نەجمەدینی غوڵامی

ژیاننامە

له‌ خوێندنگاى (شه‌كیبا) له‌گه‌ڕه‌كی چوارباخی شاری سنه‌ ده‌ستى به‌خوێندن كردووه‌.

مامۆستاى وانه‌ی سروود هونه‌رمه‌ند (عه‌لای‌ بابه‌شه‌هابی‌)، كه‌ یه‌كێكه‌ له‌ ‌بنه‌ماڵه‌ی‌ سه‌ید عه‌لی‌ ئه‌سغه‌ری‌ كوردستانی‌، له ‌ڕۆژی‌ یه‌كه‌مى خوێندنى وتویه‌تى ده‌نگی خۆشه و توانای گۆرانی وتنى هه‌یه‌‌، به‌رده‌وام له‌ خوێندنگاكه‌ى گۆرانی پێ وتوه‌ و باشترین نمره‌شی پێداوه‌.

یه‌كه‌م گۆرانی له‌ناوى (شه‌ده‌ ده‌ڕۆی بۆكانی) هونه‌رمه‌ند (حه‌سه‌ن زیره‌ك)ى له‌ خوێندگاكه‌ى وتۆته‌وه‌.

جگه‌ له‌ وتنى گۆرانى هه‌وڵیداوه‌ خۆی فێری ژه‌نینی ئامێری ده‌ف بێت تا فێریووه‌.

له‌ ساڵى 1973 له‌ ته‌مه‌نی (15) ساڵیدا، هونه‌رمه‌ند (عه‌باسی كه‌مه‌ندی) كاتێك گوێى له‌ گۆرانى ناو كاسێتێكی ده‌بێت و پێى سه‌رسام ده‌بێت و هانى ده‌دات بچێته‌‌ رادیۆ و گۆرانی‌ تۆمار بكات.

هونه‌رمه‌ند عه‌باسی كه‌مه‌ندی هانى زۆرى داوه‌ بۆ ئه‌وه‌ى له‌سه‌ر گۆرانى وتن به‌رده‌وام بێتى و له‌گه‌ڵ خۆیدا بردویته‌ بۆ‌ كۆشكی لاوان و ڕادیۆ و ته‌له‌فزیۆنی سنه‌ و گۆرانی بۆ تۆمار كردووه‌.

لە ساڵى 1976 له‌ تەمەنی (18) ساڵى لە ڕێگەی ڕادیۆی سنە و کرماشانەوە دەستی بە گۆرانی وتن کردووە و یه‌كه‌م به‌رهه‌می خۆی به‌ناوی (نازدار و نازدار) له‌كۆشكی لاوانی سنه‌ به‌هاوكاری هه‌ردوو هونه‌رمه‌ند (ئیقباڵی حاجبی و فه‌روخی ڕه‌یاحی) تۆماركردووه‌.

سه‌ره‌تا به‌لاسایی كردنه‌وه‌ی گۆرانی گۆرانیبێژه‌كان ده‌ستپێكردوه‌، دواتر توانیویه‌تی ڕێچكه‌یه‌كی هونه‌ری بۆ خۆی بدۆزێته‌وه‌.

له‌یه‌كه‌م به‌رهه‌میدا ئاوازى بۆ هۆنراوه‌یه‌كی (وه‌فایی) به‌ناوی (نه‌خۆش و مه‌ستی دووچاو كاڵم) داناوه‌.

له‌ ساڵى 1984 له‌ یه‌كه‌مین سه‌فه‌ریدا بۆ شارى سلێمانى به‌ نهێنى گۆرانی ئاگراوی (ئارام)ى تۆماركردووه‌، ناوی ئارام بەبۆنەی شەهیدبوونی (شاسوار جەلال) ناوناوه‌.

لەو سەردانانەیدا بۆ بۆ شاری سلێمانی چۆتە دیدەنی زۆر لەهونەرمەندان و شاعیران، له‌وانه‌: (دلشاد مەریوانی، كاكە حەمە عەزیز، عوسمان عەلی، خالید دلێر و ..... هتد).

لە ساڵی 1986 ئه‌لبومى (هەڵاڵەی كوێستان)ى بەیارمەتی تیپی موزیكی مەولەوی تۆماركردووه‌.

له‌ دوای شۆڕشی گەلانی ئێران چەندین سروودی شۆڕشگێڕانە لە شاری سنە تۆمار کردووه‌.

لە کاتی شۆڕشی ئیسلامی ئێران لەگەڵ کۆمەڵە ھاوکاری کردووە و بۆ ماوەی (8) ساڵ پێشمەرگە بووە.

دواتر روى كردۆته‌ تاراوگه‌ و لە سوید نیشتەجێ بووه‌ و به‌رده‌وام بووه‌ له‌ كاره‌ هونه‌رییه‌كانى.

تاکو ئێستاکە چەند بەرهەمێکى هەیە، لەوانە:

نازدارو نازدار، 1976.

شەتاو، 1995.

پیری موغان، 1997.

خان و مان، 1998.