مەریوان سەفائەدین

گۆرانیبێژ مەریوان سەفائەدین لە 01-07-1973 لە شاری هەڵەبجە لە باشووری کوردستان لەدایکبووە. ئەگەرچی لە بەڵگەنامەکان نووسراوە لەدایکبووی 1972 بەڵام ساڵی لەدایکبوونی ڕاستەکەی 1973یە. دواتر هەتا ساڵی 1988 و کاتی کیمیابارانەکەی هەڵەبجە لەوێ ژیاوە؛ بە گوتەی خۆی، برینداری کیمیابارانەکەشە، و بەهۆی کیمیابارانەکەوە هەڵەبجەی بەرەو سلێمانی بەجێ هێشتووە. هەر بەهۆی کیمیابارانەکەوە نەیتوانیوە خوێندن تەواو بکات. لە ساڵی 1996 کوردستانی بەرەو ئەورووپا بەجێ هێشت بە جۆرێک 2 ساڵ لە ئەڵمانیا و 10 ساڵ لە ئایسلەندا ژیاوە. پاشان چووەتە سوێد و زیاتر لە 10 ساڵە لەوێ دەژیت.

پیشە

مەریوان لە ساڵی 1993 لەڕێگەی بەهجەت یەحیاوە دەستی بە کاری هونەری کردووە و هەر لەو ساڵە یەکەم گۆرانیی خۆی بەناوی (هەی باوە باوە) لە بەرنامەی کەشکۆڵ لە کەناڵی گەلی کوردستان بڵاو کردووەتەوە. تا 1996 شەش بەرهەمی بەشێوەی تاک تۆمار کردووە. هەروەها مەریوان یەکێک بووە لە ئەندامانی تیپی مۆسیقای فۆلکلۆری کورد، کە چەندین کۆنسێرتی لەگەڵ تیپەکە لە هەر دوو شاری هەولێر و سلێمانی کردووە. مەریوان تەنیا دوو ئەلبوومی بە ناوەکانی (دیە) لە 2002 و (جێژوان) لە 2006 بڵاو کردووەتەوە. ئەمە جگە لەوەی کە چەندین گۆرانیشی بە شێوەی تاک بڵاو کردووەتەوە. لە چەندین ئاهەنگ و بۆنە لە دەرەوەی کوردستان کۆنسێرتی کردووە. مەریوان دوو-سێ گۆرانیی هەورامیشی گوتووەتەوە کە شیعرەکان هی مەولەوی بوون. لە ساڵی 2014 و بەرە بەری شەڕی پێشمەرگە و داعش مەقامێکی بۆ پێشمەرگە و کوردستان گوت و بڵاو کردەوە، و لە 2017 گۆرانییەکی بە زاری کەلهوڕی بەناوی (بەو بەو) بڵاو کردەوە. لە 2020 لەگەڵ کەمال محەمەد ڤیدیۆ کلیپێکیان بەناوی (ئافەرین) بڵاو کردەوە.

ئەلبوومەکان:

1- ئەلبوومی (دیە)، ساڵی 2002، کە لەم گۆرانییانە پێک هاتووە:

• هەر ئەڕۆم، هۆنراوەی: ئەحمەد محەمەد، ئاوازی لوڕی.

• سەوزە.

• نازیلێ.

• نەم ئەزانی.

• گەڵا گەڵا، هۆنراوەی: ئیسماعیل خورماڵی.

• چاوانی تۆ، هۆنراوەی: ئیبراهیم هەورامی.

• دیە، هۆنراوەی: نەوژین عومەر.

2- ئەلبوومی (جێژوان)، ساڵی ٢٠٠٦. کە لەم گۆرانیانە پێک هاتووە:

• جێژوان، هۆنراوەی: ئەحمەد محەمەد.

• شیرینە و شیرین.

• ئای لە من، هۆنراوەی: بەختیار ساڵح.

• یارانی هاودەم، هۆنراوەی: خەییام.

• سەرمای عەشق.

• هۆ گوڵێ.

• ئەوا ئەڕۆم.

• هەی داد هەی دڵەی هاوار.

• ئەمان لەیل.

تاکە گۆرانییەکان:

• ئامۆزا گیان (کۆنسێرت).

• باوان.

• بۆ کوردستان (مەقام، ٢٠١٤).

• چەشنی دەریا (کۆنسێرت).

کلیپەکان:

• هەی باوە باوە، ساڵی ١٩٩٣، یەکەم گۆرانی.

• دیە، هۆنراوەی: نەوژین عومەر، ساڵی ١٩٩٤.

• کەلیان، هۆنراوەی: مەولەوی، ساڵی ١٩٩٤.

• یارانی هاودەم، هۆنراوەی: خەییام، ساڵی ١٩٩٤.

• ئای لە من، هۆنراوەی: بەختیار ساڵح.

• لە کۆڵانی تەنگ، هۆنراوەی: فۆلکلۆر.

• گوڵەکەم، هۆنراوەی: ڕێبوار ئالانی، ساڵی ٢٠١٣.

• پەشیمانی، هۆنراوەی: گەشبیر ئەحمەد، ساڵی ٢٠١٥.

• هەناسە، هۆنراوەی: ڕێبوار ئالانی، ساڵی ٢٠١٦.

• بەو بەو، ساڵی ٢٠١٧.

• گەڵا، هۆنراوەی: ئیسماعیل خورماڵی، ٢٠١٨.

• کانیی عاشقان، هۆنراوەی: مەریوان سەفادین، ساڵی٢٠١٨.

• بۆم دەمردی، هۆنراوەی: هێمن هەژار، ساڵی: ٢٠١٩.

• ئافەرین، هۆنراوەی: هێمن هەژار، ساڵی ٢٠٢٠.

• شەو، هۆنراوەی: ئیبراهیم هەورامی، ساڵی ٢٠٢١.

• گەر بێیتەوە، هۆنراوەی: مازیار فایەق و سەروەت تۆفیق، ساڵی ٢٠٢١.

ئاوازدانان: مەریوان لە ساڵی ٢٠١٩ ئاوازێکی بۆ گۆرانییەکی گۆرانیبێژ یەریڤان هەڵەبجەیی داناوە بەناوی (یاران).

ئامادەکردنی: دلێر ڕەفیق