مامۆستا باکووری

باکووری کوڕی ئیسرائیل خممۆ یۆنان لە گوندی (ساتیبەگ)ی پارێزگای (وان) لە باکووری کوردستانەوە کۆچیان کردووە بۆ باشووری کوردستان تا لە ئاگری شەری سەفەربەلک و سوپای عوسمانی ڕزگاریان بێ.

باکووری لە ڕێکەوتی 05-11-1928 لە قشلەی کۆیە لەدایکبووە.

ناوی دایکی ئینیار لازار عەبدال و لە گوندی (خەراشک)ی پارێزگای (وان) لەدایکبووە.

باکووری لە شاری کۆیە تیپی مۆسیقای باواجی دامەزراندووە و تا ئێستا زیاتر لە 50 گۆرانی تۆمارکردووە.

ڕۆژی 02-11-2022 لە هەولێر کۆچی دوایی کرد.

چه‌ند وێستگه‌یه‌كی ژیانی مامۆستا باكووری

• له‌ (5ی تشرینی دووه‌م/ نۆڤێمبه‌ری 1928) له‌ قشڵه‌ی كۆیه‌، له‌ دایك و باوكێكی ئاشووری له‌دایكبووه‌. دایك و باوكی له‌ گوندی ساتیبه‌گ و خه‌راشكی سه‌ر به‌ شاری وانی باكووری كوردستان له‌دایكبوون و له‌ سه‌ره‌تای سه‌ده‌ی بیسته‌مدا روویان له‌ باشووری كوردستان كردووه‌ و له‌ شاری كۆیه‌ گیرساونه‌ته‌وه‌.

• باكووری له‌ 1935 چووه‌ته‌ به‌ر خوێندن و له‌ 1946 قۆناغه‌كانی خوێندنی سه‌ره‌تایی و ناوه‌ندی له‌ كۆیه‌ ته‌واو كردووه‌.

• پۆلی چوار و پێنجی ئاماده‌یی به‌شی وێژه‌یی له‌ هه‌ولێر ته‌واوكردووه‌.

• له‌ 1953 روو له‌ به‌غدا ده‌كات و له‌ كۆلیژی خانه‌ی باڵای مامۆستایان له‌ به‌شی زمانی ئینگلیزی وه‌رده‌گیرێت.

• له‌ به‌هاری 1952 له‌ به‌غدا ده‌چێته‌ ئێزگه‌ی كوردی به‌غدا و له‌ لایه‌ن لیژنه‌ی هونه‌رمه‌ندان عه‌لی مه‌ردان، ره‌فیق چالاك و ئه‌حمه‌د خه‌ڵیل ده‌نگی بۆ گۆرانیگوتن په‌سند ده‌كرێت.

• له‌ هه‌مان ساڵدا (1952) یه‌كه‌م گۆرانی (هەی مەلەنگێنە)ـی لە ئێزگەی كوردی بەغدا تۆمار كردووە.

• له‌ 1957 وه‌ك مامۆستای زمانی ئینگلیزی له‌ ناوه‌ندی كوڕانی كۆیه‌، كه‌ خۆی پێشتر قوتابی بووه‌ تێیدا داده‌مه‌زرێت.

• دامه‌زرێنه‌ری تیپی مۆسیقای باواجی كۆیه‌یه‌.

• له‌ 1957 له‌ رێی ئاهه‌نگگێڕانه‌وه‌ به‌ هاوبه‌شی له‌گه‌ڵ مامۆستا سێوه‌ی هونه‌رمه‌ند كۆمه‌كی بۆ زیانبه‌ركه‌وتووانی لافاوه‌كه‌ی سلێمانی كۆكردووه‌ته‌وه‌ و له‌ كۆیه‌ و هه‌ولێر ئاهه‌نگیان به‌و هۆیه‌وه‌ گێڕاوه‌.

• له‌ 1961ه‌وه‌ راژه‌ی مامۆستایه‌تییه‌كه‌ی ده‌گوازرێته‌وه‌ بۆ شاری هه‌ولێر.

• ژماره‌یه‌ك به‌رهه‌می چاپكراوی بڵاوكردووه‌ته‌وه‌، له‌وانه‌:

- چۆنێتی گۆرانی گوتن، وه‌رگێڕان له‌ ئینگلیزییه‌وه‌.

- گۆرانیبێژه‌ نه‌مره‌كان، 3 به‌رگ و باسكردن له‌ ژیانی 47 هونه‌رمه‌ند له‌ 699 لاپه‌ڕه‌دا.

- چیرۆكی هه‌ندێ گۆرانی كوردیی ره‌سه‌ن.

- ته‌مه‌نێك گۆرانی و ئاواز و مۆسیقا و خۆشخوانی.

- تیپی مۆسیقای باواجی كۆیه‌ له‌ (1957 تا 2008).

- ئێزگه‌، مێژووی دامه‌زراندی ئێستگه‌ی رادیۆی به‌غدای عه‌ره‌بی و به‌شی كوردی.

- له‌ 2010 خه‌ڵاتی ماملێی له‌ لایه‌ن مه‌ڵبه‌ندی هونه‌ری ماملێ پێبه‌خشراوه‌.

- دامه‌زرێنه‌ری بنكه‌ی مقامه‌ له‌ شاری هه‌ولێر.

- به‌ر له‌ سێ رۆژ له‌ گێڕانی ئاهه‌نگی 95 ساڵه‌ی له‌دایكبوونی، ئه‌مڕۆ چوارشه‌ممه‌ (2ی تشرینی دووه‌م/ نۆڤێمبه‌ری 2022) كۆچی دوایی كرد.

ئاماده‌كردنی: ئ.ر کوردستان24