نەوزاد شێردڵ
نەوزاد شێردڵ شێردڵی ( ئيمپراتۆری ته‌نيايی ) ، يا ( مه‌حموود ده‌روێشه بێ نازه‌کەی کورد ) ، يا دووژمنه‌که‌ی شوهره‌ت و هتد ، وه‌ک هاورێکانی زۆر ناز ناوی تريشيان لێ ناوه.
ساڵی 1964 لە گەڕەکە وه‌جاخ ڕوونه‌که‌ی کانێسکان لە شاری سلێمانی لە خێزانيکی موراڵ کۆکتێلی، ئايينيی، عيلمانيی لە دایکبووە.
وه‌ک خۆی وه‌سفی ئه‌کات ئه‌م دۆزه‌خه شيرينه‌ی ژيانه‌وه‌و له‌سه‌ر ڕاسپارده‌ی ته‌له‌فونێکی مامی خۆی کاک (ئه‌مين مه‌ولوود)ی که‌سايه‌تی ناسراویشارەکە ئه‌وده‌م له زانکۆيه‌کی ئه‌مريکی خوێندکاری باڵای( ئيداره و ئابووری) بووه ناو ئه‌نرێت نه‌وزاد ، شێردڵی ( جيوه‌ی که‌موله‌ی ئه‌ده‌ب و هونه‌ر !! ) خه‌تمی قورئانی پيروز و علومه به‌يسکه‌کانی صرف و نه‌حو به‌سه‌رکه‌وتوويی له حوجره به‌ناوبانگه‌که‌ی مه‌لا خدری کانێسکان و له پاڵيشه‌وه خوێندنی سه‌ره‌تايی له قووتابخانه‌ی کانێسکان و نه‌ورۆزو ناوه‌ندی کۆماريی و دوا ناوه‌ندی سلێمانی سه‌رکه‌وتووانه‌تر ئه‌برێت و به ئاواتی ئه‌وه‌ی وه‌ک قوتابييه‌کی کۆليژی پۆليس و دواجارييش وه‌ك ئه‌فسه‌رێکی هاتووچۆ به‌رنامەيه‌کی ئه‌کاديمی بخاته سه‌ر شاشه‌ی تی ڤی به‌ڵام هۆکاريی به‌عسی نه‌بوونی که خۆی ڕاشکاوانه‌و بێ خۆخه‌له‌تاندن ئه‌لێت :- ئەگه‌ر ئه‌مزانی ڕوژێك دێت وه‌ك ئه‌مڕو جياوازيی به‌عسی بوون و نه‌بوون ته‌نها وه‌ك سمێڵ تاشين يا نه‌تاشين حيسابی بۆ ئه‌کرێت و به‌س، ئه‌وا به‌هه‌ر ده په‌نجه‌که‌م مۆرم ئه‌کرد، و به‌دزی حه‌مه نمره‌یه‌کی باوکه تراديسيوناليزميه‌که‌مه‌وه که ووشه‌ی عاره‌بيی له ماڵه‌وه‌ماندا قه‌ده‌غه کردبوو وه‌ك ده‌يان هاوڕێی خۆشه‌ويست دواجار ئه‌فسه‌رم له‌به‌رخاتری ده‌سته‌سرێك قه‌يسه‌رييه‌ك ئاواتی خۆم نه‌ئه‌کرده قه‌قنه‌س.
مه‌به‌ستی ئه‌و له‌دڕاندنی ديپلومه‌که‌يه‌تی به‌ده‌ستی ره‌فيق – ش – ی مه‌عاريفی دوێنيی شۆفينيزم و هه‌ڤاڵی تێکۆشه‌ری ئه‌مڕۆی کوردينيزم،، که‌بەته‌وسه‌وه پێی ئه‌ڵێت :- ده بڕۆ با مامه شێخه‌که‌ی دارۆغات و مامه ماويزمه‌که‌ی مه‌نفای روماديت بتکه‌نه ئه‌فسه‌ر.
