چایخانەی گەل- شەعب

چایخانەی گەل- شەعب

بە پێنووسی هونەر مەندی خوالێخۆشبوو: عەلی لەتیف 26-02- 2008

ئەم خەڵوەتگە ئەدەبیە نزرگەی سەدان ڕۆشنبیری ئەم شارەیە وبۆتە ( مۆنۆمێنتێكی ) ڕۆشنبیری ئەم شارە,گەر كەسێك سەردانی شاری سلێمانی بكات وسەر لەم چایخانەیە نەدات وەكو ئەوە وایە بچێتە پاریس وسەردانی ( بورجی ئیڤڵ ) نەكات.لەم جۆرە شوێنە ڕۆشنبیری یان هونەریانە لەزۆر ووڵاتانی ئەوروپادا هەن تاوەكو ئەمڕۆ بوونەتە شوێنە تایبەتمەند وبەڕێزەكان بەوەی كۆن فڵان ئەدیب یان شاعیر یان هونەرمەند لێرە كاتی بەسەر بردووە. بۆ نموونە لەشاری (پاریس ) خانووەكەی ( ڕێنوار ) بۆتە (كافیتریا )یەك.گەر بێت وسەردانی بكەیت وبتەوێت قاوەیەك بخۆیتەوە دەبێت سەرەیەك حیجز بكەیت ولەوانەیە بە (3) مانگ سەرەت بەركەوێت.هەروەها ( كاباریە )ی (ئاشە سوورەكە –الگاحونە الحمرا‌و ) لەپاریس كەكاتی خۆی هونەرمەندی كەمئەندام وكوتەباڵا (تۆلۆز لۆتریك ) زۆری ژیانی خۆی لەوێ بەسەر بردووە وبەردەوام وێنەی ئەو سەماكەر وئەكتەر ومرۆڤانەی سەردانی ئەوێیان كردووە كێشاون وهەر بەو یادەوەری یەوە سەردانێكی ئەوێش هەمان كاتی پێدەچێت تا سەرەت بەركەوێت.

تازە ئەم چایخانەیە بۆتە مەڵبەندێكی ڕۆشنبیری ئەم شارە بەوەی سەدان ڕۆشنبیر وئەدیب وشاعیر وهونەرمەند ودۆستەكانیانی لەئامێز گرتووە وئەوانیش بەهاتنیان بۆ ئێرە هەستیان بەجۆرە ئارامیەكی روحی وفیكری كردووە وزۆر لەئەنجامی گفتوگۆ وڕادەربڕین لەسەر بابەتێك چەندەها ئیلهام وبیرۆكەی جوانیان لەلا گەڵالەَ بووە.ئەم چایخانەیە بۆتە مەڵبەندێكی یەكتری بینین ویەكتری ناسین لەنێوان ڕۆشنبیران وهونەرمەنداندا. هیوادارم بەردەوام لەگەشەكردندا بێت وبەوهیوایەی كە لەم خەڵوەتگە پیرۆزەدا یاری دۆمینە نەمێنێت وهەركەسێك هەڵنەستێت وشتیەك هەڵواسێت بەدیوارەكاندا كەڕەنگە زۆری شتەكان لاواز ونەشاو بن بۆ ئێرە... لەگەڵ ڕێز وخۆشەویستیما.

تێبینی: ئەم نووسراوە لەكاتی خۆیدا وێنەیەكیمان نارد بۆ ڕۆژنامەیەك,بەداخەوە بڵاونەكرایەوە.ئێستا وێنە ئۆریجناڵەكەی لەلای پ.د.زاهیر لەتیف كەریم,برا بچووكی هونەرمەند عەلی لەتیف, پارێزراوە.