كورد نييە، كوردستان بونى نييە!
نووسینی: هێژا دڵشاد
چەند رۆژێك پێش ئێستا ھاوڵاتييەكى باكوورى كوردستان لە گفتوگۆيەكيدا لەگەڵ مەرال ئاكشەنەر-ى سەرۆكى پارتى باش، دەڵێت« ئێمە كوردين و ئێرە خاكى كوردستانە».
گفتوگۆكە لە شارۆچكەى كورتئەڵان- ى سەربە پارێزگاى سيعرت روويدا. لەپاش بڵاوكردنەوەى گرتەى گفتوگۆكە لە سۆشيال مێديا، ئەو ھاوڵاتييە كوردە بە تۆمەتى پڕوپاگەندە بۆ تيرۆر دەسگيركرا و پاشان ئازادكرا! لەكاتى ئازادكردنى سەرۆكى فراكسيۆنى ھەدەپە پێشوازيان لەو ھاوڵاتييە كرد.
لە ئەيلولى ساڵى ٢٠١٣، كاتێ سەردانى كورتئەڵانم كرد، لەوێ دركم بەوە كرد پێگەى كورد ھەدەپە لەوێ بەھێزە يەك لەو شوێنانەيە زۆرترين بەرخودانى تيايە.
لە ئەدەبياتى دەوڵەتى توركدا قسەيەك ھەيە كە دەڵێت: كورد نييە، كوردستان بونى نييە!
ئاكشەنەر وەك سه‌رۆكی پارتێكى راستڕەو، نه‌ته‌وه‌په‌رستی توركی لەھەوڵى فراوانكردنى دەنگدەرانى پارتەكەيەتى و بۆ ئەو مەبەستەش گەڕى سەردانەكانى بۆ ھەرێمەكانى باكوورى كوردستان چڕكردۆتەوە، بۆ ئەوەى بەشێك لە دەنگدەرى كورد ببات بەتايبەت دەنگى ئەو موحافيزكارەكانى كورد كە پێشتر لايەنگرى ئاك پارتى بوون.
ئاكشەنەر خاوەن مێژوويەكى رەشە لە يادەوەرى كوردى توركيا لەساڵانى نەوەدەكان وەزيرى ناوخۆ بووە ھاورێبازى ده‌وڵه‌ت باخچه‌لی، سه‌رۆكی مه‌هه‌په بووە.
بنچينەى مەرال ئاكشەنەرەكان و باخچەلييەكان بزوتنەوەيەكى راستڕەوى نەتەوەپەرستى توركيان، كار بۆ بزاڤى نەتەوەپەرستى دەوڵەتى تورك و پانتوركيزم دەكەن.
ئەمانە وەك پڕۆژەيەكى سياسى دەوڵەتى قوڵى توركيا لەساڵانى ١٩٧٠ كان ھاتەنێو مەيدانى سياسييەوەو ھەر زوو لە ھەرێمە كوردييەكاندا جۆرە دەسەڵاتێكى ئەمنى و سەربازييان يێدرا، ھەر بۆيە ئەم پارتە دەستيان بە كوشتى كورد سوورە.
مەھەپە، پارتێكى نەژادپەرستى راستڕەوە لەتوركيا و ماوەى ٤٠ ساڵە سياسەت دەكەن، ئەمانە موحافيزكارى توركن و دواڕادە دەوڵتخوازن و كار لەسەر پانتوركيزم دەكەن، بەمەرجێك پرەنسيبە عەلمانييەكەى دەوڵەت لەگەڵ ديندارەكەياندا بگونجێنن، لەھەموو سات و وەختێكدا نەيارى گەلى كورد بوون و درێخيشيان نەكردووە لەوەى لەدەستياندابێت لەدژى كورد كردوويانە.
مەھەپە جەماوەرێكى كەمى لە كوردى توركيا ھەيە! بەتايبەت لەھەرێمەكانى ئەنادۆڵى توركيا، لە ناوەڕاست و باشوورى توركيا، ئەمانە ئەو كوردانەن كە پتر لە سەد ساڵ بەر لەئێستا ئاسميلە بوون و ھەموو پێناسێكى كوردبونيان لەدەستداوە.
مەھەپە بەسەرۆكايەتى دەولەت باخچەلى، ساڵانێك بوو نەيارى ئاك پارتى دەكرد وەك پارتێكى ئۆپۆزسيۆن لەدژى ھەموو ھەنگاوێكى حكومەتى ئاك پارتى دەوەستايەوە، بەڵام لەئێستادا ئەم پارتە بۆتە بەشێك لە ئاك پارتى و ھاوپەيمانێتى و پشتيوانى لە ئاك پارتى و ئەردۆغان دەكات و ھەموو دژايەتيەكى گەلى كورد بەگشتى دەكەن.
لەم رووداوە ئەوەى سەرنجى منى راكێشا دوو شت بوو:
يەكەم: لەمێژووى دەوڵەتى توركدا، ھەر پارتێكى سياسى تورك لە توركيا سياسەتى بكات، پشت بە دەنگدەرى كورد دەبەستێت و لەھەوڵى فريودانى كوردە بە پڕوپاگەندەى جۆراوجۆرەوە بەتايبەت لە ھەرێمەكانى باكوورى كوردستان. كورد ھەر جارە و بە جۆرێك فريودراوە.
لەساڵى ١٩١٩ تا ١٩٢٣ لە شەڕى سەربەخۆيى توركيا كورد پاڵپشتى ئەتا توركى كرد دواتريش كورد ھيچ مافێكى پێنەدرا، ئەوەى ھەشيبوو لەدەستيدا.
دووەم: ھاوڵاتييە كوردەكە بە ئاكشەنەر دەڵێت« ئێمە كوردين و كورد لە توركيا بونى ھەيە، ئەوەتا راوێژكارەكانت كوردن».
ئەمە راستييەكى تاڵە كورد لە توركيا دابەشبووە بەسەر چەند پارت و لايەنێك و ھێشتا كورد ھەيە خزمەت بە ئەجێنداى ئەو پارتە فاشيستانە دەكات.
نمونەى ئەم جۆرە كوردانەش بەدێژايى مێژووى عوسمانى و دەوڵەتى كۆمارى تورك ھەبووە.