کاک مه‌حموودی ڤينوس و چه‌ند کاديرێکی تری گرووپێکی راگه‌ياندنی ڕاپه‌رينی گه‌ل ئه‌گێڕنه‌وه :- به‌ر له‌وه‌ی کاك شێردڵ بکرێته لێپرسراوی ئه‌رزاقی ئه‌زمه‌ر له کۆره‌وه‌که‌دا ، ( به‌ره ی تێکوشه‌ر ) کردبوويه لێپرسراوی گرووپی ڕاگه‌ياندنه‌که‌ی ئێمه و کاتێک به سوودفه ره‌فيق – ش – ی تۆقيووی به ده‌ست کوڕو کيژيی چه‌کداريی نه‌وه‌ی ده‌يان- حاجی ئه‌نوه‌ری – پێشه‌نگی راپه‌رينه‌وه بينی زۆر به ئوسووڵه‌وه پێی ووت :- له ئه‌رشيفی په‌روه‌رده‌دا هه‌موو خه‌لفياتی رۆشنبيرێتم سۆراغ خواردو ديپلۆمی پۆلی پێنجی سه‌ره‌تاييشتم نه‌دی تا هه‌ق به هه‌ق ئێستا منيش بيدڕێنم به‌ڵام به‌م کامێرا کۆداکه وێنه‌يه‌کت ئه‌گرم و که تۆخ بووه‌وه که‌مێك له‌ته‌ڕايی ژێر زنجيريی پانتۆڵه زه‌يتوونيه‌که‌ت وورد به‌ره‌وه و دواجاريش بڕۆ با ميتشيل عه‌فله‌ق بتکاته فه‌راشی – تربية.
شێردڵ که هه‌ر به زگماکيی و بۆ ئه‌به‌د هه‌ميشه پامووره‌ی خه‌مه سوورياليه‌کان له گوێيدا ئه‌زرنگێته‌وه به ڕه‌وشێك ئيدمانی خوێندنه‌وه‌و موتاڵا بووه هه‌ڕه‌شه‌ی چوار زرمه‌ی دار حه‌يزه‌رانی مامۆستای ڕێزمانی عه‌ره‌بی پۆلی شه‌شه‌می سه‌ره‌تايی ئه‌بێته شاهيدی يه‌که‌م سه‌رهه‌ڵدانی پلووسکه خوری زيره‌کيی ئه‌م مێرد منداڵه که به هۆی نووسينی ئينشايه‌کی دوو لاپه‌ڕه‌يی زۆر ده‌گمه‌ن له سه‌ر بابه‌تی په‌نده‌که‌ی – أتق شر من أحسنت أليه – و ئينجا ته‌رجه‌مه کردنيشی بۆ کوردی ، سه‌رئه‌نجام له نێوان سوێند له‌م که زاده‌ی قه‌له‌می خۆيه‌تی و ئينکاريی مامۆستا که گوايا باوکی بۆی نووسيبێت و دوای مفاوه‌زاتێك و پشتگيريی هه‌ر يه‌ك له مامۆستايان وليه‌م يوحه‌ننا ئه‌فه‌ندی که سه‌رپه‌رشتکه‌ری ساڵانێکی زۆر کاری هونه‌ری ميوزيک و سروود و گۆرانی و مامۆستاو باوک (عه‌لی عومه‌ر ئه‌فه‌ندی) مێووژی ڕه‌شی نايابی قوڵينه‌ی ئه‌مينی ووشه‌ی پيرۆزی کوردی و ده‌ستگريی کاری وێنه‌و خه‌ت و شانۆ و م . ڕه‌ووف عه‌لاف ئاوێزانی ڕێزمانی پيتی به به‌ره‌که‌ت و پاسه‌وانی په‌ڵه گه‌نم له زێوانی سه‌حرا و ، م . که‌مال ئه‌فه‌نديي که هه‌ميشه ترافيکی سه‌وزی له لايه‌ن به‌ڕێوه‌به‌ری چاو نه‌ترس و تا سه‌ر ئێسقان کورد په‌روه‌ر – ئه‌حمه‌د مه‌عروف مۆرياسه‌وه بۆ هه‌ڵکرابوو تا به گرمه‌ی ئه‌و سروودانه‌ی که هه‌زاران شێردڵی غه‌ريب و سه‌دان شه‌هـيد و ئه‌ديب و هونه‌رمه‌ند و کادێر و سه‌رکرده‌و وه‌زير وديبلوم باڵای ئه‌مڕۆی هه‌رێمه فيدراڵه‌که‌مان به‌بێ هه‌ڵکردنی ئاڵای عروبة ديسانه‌وه گشت سبه‌ينانێک سه‌ربازه‌کانی کارگه‌ی جگه‌ره‌ی زياتر ئه‌تۆقان.
