عەباس ئەبو شوارب

عەباس مەحمود ئەحمەد ناسراو(عەباسی ئەبوشوارب) لەساڵی 1937 لەشاری سلێمانی لەدایکبووە و یەکێکبووە لەکەسایەتییە ناودارەکانی سلێمانی.

ئەو پیاوە ساڵی 1948 دەستی بە کەبابچێتی کردووە وەک (شاگرد) لای وەستا (مامەلی) لە بازاڕی سەڕاجەکان.

ناوبانگی عەباس تەنیا بەهۆی كەبابەكەیەوە نەبووە، بەڵكو ئەو بە قسە خۆشەكانی و هەستە نیشتمانپەروەرییەكانی زیاتر سەرنجی خەڵكی بۆلای خۆی راكێشاوە.

لە ئاهەنگەكانی جەژنی نەورۆزدا بە جلی كوردییەوە نمایشی دوانزە سوارەی مەریوانی كردووە.

چەند ساڵێك پێشمەرگایەتی كردووەو لە چەند كارێكی هونەریشدا بەشداریی كردووە.

هاوژین عەباس، کوڕی عەباس ئەبوشوارب، باسیکردووە کە باوکی لە ساڵی 1963 تا 1974ەوە ڕوویکردووەتە شاخ و پێشمەرگایەتی کردووە، پاشان لە 1974ەوە تا 1980 دووبارە هاتووەتەوە سەر پیشەکەی، دواتریش لە 1980 تا 1983 لە شاری بەغدا کەبابخانەی داناوە و لە 1983یشەوە گەڕاوەتەوە سلێمانی.

تا ئەو كاتەی تووشی نەخۆشییەكی سەخت دەبێت لەسەر پیشەی كەبابچێتی بەردەوام بووەو ساڵی2014 لە سلێمانی كۆچی دواییكردووە.