حەسەن گەرمیانی

ئامادەکردنی: نەجمەدین عەزیز سمایل

ناوی تەواوی(حەسەن عەبدوڵڵا محەمەد ئاغا)یە، لە ساڵی ١٩٤٥ لە شارەدێی(قادر کرەم)ی سەر بەناوچەی گەرمیان لە دایك بووە، خوێندنی سەرەتایی و ناوەندی لە قادرکەرەم تەواوکردووە، لە ساڵی ١٩٦٥-١٩٦٦ ئامادەیی کشتوکالی لە سلێمانی تەواوکردووە، لە ٢٩-١١-١٩٦٦ وەکو(معید- موعید) لە ئامادەیی کشتوکالی(بەکرەجۆ) دەستبەکار بووە. یەکەم بەرهەمی گۆرانی حەسەن گەرمیانی گۆرانی(خۆم قوربانی، سوخمەی کۆنی.....وەك مێخەکبەند دەڕوا بۆنی) لەسەر شانۆی ئامادەیی سلێمانی لەگەڵ تیپی مۆسیقای سلێمانی پیشکەشیکردووە، بەڕێکەوتیش کامیرەمانێکی تەلەفزیۆنی بەغدا بە ڕەش و سپی تۆماری کردووە.

لە ساڵی ١٩٧١ بە بۆنەی دووەم ساڵیادی ڕێکەوتننامەی ١١ ئادار ساڵی ١٩٧٠، لە هۆلی(خلد) لە بەغدا حەسەن گەرمیانی هەر لەگەڵ تیپی مۆسیقای سلێمانی هەردوو گۆرانی(کەمەرەشل و مەیلەنگێنە)ی پێشکەشکردووە، کە دەنگ و سەدایەکی زۆری داوە، لە ماوەی دوو سێ ڕۆژدا بە هەموو کوردستاندا بڵاوبووەوە، بووە وێردی سەر زمانی هەموو خەلك. لە حەفتاکان و هەشتاکانی سەدەی ڕابردوو، ڕژێمی بەعس زۆری هەولدا کە هونەرمەند حەسەن گەرمیانی هاوکار و هاویارییان بێت لە بۆنەکانییاندا، بەڵام ئەو هەمیشە و هەرگیز بەشداری هیچ لەو بۆنانەی ئەوانی نەکرد، بۆیە تۆشی ئازار و ئەشکەنجە گیرانیش بووە، دواتر کە ئازادکراوە، ماڵەکەی لە کەرکووك بردۆتە هەولێر، بەڵام لەوێش هەر لە ژێر فیشار و چاودێری ئەو رژێمە دیکتاتۆرییە بووە.

هونەرمەند حەسەن گەرمیانی لە ساڵی ١٩٩٧ ڕوو لە هەندەران دەکات و لە وڵاتی(نەڕویج) وەکو پەنابەری سیاسیی نیشتەجێدەبێت، ئەو بەردەوام دەبێت لە چالاکییە هونەرییەکانی لە ساڵی ٢٠٠٤ ئەلبۆمێکی نوێ بە ناوی(گەرمیان) بەرهەمهێناوە کە هونەرمەند(بێلان)ی کوڕی کارە هونەرییەکانی بۆ ئەنجامداوە، پاشان لە ساڵی ٢٠٠٨ ئەلبۆمێکی دیکەی بە ناوی(خواست) کە بە یارمەتی و هاوکاری کۆمپانییای ئاسیا سێل و کۆمپانیای چوارچرا بەرهەمهێنراوە.

