کەنەکە: بە یەکگرتوویی دەتوانین ڕووبەڕووی پلانى داگیرکەران ببینەوە
کۆنگرەی نەتەوەیی کوردستان لە راگەیێندراوێکدا سەرکۆنەی هێرشەکەی ئێرانی بۆ سەر هەولێر کرد و رایگەیاند، "داگیرکەرانی کوردستان بە هەموو شێوەیەک پیلانی لەنێوبردنی دەستکەوتەکانمان و سڕینەوەمان بەڕێوەدەبەن".
لەبارەی هێرشەکانی شەوی رابردووی ئێران بۆ سەر هەولێر و گیانلەدەستدانی چوار کەس و برینداربوونی 16ی دیکە، رۆژی سیشەممە 16-01-2024، کۆنگرەی نەتەوەیی کوردستان- کەنەکە، راگەیێندراوێکی بڵاوکردەوە و رایگەیاند، "ئیدانەی هەموو جۆرە هێرش و پەلامارێکی سەر گەلەکەمان و دەستکەوتەکانی دەکەین".
لە راگەیێندراوەکەدا کەنەکە چەند خاڵێکی خستووەتەڕوو، لەنێوەڕۆکیدا داوایکردووە، لە هەموو شارەکان خەڵک بە هەموو جیاوازی و چین و توێژەکانەوە ناڕەزایی دەرببڕن و دژی هەموو هێرش و پەلامارێک بوەستنەوە و لە هیچ شارێکێش رێگرییان لێ نەکرێت.
کۆنگرەی نەتەوەیی کوردستان داوای لە رەوەندی کوردیی لە دەرەوەی وڵات کردووە ناڕەزایی دژی هێرشەکان دەرببڕن. راشیگەیاندووە، "داوا لە کۆمەڵگەی نێودەوڵەتی و هاوپەیمانان دەکەین بێنە دەنگ و سنوورێک بۆ ئەم هێرش و پەلامارانە دابنێن".
کۆنگرەی نەتەوەیی کوردستان - کەنەکە ساڵی 1999 لە هۆڵەندا و لەسەر دەستپێشخەریی پارتی کرێکارانی کوردستان - پەکەکە دامەزراوە و 10 ساڵە لە هەولێری پایتەختی هەرێمی کوردستان مۆڵەتی کارکردنیان وەرگرتووە. زۆرینەی حیزبەکانی کوردستان بە ئەندام لە کەنەکەدا بەشدارن.
دەقی راگەیێندراوەکەی کۆنگرەی نەتەوەیی کوردستان:
راگەیێندراوی كۆنسه‌ی به‌ڕێوه‌به‌ریی کۆنگرەی نەتەوەیی کوردستان لەبارەی هێرشەکانی سەر شاری هەولێر.
داگیرکەرانی کوردستان بە هەموو شێوەیەک پیلانی لەنێوبردنی دەستکەوتەکانمان و سڕینەوەی بوونی نەتەوەییمان بەڕێوەدەبەن، لە باکوور و رۆژهەڵات سیاسەتی نکۆڵیکردن و توانەوە لەناو بۆتەی نەتەوەی سەردەستدا پەیڕەو دەکەن و لە رۆژئاوا و باشووریش پیلانی لەنێوبردنی خۆسەری رۆژئاوا و قەوارەی دەستووریی هەرێمی کوردستان جێبەجێ دەکەن.
لەو چوارچێوەیەدا دەوڵەتانی تورکیا و ئێران رۆژانە لە هێرش و داگیرکاری بەردەوامن، شەوی رابردوو بۆ چەندەمین جار لەلایەن ئێرانەوە بە مووشەک هێرش کراوەتە سەر پایتەختی هەرێمی کوردستان و شوێنی مەدەنی بەئامانج گیراوە، بەو هۆیەشەوە ژمارەیەک قوربانی لێکەوتەوە.
ئێمە لە کۆنگرەی نەتەوەیی کوردستان ئیدانەی هەموو جۆرە هێرش و پەلامارێکی سەر گەلەکەمان و دەستکەوتەکانی دەکەین، بەداخەوە دەسەڵاتی هەرێمی کوردستان تەواوکەری پیلانی دەوڵەتانی داگیرکەرن، بەوەی سیاسەتی پەرتکە و زاڵبە و خوڵقاندنی ناکۆکی نێوان شارەکانیان پەیڕە و کردووە و ئیرادەی خەڵکیان لەبەرامبەر دووژمنانی کورد دا لاواز کردووە، کە تەنیا بەو ئیرادە و یەکگرتووییە دەتوانین رووبەڕووی داگیرکەران ببینەوە و پیلانەکانیان شکست پێ بهێندرێت، بۆیە ئێمە داوادەکەین: 1- لە هەموو شارەکان خەڵک بە هەموو جیاوازی و چین و توێژەکانەوە ناڕەزایی دەرببڕن و دژی هەر هێرش و پەلامارێک بوەستنەوە.
2- دەسەڵاتی هەرێمی کوردستان لە هیچ ناوچەیەک رێگری لە دەربڕینی ناڕەزایی گەل نەکات دژی داگیرکەرانی ئێران و تورکیا بێت، داوا لە رەوەندی کوردیش دەکەین ناڕەزایی فراوان دەرببڕن و وەک هەمیشە پشتیوانی ناوەوە بن.
3- داوا لە کۆمەڵگەی نێودەوڵەتی و هاوپەیمانان دەکەین بێنە دەنگ و سنوورێک بۆ ئەم هێرش و پەلامارانە دابنێن.
4- بەپێی دەستوور ئەرکی سەرۆکایەتییەکانی عێراقی فیدڕاڵ و دامەزراوە فەرمییەکانی هەرێمی کورستانە سەروەریی خاک و خەڵک بپارێزن و رێگەنەدن لەژێر هیچ پاساوێکدا پێشێل بکرێت و ناوچەکە بکرێتە مەیدانی شەڕ و یەکلاییکردنەوەی ناکۆکییەکان و لاوازکردن و لەنێوبردنی دەستەکەوتەکانی گەلەکەمان، پێویستە سەرۆکایەتییەکانی عێراق و حکومەتی ئیتیحادی لە ناوخۆ و دەرەوە ئەرکی دەستووریی خۆیان جێبەجێ بکەن.
پارت و لایەنە دەسەڵاتدار و ئۆپۆزیسیۆنەکانی کوردستان دەبێت ئەو راستییە باش بزانن، هیچیان بە پشتیوانی دەوڵەتانی دراوسێ ناتوانن بمێننەوە، بۆیە دەبێت یەک و یەکگرووتووبن و لەناوخۆدا کێشەکانی خەڵک چارەسەر بکەن و بنەماکانی دیموکراسی و حوکمی رەشید پەیڕەو بکەن، هاوکات لەسەر ستراتیژێکی نیشتمانیی نەتەوەیی رێکبکەون، ئەگەر وانەکەن دەبنە هۆکاری لەنێوچوونی قەوارەی دەستووریی هەرێمی کوردستان و پیلانی دوژمنان تەواو دەکەن.
ئێمە لە کۆنگرەی نەتەوەیی کوردستان لە هەموو کارێکی نیشتمانی و نەتەوەییدا، وەک هەمیشە هاوکار و پشتیوان دەبین.
رۆحی قوربانییەکان شاد بێت.. هیوای چاکبوونەوە بۆ بریندارەکان دەخوازین.
کۆنگرەی نەتەوەیی کوردستان كۆنسه‌ی به‌ڕێوه‌به‌ریی
16/01/2024 بروكسل