کۆهەواڵی بۆردمانەکانی سوپای داگیرکەری ئێران 22 موشەک ئاڕاستەی بارەگاکانی حزبی دیموکراتی کوردستانی ئێران و کۆمەڵە کراوە
'ئەمرۆ رێکەوتی 28-09-2022
وەزیری تەندروستی ژمارەی قوربانیانی بۆردومانەكانی كۆماری ئیسلامی ئێرانی بڵاوكردەوە'
کۆی گشتی برینداران گەیشتە 24 بریندار و 7 شەهید بەم شێوەیە:
14 بریندار و 4 شەهید لە کۆیە
10 بریندار و 3 شەهید لە میحوەری پردێ
پێشبینی هەبوونی شەهیدانی زیاتر دەکرێ و تیمەکانی ئەمبوڵانس ئاستەنگی زۆریان هەیە ناهێڵن بە تەواوی بچنە شوێنی ڕوداوو و بریندارەکان.
د. سامان بەرزنجی وەزیری تەندروستی[١]
پارتی ئازادیی کوردستان: 6 شەهید و 27 بریندارمان هەیە
گوتەبێژی هێزه‌كانی پارتی ئازادیی کوردستان (پاک) رایگەیاند، بەهۆی بۆردوومانی مووشەک و درۆنەکانی ئەمڕۆی ئێرانەوە بۆ سەر بارەگاکانی ئەوان لە نزیک پردێ "6 پێشمەرگەیان شەهید بوون و 27یشیان بریندار بوون".
رۆژی چوارشەممە، 28ـی ئەیلوولی 2022، ئەردەڵان خوسرەوەی، گوتەبێژی هێزه‌كانی پارتی ئازادیی کوردستان (پاک)، سەبارەت بە هێرشەکەی ئەمڕۆی ئێران بۆ سەر بارەگانیان لە ناوچەی شێراوای نزیک شارۆچکەی پردێ بە تۆڕی میدیایی رووداوی راگەیاند: "ئێمە زۆر بە ئاگاییەوە مامەڵە لەگەڵ دۆخەکەدا دەکەین و لە ئامادەباشیداین بۆ هەر ئەگەرێک، هێزەکانمان دامەزراندووەتەوە، ئێستا درۆنەکان دەنگیان نایەت و نایانبینین، بەڵام بەدڵنیایەوە وەڵامی خۆمان بۆ ئەو هێرشانە دەبێت."
خوسرەوی گوتی: "لە پشتیوانیکردنی برایانمان لە رۆژهەڵات پاشگەزنابینەوە، ئەوان لەوێ خۆپێشاندان دەکەن دژی ستەم و ئێمەش لێرە قوربانی دەدەین و بەردەوام دەبین لە چالاکییەکانمان".
ئەمڕۆ چوارشەممە، 28ـی ئەیلوولی 2022، سوپای پاسدارانی ئێران چەند جارێک لە رێگەی مووشەک و درۆنەوە هێرشیکردە سەر بنکە و بارەگاکانی لایەنەکانی رۆژهەڵاتی کوردستان لە کۆیە، زڕگوێز و شێراوە. هەروەها ماوەی چەند رۆ‌ژێکیشە بنکە و بارەگاکانی ئەو حیزبانە لە ناوچە سنوورییەکان بۆردوومان دەکات.
بەگوێرەی ئامارە فەرمییەکانی حکومەتی هەرێمی کوردستان، تاوەکو ئێستا لە هێرشە مووشەکی و درۆنییەکانی ئێران 9 کەس گیانیان لەدەستداوە و 32ی کەسیش بریندارن.[٢]
سوپای پاسداران هەڕەشەی بەردەوامیی هێرشەکان دەکات
سوپای پاسدارانی ئێران بەرپرسیارێتی خۆی لە هێرشە موشەکی و درۆنییەکانی بارەگای حزبەکانی رۆژهەڵاتی کوردستانی راگەیاند و هەڕەشەی بەردەوامیی هێرشەکانی کردووە.
سوپای پاسداران ئەمڕۆ (چوارشەممە 28ـی ئەیلول) لە بەیاننامەیەکدا، رایگەیاند، "ئۆپەراسیۆنەکان تا لەناوبردنی هەڕەشە و بارەگای گرووپە تیرۆریستییەکان و پابەندی بەرپرسانی هەرێم بە بەرپرسیارێتیان، بەردەوام دەبن".