بەڵی پشتگيريی ئه‌م منه‌وه‌رانه و چاوديريی به‌رده‌وامی مامۆستاکانی تريش له‌به‌هره‌ی شێردڵی مێردمناڵ هۆکارێکی گرنگ ئه‌بن له گۆرينی ياسای چوار داره‌که بۆ چل نمره به‌خشيشی ئه‌و سەره‌تا خۆ ناسينه‌ی نه‌وزاد و له‌وه به‌دواش وه‌ک هانده‌رێک هێنده‌ی تر به‌ره‌و قووڵايی موتالای زياتر شۆڕی ئه‌که‌نه‌وه ،، / نه‌وزاد شێردڵ سه‌رباريی به‌شداريی دانه‌بڕاوی هه‌موو چالاکييه‌کانی قوتابخانه هاوکات له گه‌ڕه‌کی دووه‌می خۆيان – چوارباخ – چه‌ندان کاری شانۆييان بۆ خه‌ڵکی گه‌ره‌که‌که ئه‌نجام داوه و يه‌که‌م بيرۆکه‌ی شانۆی (قه‌ره‌ج)ی له ناو جه‌رگه‌ی ڕه‌شماڵی قه‌ره‌جه‌کان خۆياندا وبه سيناريۆيه‌کی هاوچه‌رخانه له ته‌مه‌نی هه‌ژده ساڵيدا به‌رهه‌م دێنێت.
ئه‌گه‌رچی وه‌ک شانۆنامه‌يه‌کی مۆڵه‌ت پێدراو له ئه‌رشيفدا نه‌پارێزراوه به‌ڵام بۆ که‌سێک که له کورسيی ئه‌کاديميادا دانه‌نيشتبێت و ئه‌رکی پرۆفه پێکردنی زياد له بيست ئاکته‌ری گه‌نج و عه‌شاماتێك قه‌ره‌ج بگرێته ئه‌ستۆ و به جۆرێک به‌ناو يه‌کدا تێکه‌ڵيان بکات که نه له لايه‌ن پۆليسه‌کان و ميوانه‌کانيشه‌وه نه‌زانرێت کامه ئاکته‌ره‌و کامه قه‌ره‌جه ئه‌سڵه‌که هه‌ڵبه‌ته وه‌ك هه‌نگاوێکی ئێجگار ئه‌کادييمی مه‌عريفيی هاوچه‌رخ ، ته‌نانه‌ت له ڕووی کۆنترۆڵ و سايکۆلۆژييه‌تی کاری ئيداريشه‌وه بۆ سه‌ره‌تای هه‌شتاکان له سه‌ر وه‌ستانێکی زۆر له خۆئه‌گرێت که‌زۆر له‌م ئه‌رکه‌ی کۆنترۆڵی وگرافيای سته‌يج و چه‌ندايه‌تی ئاکته‌ره‌وه زۆرمان له نه‌وزاد شێردڵی سه‌ربازی وونی زۆر بوار ديوه به‌تايبه‌ت شانۆگه‌ريی (پسووڵه‌ی گه‌ڕانێکی خوێناوی)له هه‌ردوو شاری شه‌مزينان و سلوپيای باکووڕی کوردوستان که جگه له ئه‌رکی نووسين و ده‌رهێنان و هتد ..
