مستەفا دادار هونەرمەندێكی زیرەک و بە سەلیقەیە
مستەفا دادار، لای من هونەرمەندێكی زیرەك و سەلیقەدارە، هەم لە بواری خۆیدا تاقانە و دەگمەنە و مەستانە و كێویانە دەچریكێنێت كە بە هەق سەرسامم دەكات، كە دەنگ هەڵدەبڕێت بەنێو كۆی داستانی ئەڤینداری بە زەحمەت بەئاكام گەیشتوو و هەم زۆرینەی ناموراد و بە دڵخوازان نەگەیشوودا سەفەرم پێدەكات، هاوكات بە نێو شاخ و دۆڵ لێرەواڕ و پێدەشت و بنار و گەلی و دەربەند و خەرەند و سروشتی زێدە رەنگینی كوردستاندا دەمگێڕێت، لاوك و حەیران و بەستەی ئەو خۆشخوانە لە هی هیچ كام لە سترانبێژ و حەیرانبێژان ناچێت، ئەم خاوەنی مۆركێكە و سەدا و چەهچەهەیەكە كە شەیدام دەكات بەوەی لەگەڵیدا حەیران و دەیری و دێوانە بم، بە دیدی من ئەم زۆر جاران ئەو (ئیرۆس)ە زیندوو دەكاتەوە دەنێو بەند و بەیتەكان و پەخشانە شیعری نێو حەیرانەكانی كە فتوحات و غەزەواتی عەرەبی بیابان-نشین بەر لە هەزار و چوار سەد ساڵ بە شمشێری زولفەقار كوژراوە، لە بری «ئیرۆس»ی كورد، ئێرۆس-ی جوانی و خۆشەویستی و ڤیان، جەنگاوەرانی ئاسمان «تاناتۆس»یان كرد بە دیاری بۆ ئێمە كە خوداوەندی مەرگ و وەیشوومە و ئافاتە. بوو بەو پادشایەی سەر تەختی دڵی ئێمە تا هەنووكەش ناهێڵێت ژیاندۆست بین. دادار رێك و راست داستان و هەقایەتی زیندووكردنەوەی «ئێرۆس» مان بۆ دەگێڕێتەوە و ناسرەوێت بەو نیازەی لە خەوی مردوانە بێدارمان بكاتەوە.
لە هەمووی جوانتر لای من ئەوەیە كە «دادار» منداڵێك وا دەنێو رۆحیدا، پاك و سادە و خاكەڕا و زێدە ژیانخواز، گەرچی خەمێكی قووڵ وا دەنێو هەر هەناسە و گفتار و رەفتاریدا خۆیان دەنوێنن، ئەم وەك داهێنەرە دەگمەن و دانسقەكانی دونیا، هەوڵی بێوچانی داوە كە نەهێڵێت زەمانە و ساڵانی تەمەن ئەو منداڵە گەورە بێت و جوانی و سەرسامی خۆی لە دەست بدات، چونكە ئەم دەزانێت كە پیربوون واتا تۆران لە جوانی و ئەوین و سەرسامی هەمیشەیی زارۆكەكان، من دەشزانم كە چەندە لەو منداڵەی ناو چیرۆكەكەی «هانز ئاندرسن» دەچێت كە دەمامكی نییە و وەك وەزیرەكان و گزیر و دەستوپێوەندەكانی پادشا ببێت بە هونەرمەندی دەربار و كاسەلێس كە بە شاهنشاهی رووت و قووت بڵێت: ئەڵڵاە .. گەورەم چ بەرگ و پۆشاكێكی ئەفسووناویت پۆشیوە. ئەوەندەی من «دادار» بناسم بۆ هەمیشە بە چاوانی پاكی منداڵێكەوە كە نەیهێشتووە پیر و خەڕۆ و خرف بێت.. دەبێژێت: هۆی پادشا.. ئەتۆ هیچت لەبەردا نییە و ئەتۆ رووت و قووتی!