بەهۆی هەورەبروسکەوە 12 ئاگر لە هەڵەبجە کەوتنەوە
بەهۆی هەورەبروسەکە و گۆڕانکارییەکانی کەشوهەوا لە 20 کاژێری رابردوودا 12 ئاگر لە پارێزگای هەڵەبجە کەوتوونەتەوە و سەدان دۆنم پووش و پاوان و دارستان و دەیان دۆنم زەویی چێندراو بە گەنم سووتاون.
نەقیب زانیار عومەر، گوتەبێژی بەرگریی شارستانی پارێزگای هەڵەبجە، بە تۆڕی میدیایی رووداوی راگەیاند: "چەندین تیمی ئێمە بەدرێژایی ناوچەکانی هەورامان و هەڵەبجە و چەند ناوچەیەکی دیکە بڵاوبوونەوە و توانییان لەماوەیەکی پێوانەییدا ئاگرەکان کۆنتڕۆڵبکەن".
نەقیب زانیار عومەر ئاماژەی بەوەدا هەورە بروسکە و گۆرانکارییەکانی دوێنێی کەشوهەوا هیچ زیانێکی گیانییان نەبووە، بەڵام زیانی مادی هەبووە و بە دەیان دۆنم زەویی چێندراو بە گەنم سووتاون.
بەپێی زانیارییەکانی بەڕێوەبەرایەتی کەشناسی و بوومەلەرزەزانی هەرێمی کوردستان، دوای سێ رۆژ لە بەرزبوونەوە و تۆمارکردنی تاوەکو ئاستی 46 پلەی گەرمی لەهەندێک لە ناوچەکانی باشووری کوردستان، لە ئەمڕۆ یەکشەممەوە پلەی گەرما دادەبەزێت و دەگەرێنەوە ئاستەکانی 35 و 36 پلە.
23-05-2021
سەرچاوە: ماڵپەرر رووداو