کۆنترۆڵێکی ژيرانه‌ی به‌رنامه‌رێژی بۆ زياتر له شه‌ست و هه‌شت ئاکته‌رو ئاپوره‌يه‌کيش له کومبارسان و سوپايه‌ک ستافی هه‌ڵسوڕێنه‌ری کاره‌که‌ی زۆر هارمۆنيانه و بێ هيچ شان له شانی يه‌کترکه‌وتنێك خوڵقاندبوو.
له‌و کارانه‌ی نه‌وزاد شێردڵی رۆشنبير و دڵسوزی نه‌ته‌وه‌که‌مان و هاوڕێی سه‌رجه‌م ڕۆشنبيرانی گه‌لانی تر که لێره‌دا ده‌ستی زاکيره‌مان به سه‌ر تۆمار کردنياندا بشکێت ،سه‌رباری که‌م و کوڕی زۆرمان له هه‌ڵه‌ی ناو ياخووت رێکه‌وت و شوێن ئه‌مانه‌ی خواره‌وه‌ن که وه‌ک وه‌فايه‌ک بۆ ئه‌م نووسه‌رو هونه‌رمه‌نده ده‌ست و دڵ پاکه‌ی که به‌رده‌وام و له جاران به گووڕ تر له خزمه‌ت کردندايه‌و له‌وه‌ش گه‌ڕێين که چ قه‌له‌مێکی هه‌ميشه هانده‌ر وپشت گيريی هه‌مووانه بێ جياوازيی و داواشمان له ئێوه‌ی خوێنه‌ری ڕۆشبير ئه‌وه‌يه ئه‌گه‌ر هه‌ر تێبينی و گوزارشت و ڕاست کردنه‌وه‌ی هه‌ڵه و چالاکييه‌کی هه‌مه چه‌شنه‌ی تری کاك نه‌وزادتان لا هه‌بێت ئاگادارمان بکه‌ن ، جێگای ڕيزو پێ زانينمانه:-
1 – پێشانگای دووه‌می شيعر و وينه‌ی فۆتۆگرافی ژيان و شۆڕشی مه‌ليك مه‌حموودی حه‌فيد ،،به‌هاری 1986 ، هۆڵی مۆزه‌خانه‌ی سلێمانی، شايانی ووتنه ، ئه‌م پێشانگايه دوای چوارده ڕۆژی سه‌رلێو له ميوان و پشتگيريی ته‌واوی به‌ڕێزان ، مامۆستا شێخ نه‌وڕه‌س به چاپ کردنی مۆدێرن ترين ديزاينی – سه‌دان ده‌ليلی بێ به‌رامبه‌ری مادی و به‌خشينی کاتيی – خه‌نجه‌ر و ته‌زبێحه‌که‌ی حه‌زره‌تی مه‌ليک له لايه‌ن پايه‌دار کاک شیخ سالاری محامی و ،، به‌شداريی مامۆستای هونه‌رمه‌ندی په‌يکه‌رتاش شێخ موسته‌فای به‌رزنجی به باس و لێکوڵينه‌وه‌ی به نرخ بۆ ميوانان وکه‌شف کردنی وینه‌ی ئه‌و په‌يکه‌ره مه‌زنه‌ی حه‌زره‌تی مه‌ليک که دواجار تاوانبار له‌تيف نصه‌يف جاسمی وه‌زيری رۆشنبيريی به بيانووی له برۆنز گرتنی برديه به‌غدا و تێکی شکان ، وه به‌شداريی به بايه‌خی به‌رێز کاك فه‌ره‌يدوونی حاجی که‌ريمی بازرگان به تابلۆيه‌کی ديواريی 150 / 130 سم ،، هاوکاری زۆر به‌رێزی تر که کاك شیردڵم ده‌ست نه‌که‌وت تاکوو ناوه‌کانيان بزانم ،، دواجارو له ڕۆژی پانزه‌هه‌مدا له لايه‌ن – گه‌وره لێپرسراوی به‌عس — به ناوی ياسر – و جێگری به‌ڕيوه‌به‌ری ئه‌منه‌وه هه‌موو تابلۆ و وێنه‌کان تێك شکێنران.
