کاولبوون

(کاولبوون)

تێکستی: ‌شێرزاد حەسەن

پێشکەشە بە مانو بەرزنجی

• دڵم...
• دڵم.. ئاە.. لە دڵی من
• ئەوە چەندین ساڵە.. دڵم
• وەک زەنگی کڵێسایەکی کاولبوو
• تۆز و گەردی.. هەر هەموو دونیای لێنیشتووە
• جاران.. دەستی میهر و ڕەحمەتێک دەهات..
• سەدەها ئاوازی ڕەنگاوڕەنگی..
• بە گوێمدا دەچرپاند
• هەر ئاوازێک هەزارەها
• کۆترە باریکەی تریقە و خۆشی..
• لە ئاسمانی چاوەکانما هەڵدەفڕاند..!
• کەچی ئێستاکێ من..
• بوومەتە گوندێکی چۆڵ و خەرابات
• کڵێسای ڕۆح، بێ سایە و سێبەر و سابات
• هەردوو باسکم.. دوو باڵی خاچێکی شکاون
• بێناز.. کەوتوون.. کەچی وەکو عیسای مەسیح
• ئەفسووس و واوەیلا و موخابن
• کە یەزدان هەڵینەکێشام بۆ بن پەڕەکەی ئاسمانێ!
• دڵم... زەنگی تۆز لێ نیشتووی کڵێسایە
• کچە گاورێکی تەنیا و غەمناک نایەت
• زەنگی زەنگوڵەکان بخاتە سەر هەوای
• سۆزێکی گەرم دەنێو ئەم کاولستانە
• تا منی نیوە مردوو بیدار بکاتەوە
• راهیبەی شەیدا.. بێئاگایە لە خەمی من
• لە تاو و تاسە و حەسرەتی ئەوەی
• کە ئاخۆ کەی بێت وەک نەوبووکێکی تاقانە
• یەکەمین خانمۆڵە بێت
• کە خەونی بوون بە دڵخوازی 'مەسیح' بۆی بێتە دی..!
• وای لە بەختی ناپوختم کە خانمۆڵەی عاشقە عیسا
• مەحاڵە نێرینەیەک پڕ بە چاوان ببینێت..
• ئیدی ناچارم کە خاچەکەی خۆم بە کۆڵمەوە بێت
• برینەکانی خۆمی پیشان دەدەم..
• وەک ئەوەی خۆم 'عیسا' بم و چوارمێخەم کێشرا بێت
• بە خاچەکەی نێوان مەمکانی هەڵواسرابم
• برینی جێبزماری ناو هەردوو لەپ و پێیە خوێناویەکانمی
• دەخەمە بەر چاوانی کە کێم و زوون و خوێنی لێدەتکێت
• کەچی وەک کارمامزێکی سرک لێم دەسڵەمێتەوە..!
• تەواو .. جەخار.. کە ئەم نایەت ئەو زەنگە لێبدات و..
• تا خۆڵ و گەردی سەر چەهرە و باڵام...
• تۆزی ناو گەرووم... بداتە دەم "با"وە
• گەلۆ.. ئیدی منی پەژمووردەش
• رێگای خوین و ئازار و دۆڕان دەگرمە بەر

• زەنگی چی..؟ زەنگی ژەنگ‌- گرتوو.. دڵی منە
• ژێرکەوتووی تۆز و خۆڵی خەم و مردنە!
• ڕەنگە سبەی... یان دوای سەدەها ساڵی دیکە..
• هەر بە ڕێکەوت... قەلەڕەشێکی ڕەحمەت
• لە سەر زەنگی ئەو دڵە تۆزلێ نیشتووەم هەڵبنیشێ..
• ئەوسا.. ئاوازێکی کپ و غەمناک و پرسەداری
• وەک خوێنی ڕەش.. دادەچۆڕێ
• تنۆک تنۆک دەڕژێ تا کڵێسای کاولبووی عومرم...
• سەر خوێن دەکەوێ و هەرگیزاوهەرگیز
• چک ناکات و ببڕای ببڕ..کۆتایی نایەت..!

(تێکستی: شێرزاد حەسەن)