عومەر عەبدوڵڵا عەزیز (عومەر سەرابی)

عومەر عەبدوڵڵا عەزیز، ناسراوە بە عومەر سەرابی خاوەن پێدواویستییەکی تایبەتی گەڕەکی کارەبایە لە شارۆچکەی قەڵادزێی ئیدارەی ڕاپەڕین، لە ساڵی ١٩٧١ لەو شارۆچکەیە لە دایكبووە و تا ئێستاش لەوێ نیشتەجێیە، لەکاتی کارکردندا لە ئەستەنبوڵی تورکیا بەهۆی بەرکەوتنی ئاسن بە پشتی، دڕکەپەتکی دەپچڕێت و قاچەکانی لەدەستدات.

سەرابی دوای لەدەستدانی قاچەکانی و گەڕانەوەی بۆ کوردستان دوای خولیاکانی منداڵی دەکەوێت و وەک خۆشی دەڵێت: لە ڕێگەی ئینتەرنێتەوە خۆی فێری وێنەکێشان و نەی ژەنین دەکات.

ئەو بە تەنیا لە ژوورێکی ماڵەکەیدا کە پڕە لە ھونەر و بەھرە دەژی، نەبوونی قاچەکانی نەبوونەتە ڕێگر لەبەردەم سەرابیدا بەڵکو بە پێچەوانەوە توانیویەتی چەندین بەهرەی جوان لە خۆیدا پەرە پێبدات.

لەگەڵ ھەنگاونانت بۆ ناو ماڵەکەی چاوەکانت بەو وێنانە پڕدەبن کە بەرھەمی ماندوبوونی چەندین ساڵەن، ھەروەھا ھەبوونی ئامێرە میوزیکییەکان سەرنجت ڕادەکێشت و سەدای دەف و جریوەی نەیەکەی ژوورەکەی پڕ کردووە .

سەبارەت بە سەرەتای دەستکردن بە کارکردنی و هەوڵەکانی عومەر سەرابی وتی: سەرەتای دەستپێکی کاری هونەریم دەگەڕێتەوە بۆ ساڵی ٨٠ـکان کە ئەوکاتە خوێندکاربووم و بەهۆی بچووکی تەمەنمەوە هونەرەکەم نەکردووەتە پیشە.

ئەم بەهرەمەندە لە دوای لە دەستدانی قاچەکانی ماڵەکەی دەکات بە گەلەرییەک و بڕیار دەدات بۆ هەمیشە لەناو هونەردا بژێت و بیکاتە بەشێکی گرنگی ژیانی، ئەو تابلۆیانەی کە دەیانکێشێت خەڵکی بە تامەزرۆییەوە لە نزیکەوە دەیبینن، ئەمەش بووەتە هۆی ئەوەی زیاتر هانی سەرابی هونەرمەند بدات و بیکات بە پیشەیەک بۆ بژێوی ژیانی.

دەشڵێت: لەپاڵ شێوەکارییەکەمدا هەرشتێک پێی بوترێت هونەر من حەزم لێی بووە بە تایبەت بواری مۆسیقا و بەتایبەتریش ئامێری نەی، نزیکەی ٢٠ ساڵ دەبێت کاری وێنەکێشان و شێوەکاری و نزیکەی ١٢ ساڵیشە لە بواری مۆسیقادا کاردەکەم، هیچ کاتێکی بەتاڵم نییە چونکە بەڕاستی بە زەرەرم زانیوە کە کاتی بەتاڵم هەبێت.

لە بەردەوامی قسەکانیدا سەرابی ئاماژەی بەوەشکرد، بەهۆی ئەوەی کە قەڵادزێ دوورە دەستە کەسێک نەبووە دەستم بگرێت و هاوکارییم بکات بۆیە پەنام بردووە بۆ تۆڕە کۆمەڵاتییەکان و کتێب و سەرچاوەی تریشم پەیداکردووە، ئێستا ڕۆژانە جگە لە کاری شێوەکاریی بەردەوام سەرقاڵی ڕاهێنانی مۆسیقام.

ئەو هونەرمەندە لە وەسفی ئامێری نەیدا دەڵێت: ئامێری نەی یەکێکە لە ئامێرە هەوایی و سۆزدارییەکان، نەی ناوەکەی بۆشە هونەرەکەی لەوەدایە کە تۆ بتوانی بیژەنیت و بتوانیت دەنگی لێبێنیت، دروستکردنی دەنگ لە قامیشێک کەناوەکەی بۆشە کەمێک قورسە، ساڵێک بۆ دوو ساڵی پێویستە تاکو دەنگەکەی بەسافی دەربێنیت.

داواش لە حکومەت دەکات، کە گرنگی زیاتر بە بواری هونەریی بدات چونکە لە کوردەواریی خۆمان هونەری زۆر جوان و فراوانمان هەیە لە هەموو بوارەکاندا.

سەرابی وێرای بارودۆخی خۆی پەیامی بۆ خاوەن پێداویستییەکانی دیکە و خەڵکانی دیکە ئەوەیە، کە گەر بەهرەیەک یان هونەرێک لە ناخ و هزریاندا هەیە، بتوانن پەرەی پێبدەن و وتی: چیتر بیر لەوە نەکەنەوە کە بە ئازار و دەردی خۆیانەوە، خۆیان و دەوروبەریان ناڕەحەت بکەن خۆیان سەرقاڵی ئامێرێکی موسیقی یاخود کاری هونەری دیکە بکەن، هەم کاتەکە دەڕوات و هەمیش ئاسوودەیی بە ڕۆح دەبەخشێت.