باوک
Jump to navigation
Jump to search
باوک
تێکستی: شێرزاد حەسەن
- باوکە.. سوڕ دەزانم کە سبەی دەمریت..
- سبەی دەمریت و.. من و تیراوەی برینێکی ساڕێژنەبوو بەجێدێڵیت
- میراتێک لە خەم و قەهر و دۆڕان و ڕسوایی و گۆبەندی نەبڕاوە
- کە منی نۆبەرە مەرجە لە تۆی مایەپووچ .. هەڵیبگرمەوە
- ئاپۆرایەک لە تۆڵەسێن و خوێنخۆر و ئەرژەنگ و مردووخۆر
- ئۆردوێک لەو دوژمنانەی کە لە منداڵیمەوە بە منت دەناساندن
- بەو نیازەی کە بێدار و وریا بم.. نەمکوژن و زەفەرم پێنەبەن
- لە پای چی و بۆچی.. باوکە؟ دەتگوت؛ 'نازانم'
- ئاخر.. خۆ تۆ لە جبەخانە و تەقەمەنی و چەکباری خۆت
- بیجگە لە تفەنگی 'حوسکە و رەشکە و جامبێزاری ستۆک
- بێجگە لە بڕنەوێکی شکاو و خەنجەری دەبانی ژەنگدار..
- هیچت بۆ من بەجێنەهێشتووە..!
- چلۆن بجەنگم و بە چی تۆڵەسێنی تۆ بم؟
- کە هیچت بە من ڕەوا نەبینی
- دەستم دایە خەنجەرەکەت.. لە منت خورییەوە
- هێی گەلحۆ.. ئەوەیان گەمەی منداڵان نییە
- دەستم برد بۆ گۆپاڵەکەت.. کەچی لێت ساندمەوە
- ددانەکانی منت پێ شکاندن
- بڕنەوەکەتم دزی تا ببم بە نیشانەشکین
- هێی سوڕگمی نابەڵەد.. گەرەکتە کێ بکوژیت
- گومانت وەها کوشندە بوو کە بە قامچییەکەت چاوێکت کوێر کردم..!
- ئەتۆ.. دوای خۆت.. دیوەخانەیەکی داڕووخاو
- پیرە دایکێکی دەردەدار و نیوە مردوو بە دەستی تۆ
- حەوت خوشکی زەبوون و قەیرە کە لە سێبەری خۆیان دەترسێن
- شەش برای دەمارگیر و هەڵگری خوێنی ڕەشی تۆ
- سەرسەری و قەڕوح و دز و چەتە.. چەندە لە خۆت دەچن لە ڕاوە ژن
- هەر رۆژە و گۆبەندێک و جورتمێک دەنێنەوە کە منی تێدا رسوا دەبم
- ئەتۆ.. شاخێکی بن‌کۆڵ.. باخێکی سووتاو.. رووبارێکی وشکەوەبوو
- بەجێ دێڵیت!
- هۆ باوکە تووڕە و تۆسنەکەم.. تۆ دەمریت و من دەمێنم
- تۆ میراتی گەورەی خەم و برسییەتی و داڕووخانیت بۆ من
- دوای خۆت... چی لە خەنجەرێکی ژەنگدار و شکاو بکەم
- چی لە دەم وچاوێکی سووتاو بکەم..
- ئەی ڕووباری وشکەوەبوو... هۆ دەغڵ و دانی قەرەبوو
- هۆ.. هێلانەی شەمشەمەکوێرە و کونەپەپوو..؟
- تۆ دەمریت و منی چۆلەکەی دەنووک زەردە..
- بۆ ئاسمانێکی پڕ لە واشە و باز و شەهێن بەجێدێڵیت
- توولە ماسیم و...
- بۆ دەریایەکی پڕ لە نەهەنگ.. بەجێمدێڵیت!
- سبەی کە دەمریت... دوژمنەکانت بە دوای مندا دەگەڕێن
- کون بە کون.. وەک کەڵەکێوییەکی شەل و کوێر... ڕاوم دەنێن
- دەمگرن.. دەمکوژن..دەمگروێنن.
- ئاه و ئەفسووس و موخابن... باوکە... ئەتۆ چی بەجێدێڵیت؟
- ئاسمانێکی بێ خۆر و مانگ و ئەستێرە..
- زستانێکی بێ باران
- مردوویەکی بێ کێل و ناوونیشان
- جیهانێک پڕ لە گرێ و گریان و گومان!
- تۆ دەمریت و..
- بێجگە لە " ناوزڕان".. میراتگری هیچ شتێک نیم
- جگە لە قوتیلە و هەگبەی سواڵکەر
- دەخیلەی بەتاڵی دەرۆزەکەر.. چرای خامۆش
- بیجگە لە کڵاوی کەچەڵ..
- میراتگری چیم..؟
- سبەی دەمریت..
- نە پارەی تەلیقن و نە کفن و جاو..
- نە نرخی کێلێکی شکاو
- من بێجگە لە لاشەی داڕزیوی تۆ...
- بێجگە لە خەمی هەرە گەورەم..
- هیچ شتێک دەنێو ئەم دونیا کاولبووەم.. شک نابەم..!
شێرۆـ ی پلکە زارێ