لەو بەیاننامەیەدا، باس لە کاریگەریی حزبەکانی رۆژهەڵات لە ناڕەزایەتییەکانی ئەمدواییەی رۆژهەڵاتی کوردستان و ئێران کراوە و هاتووە، "لەشکری حەمزەی هێزی وشکانی سوپای پاسداران، هێرشی تۆپخانەیی و درۆنی چڕی کردە سەر بارەگای دوژمنانی نەتەوە".
ئەمڕۆ بارەگا و کەمپی نیشتەجێبوونی خەڵکی سڤیلی حزبی دیموکراتی کوردستان لە کۆیە، کۆمەڵەی زەحمەتکێشانی کوردستانی ئێران لە سلێمانی و پارتی ئازادی کوردستان (پاک) لە پردێ، بوونە ئامانجی هێرشی درۆنی و تۆپخانەیی ئێران.
بە پێی ئامارە سەرەتاییەکان بە هۆی ئەو هێرشانەوە تا ئێستا نۆ کەس گیانیان لەدەستداوە و نزیکەی 25 کەسیش بریندارن.[٣]
'
ئێران بە درۆن بارەگاکانی کۆمەڵە لە زڕگوێز بۆردومان دەکات'
كه‌مێك له‌مه‌وبه‌ر رێکەوتی ٢٨-٠٩-٢٠٢٢ ژماره‌یه‌ك درۆن گه‌یشتنه ئاسمانى سلێمانى‌و له‌ئێستادا بۆردومانى باره‌گاكانى كۆمه‌ڵه ده‌كه‌ن له‌گوندى زڕگوێز.
ئاوێنە: كه‌مێك پێش ئێستا چەند درۆنیک گه‌یشتونه‌ته ئاسمانى سلێمانى‌و ڕاسته‌وخۆ چونه‌ته سه‌ر گوندى زڕگوێز كه باره‌گاكانى كۆمه‌ڵه‌ى زه‌حمه‌تكێشانى لێیه.
به‌وته‌ى دانیشتوانى گونده‌كان، بۆردومانی بنکەو باره‌گاكانى کۆمەڵە ده‌ستى پێكردوه‌و له‌لایه‌ن پێشمه‌رگه‌كانى كۆمه‌ڵه‌ش ته‌قه له‌درۆنه‌كان ده‌كرێت.
بە گوێرەی زانیارییە، دەنگی بۆردومانێكى چڕ لەنزیک بنکەکانی کۆمەڵە دێت، بەڵام تائێستا زیان نەزانراوەو تائیستاش بۆردومان هه‌ر بەردەوامە.
ئه‌مه‌ش له‌كاتێكدایه، بۆردومانى ئێران بۆسه‌ر هه‌رێمى كوردستان بۆ پێنجه‌م ڕۆژى له‌سه‌ریه‌ك به‌رده‌وامه‌و پێشتر ئێران هۆشداریدابوو له‌بۆردومانى بنكه‌و باره‌گاكانى كۆمه‌ڵه‌و دیموكرات‌و هێزه كوردیه‌كان‌و داواى له‌دانیشتوانى ده‌وروبه‌رى باره‌گاى ئه‌و هێزانه كردبوو، دوربكه‌ونه‌وه، چونكه هێرشیان ده‌كرێته‌سه‌ر.[٤]
ئێران چەند بنکە و بارەگایەکی حیزبەکانی رۆژهەڵاتی کوردستان بۆردوومان دەکات
بەیانیی ئەمڕۆ چوارشەممە، ئێران بۆردوومانی چەند بنکە و بارەگایەکی حیزبەکانی رۆژهەڵاتی کوردستانی لە هەرێمی کوردستان کرد، حوسێن یەزدان پەنا، سەرۆکی پارتی ئازادیی کوردستان بە رووداوی راگەیاند، "شەهید و بریندارمان" هەن.
هاوکات ئارام مودەریسی، ئەندامی کۆمیتەی ناوەندی کۆمەڵەی زەحمەتکێشانی کوردستانی ئێران بە تۆڕی میدیایی رووداوی راگەیاند، بەیانیی ئەمڕۆ چوارشەممە، ئێران بە درۆن بۆردوومانی کردوون و "زیانی گیانیمان نییە." بە گوتەی ئارام مودەریسی، "چوار ماڵ و بارەگا" زیانیان پێگەیشتووە.