هونەرمەند حەسەن گەرمیانی لە شوێنێکدا دەڵێت:(من مولکی هیچ کەس و لایەنێك نیم، هەموو کەس و لایەنێکیش بە مولکی خۆم دەزانم). ئەو زۆر بە وەفا و نمەکدارە، هەموو هونەرمەند و ڕۆشنبیر و گوێگران و هەوادارانی خۆی خۆشدەوێت و سوپاسی هەموو ئەو هونەرمەندانە دەکات کە کاری بەرهەمهێنانی هونەرییان بۆ ئەنجامداوە لەوانە(ئەنوەر قەرەداغی، خالید سەرکار، سەڵاح ڕەئوف، ئەلبێرت عیسا، وریا ئەحمەد، مامۆستا سەردار، مامۆستا حەسەن، ئامانج غازی، سەید ئەحمەد رواندزی، فەرهەنگ غەفور، شێرزاد سەرسپی، گۆران جەمیل، دلێر حسێنی برازای، چەتۆ نەورۆز، فاروق باپیر و بێلانی کوڕی) دەکات.

هونەرمەند حەسەن گەرمیانی لە ساڵی ١٩٧٠ بووەتە ئەندامی تیپی مۆسیقای سلێمانی، بەشی زۆری بەرهەمەکانی هەر لەگەڵ ئەو تیپە تۆمار و نمایشکردووە، کۆمەڵێك گۆرانی خۆش و ئاست بەرزی پێشکەش بە میللەتەی کردووە، کە بەشی زۆریان لە دەقی فۆلکلۆری نەتەوەکەمان و هەڵقوڵاوی هەست و سۆزی ناوچەی گەرمیان و هەموو کوردستانە، هەموو بەرهەمەکانیشی زیندوون و هەرگیز بە زیندوویی دەمێننەوە، لە گۆرانییە دیارەکانی(دیسان بارانە، کەمەرەشڵ، لێم یاخییە، سەوزەڵێ، گۆزەی سەرشانی، مەیلەنگێنە، سێ گۆرانی تێهەڵکێش- سۆزەی گەرمان- ساڵدانە- هەی نەخشانم، لانکێ، لەرزان، کەژاڵێ، ئێوارەی پایز، جوانی ڕێبوار، سابات، لەناو ڕەزان، کزەی جەرگانم، خواست...چەندین بەرهەمی دیکەش).

هونەرمەند حەسەن گەرمیانی دیارە لە ٢٤-٧-٢٠١٩ گەڕاوەتەوە کوردستان لە فڕۆکەخانەی هەولێر بەڕێز هونەرمەند فەرهەنگ غەفور بەڕێوەبەری گشتی ڕۆشنبیری و هونەری لە وەزارەتی ڕۆشنبیری هەرێمی کوردستان بە یاوەری چەند کەسایەتییەکی دیکە پێشوازیان لێکردووە، لە ڕۆژی ٢٩-٧-٢٠١٩ لە لایەن وەزارەتی ڕۆشنبیری هەرێمی کوردستان خەڵات و ڕێزیلێندراوە. ئەو زیاتر لە(٤٠) ساڵ خزمەتی هونەر و گۆرانی کوردی کردووە، هەر سەرکەو و سەرفراز بێت.

وێنەکان: ١ - هونەرمەند حەسەن گەرمیانی، هونەرمەند حەسەن گەرمیانی لەگەڵ تیپی مۆسیقای سلێمانی گۆرانی(دیسان بارانە)، ٣ - هونەرمەند حەسەن گەرمیانی -تیپی مۆسیقای سلێمانی، ٤ - هونەرمەند حەسەن گەرمیانی، ٥ - لە لای ڕاستەوە: نە ناسراوە، هونەرمەند حەسەن گەرمیانی، هونەرمەند فەرهەنگ غەفور بەڕێوەبەری گشتی ڕۆشنبیری و هونەری ، ٦ - هونەرمەند حەسەن گەرمیانی لە گەڵ هاوسەرەکەی لە کاتی هاتنەوەیان بۆ هەولێر لە ٢٤-٧-٢٠١٩. ٧ - هەتا ١٠ - هونەرمەند حەسەن گەرمیانی و بەرهەمەکانی، ١١ - تیپی مۆسیقای سلێمانی.