2 – شانۆگه‌ريی – ده‌هۆڵ و زوخاو – نووسين و ده‌رهێنان ، هۆڵ و هونه‌رمه‌ندانی تيپی ناسراوی ميليی سلێمانی ،، جۆڵای 1985
3 – فيستيفاڵ و پێشبڕکێی باشترين بێژه‌ری کوردو عاره‌بی عێراقيی/پشت مايکرۆفۆن ،/ ئاهه‌نگ/ بێژه‌ريی وه‌رزش/ فوتباڵ ،، هتد .. زاخۆ ، / شێردڵ له‌و پێشبرکێيه‌دا به‌يه‌که‌می کوردوستان و سێيه‌می عێراق ده‌رچووه،1982
4 – نووسينی شانۆگه‌ريی – ژه‌هر له شووشه‌ی گوڵاودا – ده‌رهێنانی هونه‌رمه‌ند – عه‌باس ژاژڵه‌يی – 1987 ئه‌يـپرل ، هۆڵ و هونه‌رمه‌ندانی ناسراوی تيپی ميليی سلێمانی
5 – ئاماده کردنی شانۆگه‌ريي — من مرۆفم ؟ – هۆڵی ئاماده‌يی سلێمانی هونه‌رمه‌ندانی تيپی ئاسۆ،/ ئــۆگه‌ست،،1985
6 – ێيشانگای تايبه‌تيی يه‌که‌می – ووشه و ڕه‌نگ – به هاوکاريی هونه‌رمه‌ندی ته‌شکيليی جوانه‌مه‌رگ شه‌هيد(نزار محەمەد)ی برای، هۆڵی مۆزه‌خانه‌ی سلێمانی، به‌هاری،، 1988وه به چاودێريی و پشتيوانيی ته‌واوی شه‌هيدی قه‌ڵه‌مه سه‌رکه‌شه‌کان(دڵشاد مەریوانی) هه‌ميشه زيندوو.
7 – سيناريۆ و نوسين و ده‌رهێنانی يه‌که‌م کورته فليمی کوردی – ســۆراخ – / ئاسۆ و هونه‌رمه‌ندانی تيپی ئاسۆ ، فێبروه‌ريی 981 1 ، ئه‌م کورته فليمه به‌ر له کۆتايی له به‌شی ڕه‌قابه‌ی ئه‌من سووتێنرا.
8 – نووسينی شانۆگه‌ريی — ڕاستی وون نابێت — ئاماده‌يی ئه‌لکترۆنی سلێمانی / ده‌رهێنانی فليمسازی لاو شێرزاد قادر ئه‌مين ،، سێپتێمبه‌ر / 1987
9 – نووسينی زنجيره درامای ته‌له‌فيزۆنی — خـه‌نده و دوو لێوی ماته‌م — جينيوه‌ری 989 1، دوای ڕاپه‌رين دابه‌زيوه، به‌ئومێدين ناوی ده‌رهێنه‌ر بزانين که‌هونه‌رمه‌ندان، ته‌نها ناوی هونه‌رمه‌ندی گه‌وره عومەر چاوشین و جه‌مال شه‌ريفمان لايه.
10 – نووسين و ده‌رهێنانی شانۆنامه‌ی — گۆرانی بۆ ئاشتی بڵی — شانۆنامه‌يه‌کی پانتوميمی ئينگليزييه ،هۆڵی – يونايتد چيرچ – کيچنه‌ر – ئونتاريو ، ئوکتوبه‌ر 996 1 ،، له هه‌ر نه‌يشنێک باشترين ئاکته‌ری ژن و پياو له لايه‌ن کاک شێردڵ خۆيه‌وه هه‌ڵبژێردراوه و بۆ که‌ناڵی 40 ی برافۆی که‌نه‌ديي تۆمار کراوه ، به‌شداری کورد پيانۆ ژه‌نی به توانا – کاک ئه‌حمه‌د مه‌خمووريی — بووه ، خه‌ڵاتی ڕه‌مزی دابه‌ش کراوه و باشترين ئاکته‌ر کچه — پرۆفيشينالێکی بالييه ی چاينی بووه.