لەلایەکی دیکەوە، بەپێی ئەو ڤیدیۆیانەی بۆ رووداو نێردراون، لە کۆیە و سنووری قەڵادزێش بۆردوومان هەبوون.
تاریق حەیدەری، قایمقامی کۆیە لەبارەی دوایین زانیاریی قوربانییەکانی بۆردوومانەکانەوە بە رووداوی راگەیاند، "تاوەکو ئێستا دوو کەس گیانیان لەدەستداوە و 12 کەسیش بریندار بوون."
قایمقامی کۆیە باسی لەوەش کرد کە "بە 22 مووشەک" بارەگاکانی حیزبەکانی رۆژهەڵاتی کوردستان لە کۆیە بۆردوومان کراون و تیمە تەندروستییەکان لە ئامادەباشیدان و بریندارەکان دەگوازنەوە.[٥]
شەش مووشەکی دیکە ئاراستەی بارەگاکانی حیزبی دیموکرات لە قەزای کۆیە کران
دوای بۆردوومانەکانی پێشنیوەڕۆی ئەمڕۆی هێزە کوردییەکان رۆژهەڵاتی کوردستان لە کۆیە، زڕگوێز و شێراوا، ئێران شەش جاری دیکە کۆیە و شەش جاریش شێروای لە پردێ بۆردوومان کردەوە.
نزیک کاژێر 01:30 خولەکی پاشنیوەڕۆی رۆژی چوارشەممە، ئێران جارێکیتر شێراوای بۆردوومان کردەوە، رەنجە جەمال نێردراوی رووداو بۆ شوێنی بۆردوومانەکە گوتی: "بەچڕی شەش جار نێو بارەگاکەی [بارەگای پارتی ئازادی کوردستان- پاک] بۆردوومان کردەوە، ئەوەی باس دەکرێت لەنێو بارەگاکەدا شەهید و بریندار هەن؛ تیمی رۆژنامەڤانیش لەوێ بوون و ویستویانە ئەوێ جێبهێڵن بەهۆی بۆردوومانەوە نەیانتوانیوە بگەڕێنەوە؛ ئێمە بۆ کڕینی هەندێک پێداویستی هاتینە سەر شەقامەکە و شوێنەکە بۆردوومانکرا."
رەنجە جەمال گوتیشی: "لەگەڵ هاوکارێکی رۆژنامەڤانم قسەمکرد کە لەوێ بریندارە و ئەو گوتی: لەنێو پێشمەرگەکانیشدا قوربانی هەیە."
هاوکات فەرهاد دۆڵەمەڕی نێردراوی رووداو لە کۆیە گوتی، دوای شەش جار بۆردوومان کردنەوەی بارەگاکانی دیموکرات، دەگوترێت چەند درۆنێکی دیکە لە قەلادزێ بینراون و لە رێگەدان بەرەو کۆیە.
سامان بەرزنجی وەزیری تەندروستی، پێش بۆردوومانەکانی دوای نیوەڕۆ، بە رووداوی گوت، تاوەکو ئێستا 3 شەهید لە نەخۆشخانەکان تۆمارکراوە لەگەڵ نزیکەی 16 بریندار. [٦]
ئێران باره‌گای حزبه‌كانی رۆژهه‌ڵات له‌سلێمانی و هه‌ولێر بۆردومان ده‌كات
چه‌ند خوله‌كێك به‌ر له‌ئێستا تۆپخانه‌و درۆنه‌كانی ئێران له سێ شوێنی جیاوازی هه‌رێم ده‌ستیان به بۆردومان كرد.
به‌پێی زانیارییه‌كانی هاوڵاتی، له ئێستادا به‌درۆن ئێران بۆردومانی ناوچه‌ی زڕگوێزه‌ڵه‌و كانی شاسوار له‌خوارووی پارێزگای سلێمانی ده‌كات.
هه‌ر به‌یانی ئه‌مڕۆ له كۆیه‌ش ، بۆردومانی حزبی دیموكرات و كۆمه‌ڵه كراوه‌و چه‌ند موشه‌كێك ئاڕاسته‌ی باره‌گای حزبه‌كه‌یان كراوه.
