شەهیدانی قوتابخانەی ئاسۆی شەهیدان
نزیکەی 37 ساڵ تێدەپەڕێت بەسەر تۆپبارانی شاری سلێمانی لەلایەن تۆپخانەكانی كۆماری ئیسلامی ئێرانەوە لە ماوەی شەڕی ٨ ساڵەی عێراق-ئێران، كە تێیدا لەئەنجامی تەقینەوەی تۆپێك لەناو خوێندنگەی ئاسۆی شاری سلێمانی نزیكەی 40 منداڵ شەهید و برینداربوون.
خوێندنگەی “ئاسۆی شەهیدان”، كە لە دوای تۆپبارانەكەی ئێرانەوە ئەو ناوەی بەسەردا بڕا دەكەوێتە گەڕەكی مامۆستایان لە سەرووی پاركی ئازادی شاری سلێمانی و دوو دەوامی خوێندكارانی تێدا دەكرێت و بە یەكێك لە خوێندنگە جوان و دێرینەكانی شار دادەنرێت.
لە ڕۆژی 17-01-1987 و نزیکەی 37 ساڵ لەمەوبەر ڕۆژێكی تاڵ و غەمگین، كارەساتێكی ناخۆش و جەرگبڕ بەهۆی شەڕی داسەپاوی تاقەتپڕوكێنی 8 ساڵەی نێوان عیراق – ئێران بۆ شاری سلێمانی و دانیشتووانەكەی بوو، كە بەجارێك پرسە و ماتەمینی باڵی بەسەر گەڕەكێكی شارەكەدا بەناوی (گەڕەكى مامۆستایان) كێشا، كە لە یادەوەری كەسوكاری شەهیدان و هاوشارییان ناسڕدرێتەوە.
بەبۆنەی ئەو كارەساتە جەرگبڕەی شارەوە، ڕۆژی سێ شەممە 17ی كانوونی دووەمی 2023 لە ساڵیادی شەهیدبوونی ئەو خوێندكارانەدا خوێندنگەی ئاسۆی شەهیدان مەڕاسیمێكی سازكرد و دوای خولەكێك وەستان بۆ گیانی پاكی ئەو منداڵە پەپوولەئاسایانە، چەند چالاكییەك سازكرا.
مامۆستا گێلاس، بەڕێوەبەری خوێندنگەی ئاسۆی شەهیدان لە وتەیەكدا ئاماژەی بەوەكرد، ٣٦ ساڵ لەمەوبەر بەهۆی تەقینەوەی تۆپێكی ئێران لە خوێندنگەكەمان 12 منداڵی پەپوولە ئاسای خوێندنگەكەمان شەهید بوون، ئاڵای خوێندنگەكەمان وەك ماتەمینی بۆ ئەو خوێندكارانە دەكەینەوە.
لە چالاكییەكەدا، ژمارەیەك خوێندكار بە مەڕاسیمێكی شایستە ئاڵای كوردستانیان بۆ نیوە داگرت و ١٢ مۆمیان وەك هێمایەك بۆ ١٢ شەهیدی ئەو خوێندنگەیە هەڵكرد.
لای خۆشیەوە، سامان حسێن، سكرتێری كۆمەڵەی كەمئەندامانی كوردستان بۆ (خەڵك) ڕایگەیاند، بەهۆی تۆپبارانی ئێرانەوە لە ڕۆژێكی وەك ئەمڕۆدا لە ساڵی 1987 ژمارەیەك خوێندكاری هاوڕێم لە خوێندنگەی ئاسۆی شەهیدان، شەهید بوون و منیش بریندار بووم و بەهۆی ئەو كارەساتەوە كەمئەندام بووم.
وتیشی، “لەم ڕووداوە جەرگبڕەدا درود و سڵاو بۆ گیانی هاوڕێ خوێندكارەكانم دەنێرم، كە بوونە قوربانی شەڕی داسەپاوی نێوان عێراق و ئێران”.
هەروەها، داناز عەبدولڕەحمان، كە ئامۆزانی یەكێك لە منداڵە شەهیدەكانی ئەو كارەساتەیە دەڵێت: “لەو ڕۆژە جەرگبڕ و كارەساتبارییەدا چەند تۆپێك بەر گەڕەكی مامۆستایان كەوت و یەكێك لە گوللە تۆپەكان لە كاتژمێر 11:15 خوولەك بەر خوێندنگەی ئاسۆی سەرەتایی تێكەڵاو كەوت لە گەڕەكی مامۆستایان و لەئاكامدا كۆمەڵێك خوێندكاری منداڵی بێتاوانی ھەمان خوێندنگەی كردە ئامانج.
وەك داناز عەبدولڕەحمان دەڵێت: “لەو كارەساتەدا 12 منداڵ شەھید و زیاتر لە 27 منداڵی دیكە بریندار بوون، كە بەداخەوە یەكێك لەشەھیدەكان ئامۆزای من بوو”.
ناوی شەھیدەكانی تۆپبارانی 17-01-1987ی خوێندنگەی ئاسۆی شەهیدان:
- ڤیان حەمەئەمین
- بەرھەم حەمەسەعید
- تالیب ئەحمەد قادر
- كارزان عومەر
- تاڤگە ئەحمەد عارف
- كامەران عومەر
- ئاڤان عەلی
- سۆزان خالید
- بەھمەن خالید
- تارا عەبدوڵڵا
- ئومێد عەزیز محێدین
- ساسان عەبدولحەمید
دەشڵێت: “ھەربۆیە دواتر خوێندنگەكە ناونرا ئاسۆی شەھیدان و لێرەوە درود و سڵاو بۆ گیانی پاكی پەپوولەئاسای ئەم خوێندكارە بێگەردانەی شارەكەم دەنێرم”.
