ئەنوەر مەجید سوڵتان

‎ملازم ئەنوەر مەجید سوڵتان (1944-1979)، جگە لەوەی سەرلقێكی بوێری شۆڕشی ئەیلول بوو، لەسەرەتای شۆڕشی نوێشدا، لەگەڵ هاوڕێ‌ ئەفسەرەكانی (ملازم عومەر، سەرداری سەعید خەڵەف، جوامێر سامیرو خۆی) پەیوەندییان لەڕێگەی كۆمەڵەوە پێوە كرا. دەستبەجێ‌ ئامادە بوون لە ریزی یەكەمین مەفرەزەكاندا، پێشمەرگە بن. یەكە یەكە بەڕێ‌ دەكران.. ملازم عومەرو ملازم جوامێرو ئەنوەری مەجید سوڵتان، بەندە بەڕێم كردن، لەڕێی دێی (خەمزە)وە بۆ لای هاوڕێیانی كۆمەڵە (حامید)‌و (حاجی سمایل) پەیوەندییان بە مەفرەزەكانەوە دەكرد. ‎ملازم ئەنوەر مانگی 9/ی 1976، لەماڵی كاكە (سوارە ئەحمەد عارف-ئێستا لەمانهایمە) بەڕێم كرد. بە رێكەوت توانیبومان تەنها دكتاریۆفێك پەیدا بكەین‌و بیدەینێ‌. لە توی مەلیكەوە بەسەر ئەزمەڕو بەرەو دێی خەمزە، بۆ ملازم ئەنوەر كە لەمانگی 3/ی 1975وە بۆ خوارووی عێراق دورخرابوەوە، زۆر قورس بوو بەسەر شاخدا سەربكەوێ‌. بەڵام شێرئاسا هەڵیگرت‌و شەو بەڕێ‌ كرا. ‎كە چووبووە دەرەوەو دۆخی شێواوی مەفرەزەكان‌و نەبونیی‌و بێ دیسپلینی دیبوو، بێتاقەت بوبوو. بەڵام پشووی شۆڕشگێڕانەی بەرنەدا. ‎بەندە، هەتا ناوەڕاستی مانگی چواری 1978 نەمدییەوە. لە نۆكان‌و لەكاتی ئامادەسازی بۆ هەڵمەتی هەكاری، بینیمەوە. كاك رەسول مامەندو مەكتەبی سیاسی سۆسیالیست، بە نیگەرانیەوە لە خڕی نێر زەنگ بوون.. مام جەلال‌و عەلی عەسكەری‌و هەڤاڵانی تریش لە نۆكان بوون.

‎نۆكان، شانۆی سازدانی پێشمەرگەكان بوو بەرەو هەكاری. مام جەلال، عەلی عەسكەری، د.خالید، نەوشیروان مستەفا، د.مەحمود عوسمان، عەدنان مفتی، حاجی حاجی برایم، قادری مەمەند ئاغا، سەید كاكە، ئازاد هەورامی، ملازم عومەر، ملازم تایەر، رەئوف بەگ، شێخ حسێنی ئێزیدی، حەمەی حاجی مەحمود، حامیدی حاجی غالی، خاڵە نەبەز، عوسمانی قالە منەوەر، شێخ عەلی، تاڵب رۆستەم، بەكری حاجی سەفەر، ئەبو شیهاب.. تاد، هەمویان لەوێ‌ بوون. ئیدی مەفرەزە مەفرەزە، لە سەرانسەری كوردستانەوە دەهاتن، ھەر دەتگوت بۆ شایی سەرکەوتن دەرۆن بەلام، نەیاندەزانی تراژیدیایێکی بێوێنە چاوەروانیان دەکات. لە شێنێ‌، قوڵە هەرمێ‌، رەزگە، مارە دوو، بێدەلان، هەتا دەگاتە كانی زەردو ئەڵوەتانیش، پێشمەرگە لە حەوانەوەو هاتوچۆدا بوون. یەكەمین كۆبونەوەی فراوانی كۆمەڵەش لە نەورۆزی 1978 دوای شەهیدكرانی ئارام، هەر لەوكاتەدا كرا. ‎ملازم ئەنوەر.. مەخزەنێكی (75) فیشەكی بە كڵاشینكۆفەكەیەوە بوو، بە نیگەرانیەوە دەیڕوانییە دۆخەكە. چەند جارێك منی بانگ دەكردو رەخنەی ناخی خۆی لەسەر دۆخەكە دەردەبڕی. هەر ئەوكاتە بڕیاری دا، بێلایەن بێ‌. مام جەلال‌و عەلی عەسكەری دڵیان دەدایەوەو لەژوورەكەی خۆیاندا، پێكەوە دەخەوتن. كە تەنها دوو ژوری لێ بوو.. ژورەكەی دیكە بۆ پێشمەرگەكان بوو.

