مولازم جوامێر

شەهید جوامێر سایەمیر کە ناسراوە بە ملازم جوامێر ساڵی 1948 لە گوندی (کەپراد)ی سەر بەشاری مەندەلی لە دایکبووە.

ملازم جوامێر

لە گوندەکەی خۆیدا دەستی کردوە بە خوێندن و قۆناغی سەرەتایی لەوێ تەواو کردوە پاشان قۆناغی ناوەندی لە خوێندنگەی مەندەلی و ئامادەیی لە شاری بەغدا تەواو کردووە.

ساڵی 1968 پەیوەندی کردووە بە ریزەکانی پارتی دیموکراتی کوردستانەوە، ساڵی 1972 کۆلێژی سەربازی بە پلەی یەکەم تەواو کردووە و بووە بە ئەفسەر.

ساڵی 1973 بووە بە پێشمەرگە لە بەتالیۆنی شەشی خانەقین، ساڵی 1975 پەیوەندی کردووە بە کۆمەڵەی رەنجدەرانی کوردستانەوەو ساڵی 1976 بەشداری چالاکییە پارتیزانەکانی کردووە لە ناوچەی شارباژێڕ و قەرەداخ.

ساڵی 1977 بووە بە بەرپرسی سەربازی رێکخراوی هەڵۆی سوور کە هەموو چالاکییەکانیان لە ناوشاری بەغدا ئەنجام دەدا.

شەهیدانی هەڵۆی سوور

لە کۆتایی ساڵی 1977دا و بە هۆی ئاشکرا کردنی ئەندامانی رێکخراوەکە لەلایەن بەکرێگیراوانی رژێمەوە، ملازم جوامێر و چەند هاوڕێیەکی لەلایەن کاربەدەستانی رژێمی بەعسەوە دەستگیرکران. بەهۆی ئازایەتی و لێهاتوویی خۆیەوە توانی لە زیندان هەڵبێت، بەڵام بەداخەوە نەیتوانی رزگاری بێت و دووبارە دەستگیر کرایەوە.

دواتر لە دادگایی کردنێکی نا دادپەروەرانەدا ملازم جوامێر و هاوڕێکانی فەرمانی لە سێدارە دانیان بەسەردا دراو رۆژی 10ی نیسانی 1978 حوکمەکە جێ بەجێ کراو ئەم پۆلە تێکۆشەرە چاو نەترسانە گیانی خۆیان بەخت کردو چوونە ریزی شەهیدانی رێگای رزگاری کوردستان و ئازادی گەلی کوردەوە.

مەلا بەختیار ئەندامی وەفدی دانوستاندکاری کورد لەگەڵ رژێمی عیراق (1984) دەگێرێتەوە (فازڵ بەراک) بەڕێوەبەری ئەمنی عیراق بە مام جەلالی ووت: مام جەلال تۆ ملازم جوامێر دەناسی، سەلمان دەناسی؟ مام وەڵامیدایەوە: نەخێر نەمدیون، بەڵام ئەوانە قارەمان و شەهیدی ئێمەن. فازڵ وتی: دەمەوێت راستییەکی مێژوویت پێ بڵێم. مام وتی: فەرموو. فازڵ وتی: مێژووی ئەمنی ئێراق، قارەمانی وەکو ئەمانەی بەچاوی خۆی نەدیووە.

ئێوە سەیری ئەم میدالیایە بکەن. سەیری ئەم شەرەفە مێژووییە بکەن.

بەڕێوەبەری ئەمنی عیراق، بەسکرتێری یەکێتیی، فەرماندەی گشتی هێزی پێشمەرگەی کوردستان دەڵێ : مێژووی ئەمنی عیراق، قارەمانی وەکو ملازم جوامێرو شەهید سەلمان و شەهید جەمال و شەهیدی شێرۆی بەچاوی خۆی نەبینیوە. ئەوەندە قارەمان بوون، ئەسڵەن ئێمە لەوان دەترساین. بەڕاستی جێی شانازین، درود بۆڕۆحی پاکیان.