کاوە گەرمیانی

ئامادەکردنی: سەباح عەلی جاف کاوە ئەحمەد محەمەد، ناسراو بە کاوە گەرمیانی لە وڵاتی ئێران لە شاری رەشت لە ئاوارەیی لە ساڵی 1979 لە دایک بووە.

پاش بە رێکردنی تەمەنیک لە ئاوارەیی دێنە باشوری کوردستان و لە شاری کەلار نیشتەجێ دەبن، کاوە گەرمیانی لە تەمەنی پێنج (5) ساڵی واتا لە ساڵی 1984 دەخرێتە بەر خوێندن و چاوەکانی بە خوێندن و خوێندەواری لە قوتابخانەی (نیزال)ی پێشتر و (مرواری) ئێستا قوناغی سەرەتای تەواو دەکات، لە قۆناغەکانی خوێندندا تا پۆلی (دووەمی ناوەندی) دەبڕێت و پاشتر لەبەر قورسی گوزرەرانی ژیان دەست لە خوێندن هەڵدەگرێت و روو لە کار و کاسبی دەکات لە پێناو مانەوە لە ژیان بۆ خۆی و خانەوادەکەی بەتایبەت پاش ئەوەی کە باوکی کۆچی دوای دەکات، بەمەیش قورسای خێزانەکەی دەکەوێتە ئەستۆ و له و پێناوەدا روو لە چەندین کار و کاسبی قورس دەکات و ژیانی بە هەژاری دەگوزەرێنێت. \\ له و دەمەی کە بارودۆخی ئابوری و سیاسی کوردستان لە نەوەدەکانی سەدەی رابردوودا رووی لە خراپی کردبوو، ئەمەیش وای لە زۆرێک لە هاوڵاتیان بە تایبەت گەنجان کرد کە روو لە هەندەران بکەن لە پێناو ژیانێکی باشتر و به و شێوەیش کاوە گەرمیانی بۆ چەندین جار رێگەی هات و نەهاتی هەندەران تاقی کردوەتەوە بۆ ئەوەی لە ژیانی کوللە مەرگی کوردستان رزگاری ببێت، بەڵام لە هەموو جارەکاندا سنورداش دەکرێتەوە و نەیتوانیەوە به و ئاواتەی بگات و هەموو جارەکان دیتەوە نیو خانوە قوڕێنەکەی و ژیانە هەژارانەکەی دەست پێ دەکاتەوە.

کاوە گەرمیانی جگە لە زمانی کوردی ئاشنای زمانەکانی تری (فارسی و عەرەبی) بووە و توانیویەتی له و رووە سودی لێ وەر بگرێت، پێش ئەوەی کاوە گەرمیانی بێتە نیو دنیای رۆژنامەگەریەوە بە شیعر نوسین دەستی پێ کردووە و خۆی بە شیعرەوە خەریک کردووە، به و شێوەیە دەردەکەوێت لە رێگەی شیعرەوە تێکەڵی دنیای مەعریفە بووە هەربۆیە لە ساڵی 2002 تێکەڵی دینای رۆژنامەگەری دەبێت، سەرەتای کاری رۆژنامەگەری بە وینەگرتن دەستی پێ کردووە واتا (فۆتۆ جۆنالیست) و له و رێگەوە هەوڵی دەدا وێرانی و کەم و کوڕییەکان پیشانی هەموان بدات، پاشتر زیاتر لە بواری رۆژنامەگەریدا رۆچووە و چەندین راپۆرات و هەواڵی رۆژنامەنوسی ئامادە کردووە و لەگەڵ زۆرێک لە رۆژنامە و سایتەکاندا کاری کردووە، لە ساڵی 2007 بە دواوە بە شێوەیەکی فەرمی دەبێت بە پەیامنێر لە هەریەکە لە (سایتی ئاوێنە) و (رادیۆی ئازادی) و لێرەیشەوە زیاتر تێکەڵی کاری رۆژنامەنوسی بووە و زۆر تر کارەکانی بۆ بەدواداچوون بووە لەسەر کەندەڵی و کەم و کوڕییەکانی کۆمەڵگە بە تایبەت لە سنوری گەرمیان، هەر له و کاروانەدا بوەتە پەیامنێری هەریەکە لە رۆژنامەکانی (ئاوێنە، کوردستان راپۆرت، رێگای کوردستان و گەرمیانی ئەمڕۆ).

