سه‌ڵاح خدر بلباس
هونەرمەندی گۆرانیبێژ سەڵاح خدر بڵباس، ناوی تەواوی سەڵاح خدر ئیسماعیل حەسەنە و لە ساڵی 1954 لە شاری شاری هەولێر لە دایک بووە. یەکێکە لە گۆرانیبێژە دەنگ ڕەسەنەکان و کاتێک بەناوبانگ بوو کە گۆرانی (ساڵەهای ساڵە کە من ئەشقی تۆم) بڵاو بووە و بوو بە یەکێک لە ئەستێرە دیارەکانی سەردەمی خۆی.
هەر چەندە بەداخەوە زانیارییەکی ئەوتۆ لەسەر ژیانی نییە.. بەڵام ئەوەی دەزانرێت ئەوەیە کە لە ساڵی (1977) لە مەڵبەندی لاوانی هەولێر، سەڵاح خدر وەک (شۆفێر) دادەمەزرێت، لەگەڵ ئەوەشدا بەردەوام دەبێت لە کاری هونەریی. لە ساڵی (1978) تیپی مۆسیقای (شیلان) لە شاری هەولێر دادەمەزرێت، هونەرمەند پەیوەندی بە تیپی مۆسیقای شیلانەوە دەکات و تا ساڵی (1980) لەگەڵیان بەردەوام دەبێت.
هونەرمەند لە ساڵی (1982) پەیوەندی دەکات بە تیپی مۆسیقای (کاروان)، ئەم تیپە مۆسیقایە بە سەرپەرشتی هەر دوو هونەرمەند (شێرزاد عوزێری و نەجمەدین بابەکر) دادەمەزرێت.
یەکەم بەرهەمی هونەرمەند سەڵاح خدر بڵباس ساڵی 1984 تۆماری دەکات، گۆرانی (ساڵەهای ساڵە) بوو. کە هۆنراوە و ئاوازی گۆرانییەکە هی هونەرمەند (ڕزگار خۆشناو) بوو هەر بۆیە بەو گۆرانییە هونەرمەند خۆی ناساند، گۆرانی دووەم بەناوی (یارەکەم چاوی شینە)، لە هۆنراوە و ئاوازی هونەرمەندی ژەنیار و گۆرانیبێژ (قادری سەیاحی) بوو، دوای بڵاو بوونەوەی ئەو دوو گۆرانییە ناوبانگی دەرکرد و لەناو جەماوەردا ناسرا.
کۆچی دوایی:
مخابن ئەم هونەرمەند لەڕێکەوتی 09/05/1995 لە شاری دهۆکەوە دەگەڕێتەوە بەرەو هەولێر لەنێوان دهۆک و ئەتروش، ئۆتۆمبێلەکەی وەردەگەڕێت و گیان دەسپێرێت و بۆ هەمیشە ماڵئاوایی لە ژیان و خانەوادە و ئازیزانی دەکات..
ئاماده كردنی: دلێر ڕه‌فیق