕاگەیاندنەکان دا و وتی: کوردانی ڕۆژئاوا لە ئێستادا لە بارودۆخێکی ناخۆشدان و پێویستە ئێمە هاوکارییان بین، بۆیە هەر لە چوارچێوەی هەڵمەتەکانی کۆکردنەوەی هاوکاریی بۆ کوردانی ڕۆژئاوا، بڕیارماندا بە ڕاگەیاندنی دوو شوێنی نوێ بۆ وەرگرتنی هاوکارییەکان لە شاری سلێمانی، ئەوانیش ئەمنەسوورەکە و دەزگای ڕۆشنبیریی جەمال عیرفانە لە شەقامی سالم.

هاوکات ئاماژەی بەوەدا، کە جگە لە بنکەی نوێنەرایەتی ئیدارەی خۆبەڕێوەبەریی و بەردەم ڕێکخراوی ئازادبوون و ئەمنەسوورەکە و ناوەندی ڕۆشنبیریی جەمال عیرفان، لە شارۆچکەکانی دیکەشدا ناوەندی بۆ وەرگرتنی هاوکارییەکان هەیە.

جەمال میرزا

جەمال میرزا

جەمال میرزا عەزیز دانیشتووی شاری سلێمانییە و هاتووە بە دەم کامپەینەکەوە و داواش دەکات هاونیشتمانیان بە پێی توانای خۆیان بەشداربن و بۆ ڕۆژنیوز وتی: هاوکارییکردنی ڕۆژئاوا کارێکی پیرۆزە هەرچەندە باروگوزەرانی خەڵک باش نییە، بەڵام ئەو هاوڵاتییانەی توانایان هەیە دڵنیام کەمتەرخەم نین، هەموومان کوردین و پێویستە بێن بەدەنگ ئەم کامپەینەوە بۆ هاوکاری کردنی کوردانی رۆژئاوا

لە دوای ڕووداوەکانی سووریا، دانیشتووانی کوردی عەفرین، شەهبا، تلڕەفعەت و منبج بۆ پاراستنی ژیانیان ڕوویان لە ناوچە ئارامەکانی هەرێمی باکوور و ڕۆژهەڵاتی سووریا کرد و لە ئێستاشدا بە هۆی کۆچبەربوونەوە لە بارودۆخێکی سەختدا دەژین، بە ئەو مەبەستەش کامپینی کۆکردنەوەی هاوکاری بۆ ڕۆژئاوای کوردستان لە ١٢ـی ئەم مانگە لە لایەن نوێنەرایەتی ئیدارەی خۆبەڕێوەبەریی و ڕێکخراوی ئازاد بوون و چەندین ئازدییخواز و وڵاتپارێزەوە لە شاری سلێمانی ڕاگەیاندرا، لە ئێستادا هاوڵاتییان دەتوانن لە چوار ناوەند کۆمەکەکانیان بگەیەنن.

....

ئیدارەی خۆبەرێوەبەری دەستپێشخەرییەکى بۆ بنیادنانی سووریای نوێ ڕاگەیاند

ئیدارەی خۆبەرێوەبەری لەباکوور و رۆژهەڵاتی سووریا دەستپێشخەرییەکى بۆ بنیادنانی سووریای نوێ راگەیاند كە لە دە خاڵ پێكهاتووە و و تێیدا هاتووە پێویستە گەرەنتیی گەڕانەوەی خەڵکی رەسەن و ئاوارەکان بۆ زێدی خۆیان و پارێزگاری لە کولتووریان و کۆتاییهێنان بە سیاسەتی گۆڕینی دیمۆگرافیا بكرێت.

ئیدارەی خۆبەرێوەبەری لەباکوور و ڕۆژهەڵاتی سووریا دەستپێشخەرییەکى بۆ بنیادنانی سووریای نوێ راگەیاند كە لە دە خاڵ پێكهاتووە.

ئەو دە خاڵەی ئیدارەی خۆبەرێوەبەری لەباکوور و رۆژهەڵاتی سووریا بۆ بۆ بنیاتنانی سووریای نوێ خستویەتییە ڕوو بەمجۆرەن:-

یەکەم– پاراستنی یەکپارچەیی و سەروەریی خاکی سووریا و پاراستنی لە هێرشەکانی دەوڵەتی تورکیا و گرووپەکانی سەر بە تورکیا.

دووەم- وەستاندنی سەرجەم ئۆپەراسیۆنە سەربازییەکان لە خاکی سووریا بۆ دەستپێکردنی گفتوگۆی نیشتمانیی فراوان و بنیادنەر.

سێیەم- گرتنەبەری هەڵوێستی لێبوردەیی و دوورکەوتنەوە لە گوتاری رق ئامێز و دووبەرەکی نێوان سوورییەکان، چونکە سووریا دەوڵەمەندە بە سەرجەم پێکهاتەکانی و پێویستە پارێزگاری لێبکرێت.

چوارەم- ئەنجامدانی کۆبوونەوەیەکی بەپەلە کە سەرجەم هێزە سیاسییەکانی سووریا لە دیمەشق تیایدا بەشداربن بۆ یەکخستنەوەی ڕوانگە و دیدی ماوەی راگوزەر.

پێنجەم- بەشداریی چالاکانەی ژنان لە پرۆسەی سیاسی.

شەشەم- جەخت لە دابەشکردنی سامانە سروشتییەکان دەکەینەوە بەشێوەیەکی یەکسان لە ناوچەکانی سووریا، بەوپێیەی موڵکی هەمووانە.

حەوتەم- گەرەنتیی گەڕانەوەی خەڵکی رەسەن و ئاوارەکان بۆ زێدی خۆیان و پارێزگاری لە کولتووریان و کۆتاییهێنان بە سیاسەتی گۆڕینی دیمۆگرافیا.