11 – نووسين و ده‌رهێنانی شانۆگه‌ريی — پسووله‌ی گه‌ڕانێکی خوێناوی — شه‌مزينان و سلوپيا ،، ويلايه‌تی شه‌رناخی داگيرکراو ، / نمايشه‌که به قه‌دپاڵی چيايه‌که‌وه بووه له ئاسمانێکی کراوه‌دا ،، مارچی 992 1تيپی شانۆی لالۆ ڕه‌نجده‌ر ، به هاوکاريی چه‌ند ئه کته‌رێکی ناسراوی تيپی شانۆی شاخ ، زۆر له هونه‌ر دۆستان و کامێرا مانی کوردو بێگانه‌ی ئه مريکاو ئه‌وروپا وێنه‌يان گرتووه ، له ئه مريکا مونتاژ کراوه‌ته‌وه ، جگه له ئه‌کته‌ری کورد ،، ئه‌کته‌رانی عه‌ره‌ب و تورکومان و کلد ئاشوور و هتد.. ژن و پياو به‌شدارييان تيا کردوه و خه‌ڵاتی — يو ئين — ی هه‌يه.
12 – سه‌رپه‌رشتی و به‌شداريی پێشانگايه‌کی به‌ر فراوان ،، تابلۆ / شيعر / په‌خشان / ئيشی ده‌ست / به‌هره‌ی مناڵانی کورد / هتد .. مارچ 993 ، شاری سلوپيا ، ئه‌توانرێت بووترێت که ئه‌م پڕۆژه هه‌ره‌وه‌زه ئێجگار ده‌گمه‌نه بۆ يه‌که‌م جاره له‌سه‌ر خاکی باکوڕی کوردوستان چاو هه‌لبهێنێت و پێشتر هيچ جۆره چالاکييه‌کی له‌و ڕه‌وشه نه‌بينراوه ، کۆمه‌ڵه‌ی ڕۆشنبيرانی کورد له ديار به‌کر به مانشێتی گه‌وره باس له گريانی خه‌ست و به کوڵی خۆيان ئه‌که‌ن ،، ڕۆژنامه‌ی وه‌ڵات ئه‌و کاته نووسيويه‌تی : – له خه‌ون ئه‌چوو ، بچێته پێشانگايه‌کی هێند مه‌زن و جگه له کورديی به سۆرانی و بادينی و لاتينی و زۆريك له ئينگليزی چيتر ووشه‌يه‌کی توورکی نه‌بينێت !! والی شه‌رناخ به‌ر له‌وه‌ی پێشانگاکه بکاته‌وه کومه‌ڵێک قسه‌ی ناشرين به به‌رێوه‌به‌ری ئه‌من و حاکمی سلوپی ئه‌دات و مقه‌سته‌که فڕی ئه‌داو ئه‌ڕوات ، نه‌وزاد شێردڵ به هێمنی و به ڕێزه‌وه مقه‌سته‌که ئه‌داته ده‌ست مامۆستای مه‌زن سه‌يدا — لاوين — ی سه‌رۆکی شاره‌وانی و ئه‌و به گريانه‌وه شريته‌که ئه‌بڕێت و به ده‌نگی زۆر بڵندی شيعر خوێندنه‌وه‌ش دێته ناو هۆڵه‌که ،،زۆرن ئه‌وانه‌ی به بێ بوونی ئه‌وان له‌وێ کاره‌که نه‌ده‌کرا به داخه‌وه ناوی زوربه‌يانمان لا نين ،، به‌ڵام کاک شێردڵ خۆی کاتی خۆی که‌مێك له‌م باسه دواوه ،، ئه‌و قه‌ت هيچ ناڵێت و هه‌ر گوێ بۆ ڕای ميوان و بينه‌ر شل ئه‌کا ، يا زۆر ئه‌ڵيت و که‌می تێ ئه‌گه‌يت .. ،،شێردڵ ووتی :- (( هوڵێکی مه‌زنمان کرد بوو به کوماره‌که‌ی ئه‌فلاتوون ، هه‌موو کوردوستانی