فەخرەدین حاجی سەلیم تەوێڵەیی

ساڵی1949 لە تەوێڵە - هەورامان لەدایکبووە.

خوێندنی لە تەوێڵە و هەڵەبجە و سلێمانی خوێندووە،پەیمانگەی مامۆستایانی تەواو کردووە و بووەتە مامۆستا و ماوەیەک لە قوتابخانەی شنروێی سەرەتایی لە هەڵەبجە و زۆرێک لەگوندەکان و قوتابخانەکانی ناوچەکەدا وانەی وتۆتەوە جگەلە مامۆستایی و وانەبێژی، نوسەر و هونەرمەند و پەیکەرتاش و وێنەکێش بووە و دەیان بەرهەمی هەیە.

لە کیمیابارانی هەڵەبجە لە 16-03-1988، سێ منداڵی شەهید دەبن و دوو منداڵی بێسەروشوێنن و خێزان و و دوو مبداڵی تریشی بریندار دەبن و تا ئێستاش تەندروستیان بە تەواوەتی چاک نەبووەتەوە.

بەردەوام لە سۆراغی منداڵەکانیدا بووە و لەگەڵ هاورێکانی کۆمەڵەی قوربانیانی هەڵەبجەیان دامەزراند.

وەک یەکێک لە شایەتحاڵەکان لە دادگای عێراقی بەشداری کردووە بۆ شایەتیدان دژی تاوانەکانی سەدام حسێن و عەلی حسن مەجید دەرئەنجام بە هۆی ئاسەوای کیمیابارنی هەڵەبجەوە، لە 11-09-2009 دڵە پاکەکەی مامۆستای گەورەی هونەر و جوانی هەورامان و ناسکی هەڵەبجە لە لێدان کەوت و کۆچی دواییکرد و گوڵەهەنار و چڵە هەنجیرەکانی بە بێنازی بەجێهێشت بە بێ ئەوەی بە ئاواتی دۆزینەوەی منداڵە بێسەروشوێنەکانی بگات.

لە ساڵوەگەری وەفاتەکەیدا و لە باخی گشتی هەڵەبجە لە ساڵی 2019 پەیکەری چاوەروانی بۆ دروست کرا.