هەشتەم- لەگەڵ ئەم پێشهاتانەی سووریا بەردەوامدەبین لە دژایەتیی تیرۆر بۆ گەرەنتی نەگەڕانەوەی داعش بە هاوکاریی هەسەدە و هاوپەیمانیی نێودەوڵەتی.

نۆیەم– کۆتاییهێنان بە دیاردەی داگیرکاری، بڕیار بدرێتە دەست گەل بۆ ئەوەی داهاتووی خۆی دیاریبکات و بنەمای دراوسێیەتى باشیش جێبەجێبکرێت.

دەیەم- پێشوازیی لە هەوڵی بنیادنەرانەی وڵاتانی عەرەبى، نەتەوەییەکگرتووەکان، هاوپەیمانیی نێودەوڵەتی، هەموو کاراکتەرە نێودەوڵەتییە چالاکەکان لەبارەی دۆخی سووریا دەکەین، هانیان دەدەین رۆڵی ئەرێنییان هەبێت لە پێدانی راوێژ بە خەڵکی سووریا و نزیککردنەوەی دیدەکان لەنێوان پێکهاتەکان بۆ ئەوەی ئاسایش و سەقامگیری زامن بێت، دەستوەردانی دەرەکیی لە دۆخی سووریا نەمێنێت.

.....

پارتی دیموکراتی کوردستان و یەکێتیی نیشتمانیی کوردستان لە پیرمام كۆدەبنەوە.

سەعدی ئەحمەد پیرە وتەبێژی یەكێتی رایگەیاند، سبەینێ شاندنی یەكێتیی و پارتی كە بۆ پێكهێنانی حكومەت دیاریكراون، لەپیرمام كۆدەبنەوە و ئامانجی كۆبونەوەكە گفتوگۆ كردنە لەسەر چۆنێتی پێكهێنانی حكومەتی نوێی هەرێمی كوردستان و بەگەڕخستنی پەرلەمانی كوردستان.

سەعدی ئەحمەد پیرە، وتەبێژی یەكێتی بە میدیاكانی حزبەكەی رایگەیاند، سبەی نێشاندنی یەكێتی و پارتی كە بۆ پێكهێنانی حكومەت دیاریكراون، لە پیرمام كۆدەبنەوە.

پێكهێنانی حكومەتی نوێی و بەگەڕخستنی پەرلەمان ئاماژەی بەوەشكرد، ئامانجی كۆبونەوەكە گفتوگۆكردنە لەسەر چۆنێتی پێكهێنانی حكومەتی نوێی هەرێمی كوردستان و بەگەڕخستنی پەرلەمانی كوردستان.

گفتوگۆ لەبارەی بارودۆخی ناوچەكە دەكرێن

سەعدی ئەحمەد پیرە باسی لەوەشكردوە، "بەهۆی هەستیاری بارودۆخی ناوچەكە و گۆڕانكارییەكانی سوریا بەباشی دەزانین گفتوگۆ لەسەر ئەو پرسەش بكرێت".

......

شاندی پەرلەمانی کەتەلۆنیا گەیشتنە ڕۆژئاوا و پشتیوانی خۆیان دووپات کردەوە

هاوسەرۆکانی خۆبەڕێوەبەریی باکوور و ڕۆژهەڵاتی سووریا، پێشوازییان کرد لە شاندێکی پەرلەمانی کەتەلۆنیا و کۆبوونەوە، چەندین پرسی گرنگ و گەرمیان دەربارەی گۆڕانکارییەکانی سووریا تاوتێ کرد و شاندەکە پشتیوانی خۆیان بۆ خۆبەڕێوەبەریی ڕۆژئاوای کوردستان دووپاتکردەوە.

هەریەک لە ئەڤین سوێد و حسێن عوسمان هاوسەرۆکانی خۆبەڕێوەبەریی دیموکراتیکی باکوور و ڕۆژهەڵاتی سووریا، پێشوازییان لە شاندی پەرلەمانی هەرێمی کەتەلۆنیا کرد، کە پێکهاتبوون لە هەریەک لە ڕۆبن واگنسبەرگ پەرلەمانتار و سەرۆکی پارتی یەکێتی گەلی کەتەلۆنیا کارلس ئەلبێرت و کۆبوونەوە.

لەبارەی سەردانی شاندەکە و ناوەڕۆکی کۆبوونەوەکەوە، ماڵپەڕی فەرمی خۆبەڕێوەبەریی دیموکراتیکی باکوور و ڕۆژهەڵاتی سووریا ڕاگەیاندراوێکی بڵاو کردەوە.

لە ڕاگەیاندراوەکەدا هاتووە، هەردوولا مەترسی هێرشەکانی دەوڵەتی داگیرکەری تورک و هەوڵەکانی ئەنقەرە بۆ داگیرکاریی لەسەر خاکی سووریایان تاوتێ کرد.

هەروەها ئەزموونی خۆبەڕێوەبەریی دیموکراتیکی باکوور و ڕۆژهەڵاتی سووریا و ئیدارەی ڕۆژئاوای کوردستان وەک ئەزموونێکی سەرکەوتوو پێناسە کرا و وەک زامنی ئازادیی و چارەسەری کێشەکانی سووریا دەستنیشان کرا.

هەروەها شاندەکە لەم قۆناغەدا، پشتیوانی کەتەلۆنیایان بۆ خۆبەڕێوەبەریی دیموکراتیکی باکوور و ڕۆژهەڵاتی سووریا دووپات کردەوە و جەختیان لە پەیوەندی بەردەوام و هاوکاریی نێوان هەردوولا کردەوە.