مه‌زنی تيا بوو ، سه‌فيره‌کانيش مه‌علووم بوون کێن !! – فان کوخه‌که‌ی – بابه گوڕ گوڕ – مه‌حمود سيامه‌نسووريی / خاوه‌ن په‌نجه سيحراويه‌که – ئازاد حەمە ڕەسوڵ مامۆستا نزار ئه‌مين ته‌شکيليه‌کی ناسراو نه‌بوو که‌چی ده‌ستێک له غه‌يبه‌وه ده‌يانی وه‌ک ئه‌وی ئه‌جووڵان و هه‌ر ڕه‌نگ بوو په‌يامی ئه‌ڕژاو هه‌ر شيعر بووزمانی ئه‌پژا، سه‌بری بۆتانی قه‌ڵه‌مه‌که‌ی ببووه کوڕی هه‌ژده ساڵی زاخۆ و فه‌رهاد که‌ريمی قه‌ڵاو مناره‌ش به دێڕه هه‌نسك هانای بۆ ئه‌نوه‌ر مه‌سيفيی ئه برد تا بێت و له‌و که‌رنه‌فاڵه میژووييه دا به‌شدار بێت ،، ئالانی کاکه ئه‌حه ی نووسه‌ر له تاوه‌رێکی به‌رزه‌وه چاودێريی خه ونه‌کانی ئه‌کردين نه‌با ناحه‌زێك بێت و له ناخافڵدا لێمان بدزێت ، ئاخر ناهه‌قی نه‌بوو ، باشه خۆ ئه‌گه‌ر خوا نه‌کرده که‌سابه‌تی جاسوسيی نه‌مێنێت ئه‌وا چاره‌کێکی کورد له برسا ئه‌مرێت ،، به‌هزاد کریم ئه‌مين پايه‌ی ديوارێکی به شيعر له‌بغ کردبوو ، پێشانگا نه‌بوو ، نيمچه ئينتيحارێك بوو ،،ئه‌وه‌نده ماچ کراين ئه‌وه شانزه ساڵه روومه‌ت و ته‌وێڵمان هه‌ر سووره سوور،، چالاکيی له‌و جۆره له تورکيا زۆر بفه‌يه و کوڕو کچی خۆی ئه‌وێت ، ئازادی حه‌مه ره سول تابلۆی مێرد مناڵێکی کوردی نه‌خشاندبوو سنگی خۆی دادڕيبوو ، دڵی مناڵه‌که وێنه‌ی جوگرافيای کوردوستانی مه‌زن بوو ،، ئه‌منێک نه‌يکرده نامه‌رديی و له‌به‌ر چاوی هه‌موومان و به قه‌نناص فيشه‌کێکی پێوه ناو فراندمان بۆ خه‌سته‌خانه ،، نه‌خێر وازيان نه‌هێنا و نه‌رويج خێرا ڕفانديان و ئێمه‌شيان زوو قووتار کرد ))
13 – جگه له‌وانه‌ی سه‌ره‌وه نه‌وزاد شێردڵ به سه‌دان نووسينی هه‌مه چه‌شنه‌ی به کوردييه‌کی پاراوو عه‌ره‌بی يه‌کی شاره‌زايانه‌و که‌م که‌مييش به ئينگليزيی يه‌کی به‌ر ديکشنه‌ريی نووسيوه‌و بڵاو کردوته‌وه ، به تايبه‌ت جيهانی سيسيولۆژی به هه‌موو باڵه فراوانه‌کانيه‌‌وه ، ، شيعر، سی – دی به ووشه‌و ئاوازه‌وه بۆ گۆرانی بێژان ،، په‌خشان ،چیرۆك ، فه‌لسه‌فه ، هتد ،، ته‌نانه‌ت وه‌ك ئاره‌زوويه‌کی ڕووحيی چه‌ندان جار به هاوکار له‌گه‌ڵ هاوڕێی زۆر نزيکی خۆی ئاواز و شيعری خۆيان و هه‌ر به ده‌نگی خۆشيان خستۆته توێی ئه‌لبومێکه‌وه، هاوکات هه‌ر له‌گه‌ل گه‌يشتنی بۆ ووڵاتی که‌نه‌دا