پەخشان عەزیزی

پەخشان عەزیزی ڕۆژنامەنووس و بەندکراوی سیاسی کورد لە بەندیخانەی ئێڤین کە لە ئێستادا سزای لە سێدارەدانی بەسەردا سەپێندراوە، لە لایەن داگای تارانەوە ڕێگری دیداری لەگەڵ پارێزەرانیدا لێدەکرێت.

ڕێکخراوی هانگاو بۆ مافەکانی مرۆڤ بڵاویکردەوە" دوێنێ شەممە ناوەندە ئەمنییەکانی جێگیر لە بەندیخانەی ئێڤینی تاران، لە چاوپێکەوتنی پەخشان عەزیزی، بەندکراوی سیاسی کورد کە سزای سێدارەی بەسەردا سەپێندراوە لەگەڵ هەردوو پارێزەرەکەی، مازیار تاتایی و ئەمیر ڕەئیسیان ڕێگرییان کردووە".

بە وتەی سەرچاوەیەکی نزیک لە بنەماڵەی عەزیزی، دادوەری چاودێری بەندیخانەکە پێیانی ڕاگەیاندووە کە" بە فەرمانی دادوەر ئیمان ئەفشاری دادوەری لقی ٢٦ی دادگای شۆڕشی تاران پەخشان عەزیزی لە مافی چاوپێکەوتن بێبەشە".

ڕۆژی ٢٣ی ئەم مانگە پەخشان عەزیزی لە لایەن لقی ٢٦ی دادگای شۆڕشی تاران بە سەرۆکایەتی دادوەر ئیمان ئەفشاری بە تۆمەتی "ئەندامێتی لەو گروپانەی دژی حکومەتی ئێران شۆڕشی چەکدارییان کردووە" سزای لە سێدارەدانی بەسەردا سەپێندرا، لە ئێستاشدا ڕێگری لێدەکرێت کە لەگەڵ خێزان و پارێزەرەکانییدا چاویان بە یەکتر بکەوێت.

پەخشان عەزیزی، داکۆکیکاری مافی ژنان و ڕۆژی ٤ـی ئابی ٢٠٢٣ لە شارۆچکەی حەرازی تاران، لە ڕێکەوتی ١١ـی کانوونی دووەمی ٢٠٢٣، دەستبەسەر کرا و گواسترایەوە بۆ زیندانی ئەوین.