له لایه‌كی دیكه‌شه‌وه له ده‌ڤه‌ری برادۆست، به چڕی بۆردومانی بناری به‌ربزین ده‌كرێت.
هاوڵاتی بۆ زیانه گیانییه‌كانی ئه‌و بۆردومانه‌ی زرگوێزه‌ڵه په‌یوه‌ندی كرد به هێزه ئه‌منییه‌كانی سلێمانییه‌وه، له‌گه‌ڵ ئه‌وه‌ی بۆردومانه‌كه‌یان پێشتڕاستكرده‌وه، به‌ڵام رایانگه‌یاند، تائێستا زیانه گیانییه‌كان نه‌زانراوه.[٧]
سوپای پاسداران به‌رپرسیارێتی خۆی له هێرشی سه‌ر باره‌گای حزبه‌كانی رۆژهه‌ڵات راگه‌یاند
كۆماری ئیسلامی ئێران به‌رپرسیارێتی خۆی له هێرشی سه‌ر باره‌گای حزبه‌كانی رۆژهه‌ڵاتی راگه‌یاند و ده‌ڵێت، سوپای پاسداران هێرشه‌كانی له رێگه‌ی موشه‌ك و فڕۆكه‌ی بێفڕۆكه‌وانه‌وه ئه‌نجامداوه.
به‌پێی ئاژانسی ته‌سنیمی ئێرانی، "سوپای پاسدارانی ئێران ئۆپەراسیۆنێکی نوێی بۆ سەر شوێنەکانی گروپە تیرۆریستییەکان لە ناوچەی کوردستانی عێراق دەستپێکردوە، لەم ئۆپەراسیۆنەدا تۆپخانەکان و فڕۆکە بێفڕۆکەوانەکانی هێزەکانی زەمینی سوپای پاسداران، بە چەکی زیرەک و ورد، ناوەندەکانی گردبونەوە و مەشق و ئۆپەراسیۆنی گروپەکانی جێگیر لە ناوچەی کوردستانی عێراقیان کردوەته ئامانج".
هاوكات ئاژانسی ته‌سنیم بڵاویكرده‌وه، له بۆردومانه‌كانی سوپای پاسداراندا باره‌گاكانی کۆمەڵە، دیموکرات و پارتی ئازادیی کوردستان (پاک) بە موشەک و فڕۆكه‌ی بێفڕۆكه‌وانی خۆكوژ كراونه‌ته ئامانج.
لە 24ی ئەیلولەوە زنجیرەیەک هێرشی موشه‌كی و ئاسمانی بۆ سه‌ر باره‌گای حزبه‌كانی رۆژهه‌ڵاتی كوردستان له خاكی هه‌رێمی كوردستان ده‌ستیپێكردوه، كه ئێران تۆمه‌تباریان ده‌كات به‌وه‌ی له پشت ناڕه‌زاییه‌كانی ئێرانه‌وه‌ن.
له دوای گیان له‌ده‌ستدانی ژینا ئه‌مینی له رۆژی 16ی ئه‌م مانگه‌دا خۆپیشاندان و ناڕه‌زایی له شاره‌كانی رۆژهه‌ڵاتی كوردستان و چه‌ند شارێكی دیكه ده‌ستیپێكرد، به‌هۆیه‌وه پێكدادان دروستبون و تا ئێستاش ده‌یان كه‌س كوژراون و سه‌دانی دیكه‌ش برینداربون.[٨]
- ↑ سەرچاوە:https://www.gksat.tv/details.aspx?jimare=138694
- ↑ سەرچاوە:https://www.rudaw.net/sorani/kurdistan/2809202232
- ↑ سەرچاوە:www.kurdistan24.net
- ↑ سەرچاوە:https://www.awene.com/detail?article=76025
- ↑ سەرچاوە:https://www.rudaw.net/sorani/kurdistan/280920227
- ↑ سەرچاوە:https://www.rudaw.net/sorani/kurdistan/2809202214
- ↑ سەرچاوە:https://hawlati.co/page_detail?smart-id=25482
- ↑ سەرچاوە:https://www.xendan.org/detailnews.aspx?jimare=156065&babet=1&relat=1024