فەیزوڵڵا خورشید تۆماری
مامۆستا فەیزوڵڵا خورشید تۆماری ساڵی 1934 لە گوندی تۆماری سەر بە شاری کەرکووک لە دایكبووە، هەر لە تەمەنی 9 ساڵییەوە لە حوجرە چووەتە بەر خوێندنی ئایینی و پاشان بووەتە مامۆستای ئایینی.
لە ساڵی 1960 بووەتە مامۆستای سەرەتایی و لە ژیانی پیشەییشیدا كاری ڕۆژنامەوانی و وەرگێڕان و وشەسازیی كوردی كردووەو هەروەها خاوەنی چەند وتار و لێكۆڵینەوەیەكی بڵاوكراوەیە.
فەیزوڵڵا خورشید تۆماری چەندین داهێنان و وشەسازی لە زمانەوانی کوردی کردووە چ لە ژیانی ڕۆژانە و چ بە نووسین چالاکوانێکی گەورەبووە لە بواری بەرگیری کردن لە چەمکی ئازادی و بیروباوەڕەکەی کاریگەریی لەسەر بیرمەندانی ئیسلامی و کریستیان هەبووە، بڵاوکردنەوەی بابەتەکانی لە ڕۆژنامە و گۆڤارەکان زیاتر لە سەردەمی (عەبدولکەریم قاسم و ئەحمەد حەسەن بەکر) بوون.
دواتر هەندێک بڵاوکردنەوەی بابەتی لە ڕۆژنامەکان لە سەردەمی (سەدام حسێن) ساڵانی هەشتاکان قەدەغە کراون، بابەتەکانی ئایینی و کۆمەڵایەتی و نەتەوەیی و مێژوویی بوون، زمانی عەرەبی و فارسی و تورکی و ئینگلیزی دەزانی، لە پەرتووکخانەکەی هەندێک لە قورئان و ئینجیل و تەورات و چەندین پەرتووکی ماوە، مێژوویان دەگەڕێتەوە بۆ 150 ساڵ پێش ئێستا 2023. 41 ساڵ مامۆستا بووە لە قوتابخانەکان.
مامۆستا فەیزوڵڵا خورشید تۆماری لەچەند مانگی رابردوودا كتێبخانە و ئەرشیفی تایبەتی خۆی پێشكەش بە ناوەندی كوردستان لە زانكۆی سلێمانی كرد بەمەبەست پاراستنی ، هەروەها بڕیاربوو لەچەند ڕۆژی داهاتوودا دوای كۆتاییهاتنی پۆلێنكردن و تۆماركردنی كتێبخانەكەی، مەراسیمی تایبەتی بۆ ڕێكبخرێت بەڵام مەرگ رێگربوو لەبەشداریكردنی.
لە ڕۆژی 24-09-2024 بەهۆی نەخۆشییەوە کۆچی دوایی کردووە.
