07-11-2023
راگەیەندراوی هاوبەشی كۆبونەوەی یەكێتی و پارتی
یەكێتی و پارتی لە راگەیەندراوی هاوبەشی كۆبونەوەی ئەمڕۆیاندا جەخت لە پێكەوەكاركردن لەگەڵ لایەنە سیاسییەكانی تر بۆ پاراستنی قەوارەی هەرێم و پاڵپشتیكردنی هەنگاوەكانی حكومەتی هەرێم بۆ دابینكردنی موچە دەكەنەوەو بڕیاریشیانداوە كۆبونەوەكانی نێوانیان بەردەوامیان هەبێت.
ئاوێنە: ئه‌مڕۆ سێشەممە، له باره‌گای مه‌كته‌بی سیاسیی پارتی دیموكراتی كوردستان له پیرمام، كۆبونه‌وه‌ی هاوبه‌شی نێوان یەکێتیى نیشتمانیى کوردستان و پارتی دیموكراتی كوردستان، بەڕێوەچو.
بەپێی راگەیەندراوی هاوبەشی كۆبونەوەكە، له‌كۆبونه‌وه‌كه‌دا بارودۆخی هەرێمى کوردستان و عێراق بەتایبەتى و ڕەوشى هەستیارى ناوچەکە بەگشتى گفتوگۆیان له باره‌وه كراوە.
لە راگەیەندراوەكەدا هاتوە"هه‌ردولا جەختیان لەسەر هەماهەنگى و پێکەوەکارکردن و پێویستى كۆكردنه‌وه‌ی هێزو تواناى سەرجەم هێزو لایەنە سیاسییەکان کردەوە بۆ پاراستنی قه‌واره‌ی هه‌رێمی كوردستان و داڕشتنى ستراتیژیەتێکى هاوبەش کە گونجاوبێت لەگەڵ ڕەوتى ڕوداو و گۆڕانکارییەکانى قۆناغه‌كەو ڕوبەڕوبونەوەى ئاڵنگارییەکان."
بەگوێرەی راگەیەندراوەكە "هەردولا هاوڕابون لەسەر بەهێزکردنى خاڵە هاوبەشەکان و چارەسەرکردنى گیرو گرفتەکان بە ئاڕاستەى بەرژەوەندییە نەتەوەیى و نیشتیمانییەکانى کوردستان."
له ته‌وه‌رێكی دیكه‌ی كۆبونه‌وه‌كه‌دا، پارتی و یەكێتی جه‌ختیان له "پاڵپشتیكردنی هەنگاوەکانى حكومه‌تی هه‌رێمی كوردستان" كردۆتەوە "بۆ دابینكردنی شایسته داراییه‌كان و موچەى موچەخۆرانى هەرێمى کوردستان لە چوارچێوەى دەستورى هەمیشەىی عێراقدا."
هەروەها لە كۆتایی كۆبونەوەكەدا، بڕیاریانداوە کۆبونەوەکان بەردەوامیان هەبێت "بۆ ئەم مەبەستەش ئالیەتێکى گونجاو دیاریکرا."
پارتی و یەكێتی هێمایان بۆ ئەوە كردوە كە کۆبونەوەکەی ئەمڕۆی نێوانیان لە "کەشێکى ئارام و ئیجابیدا" بەڕێوەچوە.
دەقی راگەیەندراوەكە:
ڕاگه‌یاندراوی هاوبه‌شی كۆبونەوەی پارتی دیموكراتی كوردستان و یەکێتیى نیشتیمانیى کوردستان
ئه‌مڕۆ، سێشەممە ٧ی ١١ی 2023، له باره‌گای مه‌كته‌بی سیاسیی پارتی دیموكراتی كوردستان له پیرمام، كۆبونه‌وه‌ی هاوبه‌شی نێوان یەکێتیى نیشتمانیى کوردستان و پارتی دیموكراتی كوردستان، ئه‌نجامدرا.
له‌كۆبونه‌وه‌كه‌دا بارودۆخی هەرێمى کوردستان و عێراق بەتایبەتى و، ڕەوشى هەستیارى ناوچەکە بەگشتى گفتوگۆیان له باره‌وه كرا.
هه‌ردولا جەختیان لەسەر هەماهەنگى و پێکەوەکارکردن و، پێویستى كۆكردنه‌وه‌ی هێزو تواناى سەرجەم هێزو لایەنە سیاسییەکان کردەوە بۆ پاراستنی قه‌واره‌ی هه‌رێمی كوردستان و، داڕشتنى ستراتیژیەتێکى هاوبەش کە گونجاوبێت لەگەڵ ڕەوتى ڕوداو و گۆڕانکارییەکانى قۆناغه‌كەو، ڕوبەڕوبونەوەى ئاڵنگارییەکان.
هەردولا هاوڕابون لەسەر بەهێزکردنى خاڵە هاوبەشەکان و چارەسەرکردنى گیرو گرفتەکان بە ئاڕاستەى بەرژەوەندییە نەتەوەیى و نیشتیمانییەکانى کوردستان.
له ته‌وه‌رێكی دیكه‌ی كۆبونه‌وه‌كه‌دا، جه‌خت له پاڵپشتیكردنی هەنگاوەکانى حكومه‌تی هه‌رێمی كوردستان کرایەوە بۆ دابینكردنی شایسته داراییه‌كان و موچەى موچەخۆرانى هەرێمى کوردستان لە چوارچێوەى دەستورى هەمیشەیى عێراقدا.
لە کۆتاییدا، بڕیاردرا کۆبونەوەکان بەردەوامیان هەبێت و بۆ ئەم مەبەستەش ئالیەتێکى گونجاو دیاریکرا. شایەنى ئاماژەیە کۆبونەوەکە لە کەشێکى ئارام و ئیجابیدا بەڕێوەچو.
یەکێتیى نیشتیمانیى کوردستان پارتی دیموكراتی كوردستان
7/11/2023