له پاڵ خوێندنی چه‌ند کورسێکی شانۆدا ماوه‌ی نزيکه‌ی شه‌ش ساڵ له‌گه‌ڵ تيپی شانۆی شه‌قامی ئاو – له شاری کيچنه‌ری سه‌ر به هه‌رێمی ئۆنتاريودا کاری کردووه که ئێستا ناوی تيپی ناوبراو گوردراوه بۆ – تيپی شانۆی شه‌قامی مه‌ليک – ، ئه‌و ساڵانه‌ی کار کردنی له شانۆ و له پاليشيدا چه‌ند سالێک کاری – فولنتير – له به‌شی مايکرۆ فليمی کتێبخانه‌ی گشتی هه‌مان شار خۆی له خۆيدا ئه‌زموونگه‌لێکی له بار بوون تاکوو لايه‌نی که‌م مرۆف له‌و خوليا سه‌ره‌کيانه‌ی ته‌مه‌نی دانه‌بڕيت ، جا ئه‌گه‌ر ئه‌و گونجان و لووانه‌ی ڕابووردووی کۆشی نيشتيمانی داييک بو مرۆفێکی ئاسايي دووباره بوونه‌وه‌يان وه‌ک خه‌وييش هينده مه‌حال بێت داخۆ بۆ نووسه‌ر به گشتيی و هونه‌رمه‌نديش هه‌ر زۆر به تايبه‌ت ئه‌بێت به بێ وويست و حه‌زی خۆی ڕۆژانه به‌ره‌و ڕووی چه‌ند ئاسته‌نگی ناهه‌مواری سايکيی و فيزيکيی ببێته‌وه و تا چ ئاستیک له‌و مل ملانێ ی خۆ ڕاگريه‌دا پشتی ئومێده‌کانی نه‌دا له زه‌وی ؟ ئه‌مه ئه‌و پرسياره بوو که دوای رێک خستنی ئه‌م مالپه‌ره بۆ ئه‌و هاوڕێ به‌وه فايه‌‌ی له زۆر نه‌هامه‌تييدا نه‌يهێشت پشتی زۆرمان بدرێت له زه‌وی و به قسه گه‌شبينه‌کانی داينه‌موی ووره‌مانی ئه‌کرده‌وه ، به‌ڵام شێردڵ چ وه‌ك وه‌سفه‌کانی سه‌ره‌وه و چ وه‌ک کاديرێکی ده ساڵه‌ی پارتی سه‌وزی که‌نه‌دی که خوشه‌وويستيی ته‌بيعه‌ت و ئاژه‌ڵ و جه‌رگ سووتانی به‌م ئه‌تک کردنه‌ی زه‌وی و ئاسمان به‌ره‌و ئه‌و عيشقه سه‌وزه‌ی بردووه ، ئه‌وه‌تا هه‌ر شیلگيره له‌سه‌ر ئه‌و بڕوايه‌ی که ئه‌گه‌ر له بنکه‌دا بين يان له لووتکه‌دا هيچ له‌وه ناگورێت که ئه‌م ژيانه دۆزه‌خێکی شيرينه‌و سه‌د هێنده‌ی تريش پرووکێنه‌ر بێت هێشتا حه‌ز ناکه‌ين چرکه‌يه‌ک چيه زوو تر له وه‌خته‌که‌ی خوی به جيێ بـــ‌ـهێلين !!!! ئه‌ی نابينيت چۆن هه‌رچی وه سيله‌ی دونيايه خستوومانه‌ته گه‌ڕ بۆ غايـه‌تی چه‌ند سالێك زياتر مانه‌وه‌مان؟
تێیینی: ئەم نوسینە لە زمانی ئازاد حەمە ڕەسوڵ هاورێی نەوزاد شێردڵەوە وەرگیراوە.
https://www.youtube.com/watch?v=vBia2YjD6qg
http://www.penusakan.com/didw-terwanin/26185-2014-12-01-00-58-24
https://nawzadsherdl.wordpress.com/%D8%B3%DB%95%D8%B1%DB%95%D8%AA%D8%A7/