یوسف عیزەدین
لەدایکبووی شاری سلێمانییە و لەپاش راپەڕینەوە بابەتی بڵاوبۆتەوە..
یەکەمین بابەتی نووسراوی رۆمانێک بووە، کەپاش دەسگیرکردنی لە1990لەلایەن ئەمنەکانی مودیریەتی ئەمنی سلێمانییەوە، دەستنووسی ئەو رۆمانەی لەگەڵ چەندین کتێب و وێنە و شتگەلێکی دیکەی شەخسیدا بۆ هەتاهەتایە تێدا چوون.
شایەنی باسیشە پاش ئەوەی بڕیاری گوللةبارانکردنی نووسەر و کۆمەڵێک لەهاوڕێ زیندانییە سیاسییەکانی نێو ئەمنە سوورەکە لەلایەن رژێمەوە دەدرێت و بەپێی بڕیارەکە دەبوو نووسەر و هاوڕێیەکانی بەبۆنەی نەورۆزەوە و لە 21-03-1991 دا و دەستە دەستە لێرەو لەوێی شاری سلێمانی گوللة بارانبکرێن، کەچی قەدەر وا دەخوازێت جەماوەری ستەم دیدەی کورد هەر لە4-5ی ئازاری ئەو ساڵەوە رابپەڕن و ئیدی لەرۆژی 08-03-1991 شاڵاو بۆ ئەمنەسوورەکە بەرن و بتوانن لەنیوەڕۆێ ئەو رۆژەدا خۆشبەختانە سەرجەم زیندانە سیاسییەکان ئازادبکەن، کەیوسف عیزەدین یەکێک بوو لەزیندانییەسیاسییە ئازادبووەکان و بەشداربووی ئەو رۆژە مێژووییەی کەقەدەر ویستی ئەو بکاتە شایەتێکی زیندووی ئەو ساتەوەختە؟!
نووسەر دەتوانێت بەزمانەکانی کوردی وعەرەبی و تورکی و ئینگلیزی و فارسی بخوێنێتەوەو بە سێ زمانیشیان بەباشی بنووسێت و نموونەی تێکستی نووسرایشی بەو زمانانە هەیە.
زۆر بابەتی وەرگێڕدراوەتە سەر زمانەکانی دیکەی دنیا و بڵاوبوونەتەوە، هەر بۆنموونە نووسەری بەتوانای بەڕەچەڵەک کوردی ئێرانعەلی ئەشرەف دەروێشیان نووسینی ناوبراوی کردۆتە فارسی..
نووسەر و وەرگێڕیش بۆ زمانی ئەڵمانیپێشەوا فەتاح وێڕای وەرگێڕانی غەزەلنووس و باغەکانی خەیاڵ ی بەختیار عەلی رۆمانی ماجەراکانی سەلمانی فارسی یوسف عیزەدین-یشی کردۆتە ئەڵمانی و بەنیازە لەگەڵ دابین کردنی دەزگایەکی چاپی ئەڵمانی کەبابەتی وەرگێردراولە کوردی یان زمانی رۆژهەڵاتییەوە بۆ ئەڵمانی چاپبکات، لەئەڵمانیا بە چاپیان بگەیەنێت.
لەم ماوەیەشدا نووسەرێکی ناسراوی مەغریبی بەڕەچەڵەک ئەمازیغیی کەناوی سەعید بەلغەربیە، کۆمەڵێک تێکستی زۆری نووسەری کردە ئەمازیغی و لەزۆرێک لەرۆژنامە ئەدەبییە ئەمازیغییەکانی ناوەو دەرەوەی وڵاتی مەغریب بڵاوبوونەوەو دواجاریش قەولە بەفەڕەنسی لەداهاتوودا هەمان ئەو کۆمەڵە تێکستە بڵاو ببنەوە، سەرباری چاپکردنیان لەدوو توێی کتێبێکدا بەمەبەستی ناساندنی زیاتری تێکستەکانی نووسەر بەخوێنەرانی دنیا و سەرباری چەندین پڕۆژەی تری نووسەرانی غەیرە کورد لەگەڵ نووسەر کەلەبەردەستدایەو مەترەحە، وەک داواکاری کردنە فیلمی یەکێک لەتێکستەکانی نووسەر بەناوی خورافاتی چاویلکەکەی باپیرم کەدەرهێنەرێکی مەغریبی- ئەمازیغی بەئەمازیغی خوێندوویەتییەوەو مەبەستیەتی تێکەڵەیەک لەسیناریۆیەکی ئەفسوونئامێزی کوردی و ئەمازیغی لەمیانی ئەو تێکستەوە بنووسرێتەوەو بۆ یەکەمین جار کارێکی لەو چەشنە هاوبەشە بکرێتە فیلم.
شایەنی باسیشە کەساڵانێکی دوور و درێژە نووسەر تەنها سەرقاڵی خوێندنەوەو نووسینی رۆمان و لێکۆڵینەوەو لێتۆژینەوەی ئەدەبی و فیکرییە، سەرباری هەندێک هەوڵی جەستەیی و رۆحی لەمیانی مەشقکردنەوە بۆ رۆچوونە نێو بیرۆکەو هزرە دێرینەکانی وەک بودیزم و تاوییزم و هەندێک لەقوتابخانەکانی سۆفیزم و تاد..
کتێبە چاپکراوەکانی نووسەر
دیوێکی دیکەی حیکایەتە نەنووسراوەکان/رۆمان/چاپخانەی شڤان-سلێمانی2006
تەنها ڕۆژێکی سارد/رۆمان/دەزگای موکریان/هەولێر/2008
پێخەفێک لەخوێن/هونەری گێڕانەوە/دەزگای ئاراس/هەولێر/2008
ماجەراکانی سەلمانی فارسی/رۆمان/یانەی قەڵەم/سلێمانی2009
وێڵگەی یادەوەرییە گریمانکراوەکان/ رۆمان/بەڕێوەبەرایەتی چاپ و بڵاوکردنەوەی سلێمانی/2009
وەهم و شوناس/ گفتوگۆو وتار/چاپخانەی یاد/ سلێمانی/2012
کۆتاییەکان/ئەنفارار/ هونەری گێڕانەوە-سردیات/بەزمانی ئەمازیغی-دار کەبەدانی-مەغریب