‎هەڵمەتی هەكاری 14/4/1978 بەڕێ‌ كەوتن. من‌و شیروان شیروەندی‌و مەفرەزەكانمان بەرەو هەورامان كەوتینەرێ‌. ‎ملازم ئەنوەر.. هەروەكو بڵێی ترسی هەڵمەتی هەكاری لێ نیشتبێ‌. دڕدۆنگ كەوتە ناو قافڵەكە. ئیتر كارەساتەكە رویداو ئەمیش گیرا و دوچاری زیندان‌و چەرمەسەر لای پارتی‌و لە ئێران هاتبوو. هەتا جارێكی دیكە، دوای راپەڕینی گەلانی ئێران، هاتەوە ناو پێشمەرگەو لە یەكەمین بڕیاری بەرەنگاری رۆژهەڵاتی كوردستاندا، شەهید ئەنوەر.. لەسەر داوای دیموكرات‌و كۆمەڵە، لە بەرەی بانە، سەنگەر دەگرێ‌‌و سەرپەرشتی شەڕگەیەك دەكات. لەو شەڕەدا لە پردی (دوئاوان) لەنێوان سەقزو بانەی خۆشەویستدا (2/9/1979) گیانی بەخت دەكات‌و لە بلەكێ‌ بە كاتیی دەنێژرێ‌. دوایی دەهێنرێتەوە سلێمانی!

‎ئەوەندەی من زانیاریم هەبێ‌.. شەهید ئەنوەر، لەدوای چونە دەرەوەی بە ماوەیەكی كەم.. وەكو فەرماندەیەكی بێلایەن خەباتی دەكرد.پاشان چوە پاڵ سوشیالیست. كە لە زیندانی ئێرانیش هەڵدێ‌‌و خۆی دەگەیەنێتە پێشمەرگەكانی دیموكرات‌و كۆمەڵە، هەروەكو فەرماندەیەكی کوردستانی گیانی فیدا دەكات. رێزی هەموو لایەنێكی دەگرت. لە بیروباوەڕدا کوردایەتی زاڵ بوو بەسەریدا.. خۆیشی بە هاوتای زۆرێك لە سەركردەو فەرماندەكان نەدەزانی.. هەتا بە سەركردەیان بزانێ‌. زۆرتر هاوڕێی ملازم عومەر، پاشان ملازم مەنسورو ملازم كەریمی پاسۆك بوو. ئەو بەسەربڵندییەوە، شەهیدی هەموو كوردستانە. بۆیە یەکێتی نیشتمانی کوردستان خۆیو ملازم سەرداری سەعید خەڵەف، وەکو دوو فەرماندەی گەورەی یەکێتی خانەنشینی کرد. شەھید ئەنوەر

‎كێلەكەی بەرزە.. سەربەرزیشە لە شەڕی ناوخۆدا، شەھید نەكراوە. یادو یادەوەری لە ویژدانداو لە دووتوێی مێژووی راستەقینەی پێشمەرگایەتیدا ، هەر دەمێنێ