کاوە گەرمیانی رۆژنامەنوس بۆ زیاتر کارکردن و خۆ تەرخان کردن بۆ هەڵماڵینی کەم و کوڕی و گەندەڵیەکان بیری لە دەرکردنی رۆژنامە و بڵاوکراوەی تایبەت و سەربەخۆ لە سنوری گەرمیان کردووە هەر بۆیە لە ساڵی 2011 کتێبێکی چاپ و بڵاوکردەوە لە ژێر ناونیشانی (گەرمیان لە نێو بەڵگەنامە رەشەکاندا)، پاشتر لە ساڵی 2012 بوو بە سەرنوسەری گۆڤاری (گەڕان) و درێژەی بە کاری رۆژنامەگەری خۆی داوە، لە 10-09-2012 بوو بە خاوەن ئیمتیاز و سەرنوسەری گۆڤارێکی تر بە ناوی (رایەڵ) کە تا ساتی تیرۆر کردنی توانی (14) ژمارە له و گۆڤارە بڵاوبکاتەوە کە هەر بۆ خۆی زۆر ترین کارەکانی بە ئەنجام دەگەیاند، کاوە جگە لە کاری رۆژنامەنوسی کەسێکی چالاکیش بووە لە بواری کۆمەڵگەی مەندەنیدا هەر بۆیە لە زۆرێک لە خۆپیشاندان و نارەزاییەتیەکاندا رۆڵی هەبووە تەنانەت لەسەر کاری رۆژنامەنوسی چەندین جار توشی دەردەسەری و هەڕەشە و گرتن و لێدان بووەتەوە و تەنانەت له و پێناوەدا (لوتی) لە لایەن هێزە ئەمنیەکانەوە شکێنراوە، کاوە گەرمیانی ئەندامی کارای سەندیکای رۆژنامەنوسانی کوردستان و ئەندامی فیدراسیۆنی رۆژنامەنوسانی جیهان بووە.

کاوە گەرمیانی و سەردەشت عوسمان

کاوە گەرمیانی لە ژیانی کۆمەڵایەتیدا کەسێکی ناسراو و هاوڕێ و دۆستی رۆژنامەنوسان بووە، کاوە گەرمیانی لە 12-12-2012 ژیانی هاوسەر گیری لەگەڵ خاتوونی رۆژنامەنوس و کەس و کاری ئەنفالکراو (شیرین ئەمین) پێک دێنێت و ژیانێکی سادە و هەژارانە لە نێو خانویەکی قوڕدا دەگوزەرێنێت، لەسەر هەڵوێست و نوسینەکانی مەخابن لە شەوی 5-12-2013 رۆژنامەنوس کاوە گەرمیانی لە ماڵەکەی خۆیدا بەر دەست رێژی کوللە دەدرێت و شەهید دەکرێت و بۆ رۆژی پاشتر لە نێو ئاپۆڕای هاوڵاتیان و رۆژنامەنوساندا بە دروشمی (ئازادی، ئازادی) لە گۆڕستانی (کەلاری کۆن) بە خاک دەسپێردرێت، شەهید کاوە لە پاش خۆی جگەر کۆشەیەکی بەناوی (ئامەد) دەبێتە ئومێد بۆ هاوڕێ و کەس و کارەکەی، ساڵانە لە (5-12) دا لەسەر تاسەری کوردستان و گەرمیاندا لە رۆژی شەهید کاوەدا چەنیدن چالاکی بەڕێوە دەچێت، وەک نەریتێکش لە کەلار ساڵانە بۆ یادی شەهید کاوە چەندین چالاکی بەڕێوە دەچێت و (خەڵاتی شەهید کاوە) بە کەسێکی چالاک دەبەخشرێت، دورد بۆ گیانی پاکی شەهیدانی قەڵەم و شەهید کاوەی هەمیشە رێباز زیندوو، شەهید کاوە پێت دەڵێین (هەمیشە لە یادمانی).