حەمید رەشاش

مام حەمید تێكۆشەرو فۆلكلۆریست ،كەسایەتیە كۆمەڵایەتیەكەی قەڵاو منارە و خۆشەویستی هەموومان..

ناوی تەواوی: حەمید حسێن تەها مەولوودە ، بە ( مام حەمید رەشاش) ناسراوە.

ساڵی ( 1931)، لەگوندی (قەیباشی) خوار شارۆچكەی پردێ لەدایكبووە.

لە رۆژی 16-09-1961 لە كاتی سەربازیدا ( رەشاش)ێك دەبات و دەچێت پەیوەندی بە شۆرشی ئەیلولەوە دەكات

هەروەک خۆی دەیگێرێتەوە :

کەبووم بە پێشمەرگە، ڕەشاشێکم لەگەڵ خۆمدا برد، ڕەشاشێک کە تا ئەوکاتە لەناو شۆڕشدا نەبوو.

مانگی یانزە ساڵی ۱۹٦۱ مام جەلال و عومەر دەبابە لە گوندی شیوەشان بوون، ئێمەیان دانا بۆ کارێکی پێویست لە کۆیە، بەڕێکەوت لەو جێگەیە شەش کەس ناوی حەمید بوو، هەر حەمید ناوێکیان بانگ دەکرد، سێ چوار حەمید وەڵامی دەدایەوە!

ئیتر مام جەلال وتی ئەمە وانابێت، ئێستا هەرکەس نازناو و لەقەبی بۆ دادەنێین، منی بە حەمید ڕەشاش ناونا.

ساڵی 1964 لە تەك باڵی مەكتەبی سیاسیدا دەچێت بۆ هەمەدان.

لەراپەرینی زستانی 1991دا رۆڵی لەئازادكردنی شاری هەولێردا هەبوو..

كەسایەتیەكی خۆشەویستی شاری هەولێری ئازیزە.

مام حەمید خاوەنی ( 3 ) پەرتووکە چاپكراوە بەناوەكانی :

1- پەندی كوردی 2010

2- ژیانی كوردەواری 2011

3- هەوارگەی وشەو كەلەپووری كوردەواری 2012

زۆر بەداخەوە سەرلەبەیانی رۆژی هەینی (22-01-2022) كۆچی دوایكرد.

سەرچاوە: ڕێبوار حەمەتۆفیق و محەمەد مەردان