کەریم عوسمان

كەریم عوسمان هونەرمەندی شانۆکار و كادیری راگەیاندنی یەکێتیی نیشتمانی کوردستان.

کەریم عوسمان لە ساڵی 1959 لە شاری سلێمانی لە دایكبووە.

ساڵی 1971 خوێندنی سەرەتایی لە سلێمانی تەواوكردووە.

ساڵی 1972 دوای ئەوەی كە نەجمی برای بۆتە مامۆستای زمانی كوردی لە زانكۆی بەسڕە، كەریم عوسمان لەگەڵیدا چۆتە بەسرە و لەوێ‌ خوێندنی ناوەندیی بە زمانی عەرەبی تەواو كردووە، ئەمە ئەو دەرفەتەی بۆ رەخساندووە كە بە باشی فێری زمانی عەرەبی ببێت.

ساڵی 1974 گەڕاوەتەوە بۆ سلێمانی و لەوێ‌ خوێندنی دواناوەندی تەواوكردووە.

ساڵی 1978 لە بەشی شانۆی پەیمانگای هونەرە جوانەكانی بەغدا وەرگیرا، لەوێ‌ پەیوەندی بە رێكخستنەكانی كۆمەڵەی رەنجدەرانی كوردستانەوە كردووە، دوای تەواوكردنی خوێندن لە بەغدا لەساڵی 1982 گەڕاوتەوە بۆ سلێمانی و لەگەڵ چەند هاوڕێیەكی لەوانە دڵشاد مەریوانی و عوسمان شەیدا و عەبدولرەحمان قادر غەفور ناسراو بە شێخ عەبدول لە یەكێ‌ لە كەرتەكانی رێكخستن رێكخراوە.

لەو ماوەیەدا رۆڵی رایەڵەی پەیوەندی نێوان دەستەبژێری رۆشنبیرانی شاری سلێمانی و دامەزراوە رۆشنبیرییەكانی شۆڕشی دیوە و بەشێكی زۆری شیعر و نامەكانی شێركۆ بێكەس و دڵشاد مەریوانی لە رێگەی ئەوەوە گەیشتۆتە دەستی شەهابی برای كە پێشمەرگە بووە و نامەكانی گەیاندۆتە دەست سەركردەكانی یەكێتیی نیشتمانیی كوردستان و دامەزراوە رۆشنبیرییەكان. هەر لە رێی كەریم عوسمانەوە كاسێتی سروودی (مەشخەڵان) بەشێوەی سكێچ گەیشتۆتە بارەگای ئێزگەی دەنگی گەلی كوردستان و دواتر وەك مارشی یەكێتیی نیشتمانیی كوردستان پەخش كراوە، هەروەها لە دەرفەتی گونجاودا رۆڵی هەبووە لە ناردنی كۆمەك و دەرمان بۆ تیپی 47ی پیرەمەگروون و هەندێك ئامێری موزیك بۆ تیپی مۆسیقای شەهید كارزان لە بەرگەڵو.

ژیانی هونەریی كەریم عوسمان بە ژیانێكی دەوڵەمەند دەژمێردرێ‌، لە ژمارەیەكی زۆری شانۆگەرییەكاندا بەشداریی كردووە، لە هەندێكیاندا وەك كاراكتەری سەرەكی و لە هەندێكی دیكەدا دەرهێنەر بووە. ساڵی 1979 بەشدار بووە لە شانۆگەریی (ئەو پیاوەی بوو بە سەگ) كە لە بەغدا لە بارەگای كۆمەڵەی رۆشنبیری كوردی نمایش كرا. لە ماوەی ساڵانی 1983-1986دا لە چەند شانۆگەرییەكدا بەشدار بووە وەك (دوو ڕەگ) و (مانگی ئاوابوو). هەروەها بەشداریی لە چەند شانۆگەرییەگی وەرگێڕدراودا كردووە وەك (كەللە سەر)ی شاعیری گەورەی تورك نازم حیكمەت كە دڵشاد مەریوانی وەریگێڕاوەتە سەر زمانی كوردی و جەلیل زەنگەنە لە ساڵی 1987 دەریهێناوە.

هەر ئەو ساڵە بەشداربووە لە زنجیرە درامای (خاتوو كڵاوزەر) و رۆڵی میری ئامێدی تێدا گێڕاوە. چەند شانۆگەرییەكیشی دەرهێناوە لەوانە شانۆگەری (كەمانچەی رۆچێلد) لە ساڵی 1987 كە بە یەكێ‌ لە شانۆگەرییە هەرە سەركەوتووەكانی مێژووی شانۆی كوردی دادەنرێت. لە ساڵی 1989دا شانۆگەرییەكی شكسپیری بۆ كۆلێجی ئەدەبیاتی زانكۆی سەڵاحەدین دەرهێنا و دوای نمایشكردنی بە زمانی ئینگلیزی لە فیستیڤاڵی زانكۆكانی عیراق لە موسڵ، پلەی یەكەمی فیستیڤاڵەكەی بەدەستهێنا.

پاش راپەڕینی ساڵی 1991 لە كەناڵی هەولێری تەلەفزیۆنی گەلی كوردستان وەك بێژەر كاری كردووە و وەك كادیرێكی كارا هەموو توانای خۆی بۆ پەرەپێدانی راگەیاندنی بینراو خستۆتەگەڕ. لەو ماوەیەدا كاریگەریی، وەك كادیرێكی راگەیاندن لەسەر رای گشتی گەیشتۆتە رادەیەكی هەستپێكراو. هەوڵی تیرۆركردنی لە هەولێر و برینداركردنی، زۆر بە ڕوونی نیشانی دەدا كە نەیارانی یەكێتیی نیشتمانیی كوردستان چیتر ئامادەنەبوون بیەڵن بەردەوام بێت لەسەر كاركردنە سەر رای شەقام.

لە ئابی 1996 لەساتی داگیركردنی هەولێر لەلایەن سوپای بەعسی فاشی بە هاوكاری هێزەكانی پارتیی دیموكراتیی كوردستان، كەریم عوسمان لەبارەگای ئێزگە دەستگیركرا و گۆڕون كرا.