مەریوان مەسعود
نووسەر و رۆژنامەنووس و توێژەر
مەریوان مەسعود لە 05-10-1977 لە شاری هەولێر لەدایكبووە.
قۆناغی سەرەتایی و ناوەندی لە هەولێر خوێندووە، لە دوای دەرچوونی لە قۆناغی ناوەندی، لە ساڵی 1992 دەچێتە پەیمانگەی هونەرەجوانەكانی هەولێر و وەكو یەكەم دەستەی خوێندكارانی ئەو پەیمانگەیە لە بەشی هونەری شانۆ دەخوێنێت، دواتر لە قۆناغی چوارەمی پەیمانگە، بە هۆی بارودۆخی سیاسی ئەو كات لەدوای ساڵی 1996 دەچێتە شاری سلێمانی و لەوێ قۆناغی چوارەم و پێنجەمی پەیمانگەی هونەرەجوانەكان تەواو دەكات و لە ساڵی 1999 دەبێتە هەڵگری بڕوانامەی دبلۆمی شانۆ لە پەیمانگەی هونەرەجوانەكانی سلێمانی.
ئەم نووسەر و رۆژنامەنووسە، لە 1/1/1997 لە رۆژنامەی كوردستانی نوێ دادەمەزرێت و لە خۆشەویستی بۆ بواری رۆژنامەنووسیی، بواری هونەری شانۆ فەرامۆش دەكات، بۆیە لە سەرجەم بوارەكانی رۆژنامە كار دەكات وەكو سەرپەرشتیاری چاپ، هەڵەچنی، پەیامنێری، هەواڵساز، لێپرسراوی لاپەڕە، لێپرسراوی بەش، ئەندامی دەستەی نووسەران، سكرتێری نووسین، و دوا پلەشی لە ساڵی 2022ەوە تا ئێستا جێگری سەرنووسەری رۆژنامەی كوردستانی نوێ-یە و بەردەوامە لە كاركردن.
مەریوان مەسعود، لە ساڵی 2000-2001 بەشی رۆژنامەنووسی لە پەیمانگەی تەكنیكی سلێمانی تەواو دەكات، وەكو یەكەم دەستەی دەرچووی ئەم پەیمانگەیە دەبێت، دواتر بڕوانامەی بەكالۆریۆس لە بەشی راگەیاندن-ی زانكۆی سلێمانی - كۆلێجی زانستە مرۆڤایەتییەكان بەدەستدێنێت ئەویش لە ساڵی 2006.
لەنێوان ساڵانی (2004-2005) لە رۆژنامەی ئاسۆ كە دەزگای خەندان بۆ پەخش و وەشاندن دەریدەكرد كاری كردووەو پلەكەی تا جێگری سەرنووسەر ڕۆیشت، دواتر گەڕاوەتەوە رۆژنامەی كوردستانی نوێ. لەساڵی: (2007-2011) وەكو سكرتێری رۆژنامەوانی جێگری سەرۆكی هەرێمی كوردستان كاری كردووە. ماوەی یەك ساڵیش لە سایتی رەسمی سەرۆكایەتی كۆماری عێراق- بەشی كوردی كاری كردووە كە رەوانشاد مام جەلال سەرۆك كۆمار بووە.
خوشكەزای شەهیدی سەركردە كاردۆ گەڵاڵی-یە كە یەكێكە لە سەركردە و پارێزەر و نووسەر و شاعیر و رۆژنامەنووسە ناسراوەكانی كورد كە بەدەستی جەلادەكانی بەعس شەهید كراوە.
مەریوان مەسعود، سەرەڕای ئەوەی نزیكەی دوو هەزار بابەتی بڵاوكراوەی لە رۆژنامە و گۆڤار و وێبسایتە كوردییەكان هەیە، خاوەنی چەند كتێب و بەرهەمێكی چاپكراوە، وەكو:
- كتێبی پڕۆفیشناڵی لە رۆژنامەنووسیی كوردیدا، نووسینی مەریوان مەسعود لە بڵاوكراوەكانی مەكتەبی بیر و هوشیاری (ی. ن. ك)، چاپی یەكەم، سلێمانی، 2006، 158 لاپەڕە.
- كتێبی (رووە و هونەرێكی كوردیی رەسەن و هاوچەرخ)، نووسینی : مەریوان مەسعود و د.ژینۆ عەبدولڵا، چاپی یەكەم، 2017.
- كتێبی حەسەن زیرەك، چریكەیەك بۆ شادی، نووسینی: كۆمەڵێك نووسەر، سەرپەرشتیار مەریوان مەسعود، سلێمانی، 2019.
- كۆماری ژیاندۆستی، كتێبی دیداری رۆژنامەنووسی، لە بڵاوكراوەكانی هاواری فیلم، 2021.
- مام جەلال لە خاك-ی كوردستانی نوێدا، نووسینی مام جەلال، ئامادەكردنی مەریوان مەسعود، سلێمانی ، 2023
- كتێبی من دەنووسم، ئێوەش بیخوێننەوە، كە ئەزموونێكی نوێی رۆژنامەنووسیە، سلێمانی، 2024.
ئەمە جگە لەوەی ماوەی زیاتر لە سێ ساڵە لە بواری رۆژنامەنووسیی بەڵگەنامەیی و مێژوویی كار دەكات و تا ئێستا زیاتر لە 100 بابەتی بە بەڵگە و نامە و وێنەی دەگمەن بڵاوكردۆتەوە و كە شارەزایانی بواری رۆژنامەنووسیی پێیان وایە ئەم شێوازی كاركردنە بنكۆڵكارییە و لە رۆژنامە كوردییەكان بە دەگمەن كاری لەسەر كراوە. چونكە پێویستی بە رۆژنامەنووس و نووسەری بە سەلیقە و خاوەن ئەزموون هەیە و مەریوان مەسعودیش زیاتر لە 28 ساڵ ئەزموونی هەیە لە بواری رۆژنامە و چاپەمەنی نووسراو.
نووسەر، ئەندامی كارای سەندیكای رۆژنامەنووسانی كوردستانە و هەروەها ئەندامی فیدراسیۆنی نێودەوڵەتی رۆژنامەنووسانی جیهانییە.
تۆمارێکی تایبەت: بۆ کوردکۆلێکت سەبارەت بە ژیان و کارنامەی بەرێز (مەریوان مەسعود).