سلێمانی - گڵكۆی مەستورەی ئەردەڵان

دوای تێپەڕبوونی 165 ساڵ بەسەر كۆچی دواییدا، گڵكۆی مەستورەی ئەردەڵان لە گۆڕستانی گردی سەیوان لە شاری سلێمانی دەدۆزرێتەوەو لەلایەن مۆزەخانەی نیشتمانی ئەمنە سورەكەوە نوێدەكرێتەوە.

ئەمڕۆ 06-08-2013 لە گۆڕستانی گردی سەیوان لە شاری سلێمانی، بە ئامادەبوونی خاتوو هێرۆ ئیبراهیم ئەحمەد، هاشم عەبدوڵڵا بەڕێوەبەری مۆزەخانەی سلێمانی، خاتوو كافیە سلێمان سكرتێری یەكێتی ژنانی كوردستان، نوێنەرانی پارێزگار و بەڕێوەبەرایەتی پەروەردەی سلێمانی، ژمارەیەك لە رۆشنبیران و میدیاكاران، دوای نوێكردنەوەی، دۆزینەوەی گڵكۆی مەستورەی ئەردەڵان بەڕەسمیی راگەیەندرا.

ئاکۆ غەریب بەڕێوەبەری مۆزەخانەی ئەمنە سوورەکە بە PUKmedia ی راگەیاند: سەرەتا لەڕێگەی ئەحمەد خواجەوە زانراوە كە گۆڕی مەستورەی ئەردەڵان لە شاری سلێمانییە، دواتر لەڕێگەی هاشم عەبدوڵڵا بەڕێوەبەری مۆزەخانەی سلێمانییەوە توانرا دڵنیابینەوە كە گڵكۆی مەستورەی ئەردەڵانی لە گۆڕستانی سەیوانە لە شاری سلێمانی.

ناوبراو وتیشی: گڵكۆی مەستورەی ئەردەڵان لەلایەن مۆزەخانەی نیشتمانی ئەمنە سورەكە و بە هاوكاری خاتوو هێرۆ ئیبراهیم ئەحمەد و مۆزەخانەی سلێمانی نوێكراوەتەوە.

مەستورەی ئەردەڵان لە ساڵی 1805 لە شاری سنە لە دایك بووە و لە ساڵی 1848 لە شاری سلێمانی كۆچی دوایی كردووە، دوای تێپەڕبوونی 165 ساڵ بەسەر كۆچی دواییدا، توانرا گڵكۆكەی بدۆزرێتەوە.