پرس و پرسکرێکی ژنانی خۆرهەڵات
لە ئامادەکردنی: کاروان مێراوی و سۆران شەمسی
نامیلکەی “پرس و پرسکرێکی ژنانی خۆرهەڵات” کە ئاوڕدانەوەیەکە لە گۆشەیەک لە پرسی و کێشەکانی ژنانی ڕۆژهەڵاتی کوردستان و ژنانی کوردی دانیشتووی شارەکانی تری جوگرافیای وڵاتی ئێران، بەم شێوەی خوارەوە لەم پێشەکییەدا ئاماژە بە ئامانج و نێوەڕکی نامیلکەکە و تەوەرەکانی و هەروەها ڕوونکردنەوە لەسەر نێوی نامیلکەکەش دراوە.
ڕوونکردنەوە: پێویستە سەرەتا ڕوونکردنەوەیەک لەسەر نێوی نامیلکەکە بدرێت، ڕەنگە بۆ خوێنەرانی بەڕێز پرسیار بێت کە بۆچی نێوی “پرس و پرسکرێکی ژنانی خۆرهەڵات” بۆ ئەم نامیلکەیە هەڵبژێردراوە؟ خۆدی ئەو نێوەی کە هەڵبژێردراوە ئاماژەیەکە بە نێوەڕۆک و تەوەر و بابەتەکانی نێو نامیلکەکە و بە هۆکاری ئەوەی کە نێوەڕۆکی ئەو نامیلکەیە ئاوڕدانەوەیەکە لە پرس و کێشەکانی ژنانی ڕۆژهەڵاتی کوردستان، ئەو نێوەمان بۆی هەڵبژاردووە.
لە ڕاستیدا هەر وەکوو ئاماژەی پێ کراوە، نێوەڕکی ئەو نامیلکەیە کە لە سێ تەوەری سەرەکی و تەوەرەکانیش لە چەند بەشی جیاواز پێک هاتووە و لەلایەن کەسانێکی بە توانا و خامەبەدەستەوە نووسراوە و ئامادە کراوە، لێکۆڵینەوە و ئاوڕدانەوەیەکە لە پرس و کێشە و پرسکرێکی ژنانی خۆرهەڵاتی کوردستان و کوردەکانی تری دانیشتووی شارەکانی نێو جوگرافیای وڵاتی ئێران، بەڵام لە هێندێک لە بابەتەکاندا بە هۆکاری ئەوەی کە ژنانی خۆرهەڵاتی کوردستان هاوچارەنووسی ژنانی سەرانسەری وڵاتی ئێران و ژنانی نەتەوە بندەستەکانی تری چوارچێوەی ئەو وڵاتەن، هاوکات لەگەڵ پرسی ژنانی کوردستان ئاماژەکیش بە ژنانی ئێران کراوە.
ئامانج: ئامادکردنی ئەو نامیلکەیە دوو ئامانجی سەرەکی هەیە کە بەم شێوەی خوارەوە دەخرێنە بەرباس.
یەکەم: ئامانجی یەکەم لە ئامادەکردنی ئەو نامیلکەیە ئەوەیە کە خزمەتێک بێت بە دۆزی ڕەوای نەتەوەکەمان کە پرس و مافەکانی ژنانیش بەشێکی بناغەیی لە پرسە نەتەوەییەکانی گەلی کوردە، چۆنکە نەتەوەی کورد لەسەر ئەو باوەڕەیە کە لە هەر کۆمەڵگایەکدا تاکوو ڕەوایی بە مافەکانی ژنان وەکوو نیوەی کۆمەڵگا نەدرێت و سەرجەم ویست و داخوازییە سێنفییەکانیان لە چوارچێوەی نەریتی پێشکەوتووانەی ئەو کۆمەڵگایە و بەپێی یاسا نێونەتەوەییەکان دابین نەکرێت، دێموکراسییەکی ڕاەستەقینە لەو کۆمەلگایەدا جێگیر نابێت و بە کۆمەڵگایەکی دێموکرات ئەژمار ناکریت.