ئەحمەد عەزیز ئاغا

مامۆستا ئەحمەد عەزیز ئاغا یەكێك لەمامۆستا رۆشنبیرو پێشەنگەكانی شاری سلێمانیە، لەبواری پەروەردەدا خزمەتێكی زۆری بەخوێندكاران‌و رەوتی خوێندن‌و زمانی كوردی كردووە.

مامۆستا ئەحمەد خزمەتێكی زۆری بەزمان‌و رێنووس‌و ئەلف‌و بێی كوردی كردووە‌و بەیەكێك لە پێشەنگە دڵسۆزەكانی ئەو بوارە دادەنرێت.

ئەو ساڵی 1929 كتێبی ئەلف‌و بێی بۆ خوێندكارانی پۆلی یەكەمی سەرەتایی دانا‌و لەچاپخانەی فورات لەبەغدا چاپی كرد، كە كتێبێكی سادە‌و ساكار بوو بۆ ناساندنی پیتە كوردییەكان بەخوێندكارانی كورد.

ئەم كتێبە بووە بە بناغەیەك كە دوای ئەو مامۆستا حامید فەرەج ئەلف‌و بێیەكی تری بەناوی (ئەلف‌و بێی كوردی) لەساڵی 1936 دانا.

دوای ئەویش مامۆستا ئیبراهیم ئەمین باڵدار لەساڵی 1948ئەلفوبێیەكی تری بەناوی ئەلف‌ و بێی نوێ‌ دانا كە كتێبێكی جوانی وێنەدار بوو، بەزمانێكی كوردی پارا‌و نووسرابوو.

ئەحمەدی كوڕی عەزیز ئاغا كوڕی عەبدوڵڵا ئاغا کوڕی ئاغا تەها یە ساڵی 1894 لەشاری سلێمانی لەدایكبووە.

لە قوتابخانەی ئاینی‌و روشدییەی مەدەنی خوێندوویەتی‌ و لەسەردەمی حوكمداری مەلیك مەحموددا وەك مامۆستا خزمەتی كردووە‌و دەرسی بەخوێندكاران وتۆتەوە.

دواتر وەك فەرمانبەر لە فەرمانگەكانی پارێزگا‌و ناحیە خزمەتی كردووە.

مامۆستا ئەحمەد كەسێكی زیرەك‌ و بەتوانا‌ و قسەخۆش‌ و خۆشەویست بووە.

بەداخەوە ئەم كەسایەتییە پەروەردەییە گەورەیە لەساڵی 1968 بۆ دواجار ماڵئاوایی كرد‌و چووە ریزی نەمرانی نیشتمانەوە.

درودی بۆ گیانی پاكی ئەحمەد عەزیز ئاغای مامۆستای پێشەنگ‌و رچەشكێن.

سەرچاوە: اعلام الكرد – جمال بابان – دەزگای ئاراس2012