بەعشیقە
باشیک شارۆچکەیەکی کوردستانە کە ناوەندی ناحیەی باشیکە سەر بە پارێزگای نەینەوایە. شوێنێکی ستراتیژی ھەیە کە دەکەوێتە نێوان ھەر سێ پارێزگای مووسڵ و دھۆک و ھەولێر.
دەکەوێتە سەر چیایەکی نزم کەناوی چیای گەورکە، کە لەسیاسەتی تەعریبکردندا بەڕەسمی پێی دەوترێت چیای بەعشیقە و بەرزییەکەی (٦٨٠م) ە.
باشیک ١٣کم لە شاری مووسڵەوە دوورە، لە باکورەوە چیای مەقلوب کە لەناحیەی شێخانی جیادەکاتەوە لە باشور قەزای حەمدانیە و لەڕۆژھەڵاتەوە روباری خازر لە ناحیەی بەردەڕەشی جیادەکاتەوە و لە ڕۆژئاواوە مەڵبەندی مووسڵ دەوری دەدات، شارۆچکەی باشیک و چیا و زورگەکانی تەنیشتی لە ھەموو نەتەوە و ئاینەکان پێکدێت.
دانیشتوان لە باشیک نزیکەی ٢٠ ھەزار خێزان نیشتەجێن کە زۆربەیان کوردی ئێزیدین. روبەری ناحیەی باشیک (٥٢٦کم٢)ەو (٦١) گوند و کەرتی کشتوکاڵی لە خۆ دەگرێت. پێکھاتەی دانێشتوان و قەبیلەگەری بەم جۆرەیە:
لە (٥٢) گوندا کورد دەژین. کوردە ئێزیدیەکان لە (٩) گوندا و باجەلانیەکان لە (١٨) گوندا و شەبەکەکان لە (١٧) گوندا و گۆران (تیرەی گێژ) لە (٧) گونداو زێباریەکان لە(١) گوندا ھەن. عەرەب لە (٧) گوندا و دیانەکانیش لە (٢) گوندا.