ئەحمەد ڕەزا
ئەحمەد ڕەزا ناوی تەواوی ئەحمەد ڕەزا قادرە.
لە 08-05-1963 لەدایکبووە، لە قوتابخانەی چوارباخی کوڕان لە سلێمانی، سەرەتایی تەواو کردووەو لە ناوەندی سیروان، ناوەندی.. دەرچووی کۆلیژی یاسایە.
لە سەرەتاکانی تەمەنی 1978 لە 15 ساڵییەوە، لەسەر دەستی شاعیری گەورە حمە ساڵح دیلان و محمد عەزیزی مەلا ڕەحیم شیعری نوسیووە..
لە سەرەتای هەشتاکانەوە لە ناوەندی ڕۆشنبیریدا وەک شاعیر ناسراوەو لە چەندین کۆڕی ئەدەبیی و گۆڤارو ڕۆژنامەدا بەشداری کردووەو شیعری بڵاوکردووەتەوە..
هەر لەو ساڵانەدا لە نوسینگەی خۆشنووسیی محەمەد نەسرەدین و دواتر خۆشنووس بووەو لەسەر دەستی هونەرمەندی شێوەکار خالید ڕەسوڵ، ئاشنای زۆرینەی کەسایەتییە ئەدەبی و هونەرییەکان بووەو پەیوەندی پتەوی لەگەڵیاندا هەبووە..
لە ساڵی 1987 لەگەڵ شەهیدی هونەرمەند ئەریوان عومەر دەوڵەت، پێکەوە شانۆیی شیعریی " ئۆڤیلیای سپیی"ان نوسیوە.
یەکەمین بەرهەمی شیعریی دوای ڕاپەڕین بە ناونیشانی " سۆراخ" چاپکردووە..
دامەزرێنەری یانەی قەڵەم بووە لە سلێمانی، بەشداری کارای سەندیکای نوسەرانی کورد هەبووە..
لە دواهەمین کۆنگرەی یەکێتی نوسەرانی کوردەوە، ئەندامی دەستەی بەڕێوەبردنی لقی سلێمانی بووە لە ساڵی 2010 ەوە، تا لە شوباتی 2016 دەستی لە ئەندامێتیی کێشاوەتەوە..
ئەندامی بنکەی ئەدەبی و ڕوناکبیریی گەلاوێژ بووە، ساڵی 1992 تا 1994 بەرنامەی ئاسۆی ڕۆشنبیریی لە کەناڵی گەلی کوردستان ئامادەو پێشکەش کردووە بە هاوکاریی جەمال غەمبارو کەژاڵ ئەحمەدو د. ئاراس عەبدولکەریم و محەمەد مەردان..
دواتریش ئامادەکاری بەرنامەی ئاوێزە بووە لە هەمان کەناڵ.
لە هەڵەبجەو سلێمانی و ڕانیەو حاجیاواو چەمچەماڵ و تەکیەو کەرکووک و هەولێر ساڵانی 2015- 2016 زنجیرەیەک کۆڕی دەربارەی بیری ئەنارکیزم بەستووە..
چەندین وتارو لێکۆڵینەوەی بە هەردوو زمانی کوردی و عەرەبی لە عێراق و نیشتیمانی عەرەب بڵاوکردووەتەوەو سەرۆکایەتی شاندێکی هونەری شێوەکاریی کردووە لە ئوردون 2009..
ئامادەکارو ڕێکخەری ئەلبومی " سۆزەی گەرمیان" ی هونەرمەندی کۆچکردوو سەڵاح داودە 2010 لەگەڵ تیپی موزیکی لوڕ..
بەڕێوەبەری شێوەکاری و ڕاگەیاندنی سلێمانیی بووە لە ساڵانی 2008 تا 2012.. لە ئێستادا فەرمانبەرە لە سەرۆکایەتی دادگای گومرگی سلێمانیی.
بەرهەمە چاپکراوەکانی:
- سۆراخ: کۆمەڵە شیعر 1991
- داستانی مەسیح: باڵادەی شیعریی 1992
- ئۆڤیلیای سپیی، بە هاوکاریی لەگەڵ شەهیدی هونەرمەند: ئەریوانی عومەر دەوڵەت 1994
- پەندی ئاوێنە: چیرۆکی درێژ بۆ مناڵان 2007
- هونەری شیعر نوسین، ب/1: لێکۆڵینەوەی ئەدەبیی 2008
- پۆل ڕیکۆر: ژیاننامەو وەرگێڕانی چەند وتارێکی فەیلەسوفی فەرەنسی پۆل ڕیکۆر 2008
- لە دەروونشیکارییەوە بۆ لێکدانەوە: کۆمەڵێک لێکۆڵینەوەی ئەدەبیی 2008
- من نیگام لەبەر ئەڕوا: کۆمەڵە شیعر 2019
- سایکۆلۆژیای تاک: کۆمەڵێک وتاری دەروونناسیی(( ئامادەیە بۆ چاپ)) 2022
دراما پێشکەش کراوەکان:
- ئاریا: دەرهێنانی هادی مەهدی 2007
- شەڕەنگێز: دەرهێنانی موفق عارف لهۆنی 2019
- بەختەباران: دەرهێنانی نیاز لەتیف 2020- 2021
دراما ئامادەکان:
- شمشێرەکانی مێژوو: مێژوویی.
- سروتی با: 100 ئەڵقە کۆمەڵایەتی/ پۆلیسیی.
- ڕێگەی ئاوریشم: پۆلیسیی.
- ڕەشەمێرگ: کۆمەڵایەتیی- کۆمیدیی/ سایکۆلۆژیی.
- ئاوژەن: کۆمەڵایەتی.
بیرۆکەی دراما:
- مەملەکەتی نەزاکەتشا: مێژوویی/ سەربازیی.
- سەمای ژێر چادرەکەی هەیبەت: کۆمەڵایەتی.
تۆماری تایبەت بۆ مانو بەرزنجی سەبارە بە ژیان و کارنامەی ئەحمەد رەزا