کەریم دەشتی

که‌ریم ده‌شتی تا ئێستا زیاتر له‌ ده‌ دیوانه‌ شیعریی پێشکه‌ش به‌ کتێبخانه‌ی کوردی کردووه‌ و ژماره‌یه‌کیش له‌ به‌رهه‌مه‌ شیعرییه‌کانی وه‌رگێڕدراون بۆ زمانه‌کانی وه‌ک عه‌ره‌بی و فارسی و سویدی و هه‌روه‌ها ئینگلیزیش .

کەریم دەشتی لە ساڵی 1955 لە شاری هەولێر لە دایکبووە.

خوێندنی سەرەتایی ناوەندی و ئامادەیی هەر لە شاری هەولێر تەواو کردووە.

ساڵی 1980 کۆلێژی مافی لە بەغدا تەواو دەکات.

ناوبراو سکرتێری گۆڤاری کاروان بووە دوای ڕاپەڕین، هەروەها سکرتێری ڕۆژنامەی ستایل بووە کە ڕۆژنامەیەکی رۆشنبیری و مەعریفی بووە.

دیوانە چاپکراوەکان

• خاک و هەڵۆ، شیعر، بەغدا – 1980- دەزگای ڕۆشنبیری وبڵاو کردنەوەی کوردی، 50 لاپەڕە
• تەمە سپییەکانی ڕۆح، شیعر، هەولێر- 1988- ئەمانەتی گشتی ڕۆشنبیری و لاوان 68 لاپەڕە
• وردە گەڵا – 1989_ سلێمانی
• پیانۆی ڕۆژهەڵات - 2000 - شیعر، هەولێر چاپخانەی وەزارەتی ڕۆشنبیری هەولێر 186 لاپەڕە
• درەختی حیکمەت، 2002، هەولێر چاپخانەی وەزارەتی ڕۆشنبیری هەولێر 109لاپەڕە
• دۆستێ هەمیشە چاوەڕوانمانە - 2004 - شیعر، هەولێر، بڵاوکراوەی بزاڤی ڕۆشنبیرانی نوێخواز، 98 لاپەڕە
• پیانۆی ڕۆژهەڵات – 2004 - کۆی بەرهەمەکان شەش دیوانی شیعرە، دەزگای ئاراس هەولێر – 415 لاپەڕە
• بورجی بەڵەک - 2006- بڵاوکراوەی گۆڤاری ئاییندە- سەردەم 113 لاپەڕ ە
• سیفری ئاگر، شیعر، کەرکووک 2007- یەکیەتی نووسەرانی کورد لقی کەرکووک
• پەڕتووکی پیرۆزی عاشقان، شیعر، هەولێر- 2007 - دەزگای ئاراس هەولێر 264 لاپەڕە
• تۆ لە هەموو شوێنێکی تۆ 2010 دەزگای چاپ و بڵاوکردنەوەی سلێمانی 215 لاپەڕە
• پەڕتووکی ئاو 2009 دەزگای موزیک و کەلەپوری کوردیو هەولێر 144 لاپەڕە
• پەڕتووکی نەی 2009 دەزگای مۆزیک و کەلەپوری کوردی هەولێر 199 لاپەڕە
• درەختی درەوشاوە 2011 سەنتەری لیکۆڵینەوەی فیکری نما هەولێر 126 لاپەڕە
• درەختی خامۆشی 2011 سەنتەری لێکۆڵینەوەی فیکری نما 142 لاپەڕە
• سکڵی ناو خۆڵەمێش 2012 لە بڵاوکراوەکانی سەنتەری ڕۆشنبییی ڕێژیار- هەولێر 96 لاپەڕە
• کۆدیوانی شیعر 3 بەرگ – لە بڵاوکراوەکانی مەڵبەندی گشتی یەکیەتی نووسەرانی کورد- هەولێر-2012-
• بەرگی یەکەم- 379 -، بەرگی دووەم – 440 لاپەڕە – بەرگی سێیەم - 245- لاپەڕە، چاپخانەی ڕۆژهەڵات.
• بەرز بەرز تا قووڵایی – شیعر – 2014 - دەزگای موکریان 142 - لاپەڕە
• کۆدیوانی شیعر دەزگای موکریان سێ بەرگ – بەرگی یەکەم 577 لاپەڕە بەرگی دووەم 680 لاپەڕە بەرگی سێهەم 439 لاپەڕه.
• تاریک بەقەد درەوشانەوە تاریک 2016- شیعر - ناوەندی ئاوێر171 لاپەڕە
• دیوانی ئەفیونی من - شیعر – 2018 – هەولێر – چاپخانەی حیزبی شیوعی کوردستان

چەند هۆنراوەیەکی کەریم دەشتی

• تۆ تاکی لە زمان
• یا کۆی لە گومان؟
• ئاوا منت داوەتەبەر
• شەوقی لووتکە و پاچی زەمان.

• لە میانی دوو شیعرا ئەسووتێم
• شیعرێکیان کە نووسیم باڵی گرت
• شیعرێکیش کە نووسیم
• لەفڕین مانی گرت

• گۆڕ بۆ یاد و یادەوەریی هەڵئەکەنین
• لە حەسرەت و خەمگینییدا
• بۆ ڕابردووی تەوقی سەرمان پێئەکەنین
• لەبەر دەرگای ئایندەشا ...

خاڵێک هەیە

• لەسەر هەر وشەیەکی دائەنێم
• ئاگر ئەگرێ و ناکوژێتەوە
• لەدوای هەر ڕستەیەکا دایئەنێم
• ئەم رستەیە ئەناڵێنێ و
• تاهەتایە نابڕێتەوە.

• تۆ هه‌ر ده‌رگاكان دائه‌خه‌ی
• منیش هه‌ر كلیل درووست ئه‌كه‌م
• ئێستا دڵی تۆ پڕه‌ له‌ ده‌رگای داخراو
• ماڵه‌كه‌ی منیش پڕه‌ له‌ كلیل

• دەرگام لە ڕەشەبا گرت
• تا تۆ هەڵنەوەریت
• بەڵام ئەفسووس خۆم هەڵوەریم

• بچمه‌وه‌ ئه‌و سه‌ری دونیاش
• تۆ له‌گه‌ڵما ڕێگه‌ ئه‌بڕی
• تۆ ماڵه‌ گه‌وره‌كه‌ی منی
• هه‌رتۆ له‌باوه‌شم ئه‌گری نیشتمانم

• ئه‌ی شیعر، ئه‌ی میهره‌بان
• گه‌ر تۆ نه‌بای، چۆن ئه‌بوومه‌ خزمی گیا
• چۆن ئه‌متوانی له‌ناو ماڵی ئاگر بنووم
• گه‌ر تۆ نه‌بای من چی ئه‌بووم؟