هاورێ ئارام و کۆمەڵێک پێشمەرگە
ڕیزی سەرەوە لە چەپەوە: دووهەم نەبەز (خولەی جگەر)، سێهەم سەڵاح چاوشین، تەنیشت سەڵاح چاوشین جەمالە ڕەشە کە دواتر لە سێدارە درا.
ڕیزی ناوڕاست لە چەپەوە یەکەم: شێخ تەیب کە لەکاتی بڵاوکردنەوەدا شێخ تەیبیان پەراندوە! تەنیش شێخ تەیب هاورێ ئارام، سێیەم تەها باراوی، چوارەم مولازم عومەر، پێنجەم حەمە سەعید.
دانیشتوەکان لە چەپەوە: یەکەم مامۆستا شێرکۆ، دووهەم خەباتی حاجی مارف.
وێنەکە لەلایەن (کاوە حەمەغەریبی حاجی ساڵح) گیراوە.
ئەم وێنەیە بەدروستی لە مانگی یەکی 1977 لە گوندی (گەورەدێ) لە شارباژێر بەکامێرای پێشمەرگەی دێرین ( خەبات مارف) خەباتی حاجی مارف گیراوە و چیرۆکێکی درێژ لە پاراستن و شتنەوە و گەیشتنی بە دەرەوەی ووڵات هەیە.
زستانی ساڵی 1977 گەورەدێی زۆر سارد بووە بەرفرێکی زۆر باریبوو ڕژێمی بەعس دەستی نەدەگیشت بە پێشمەرگەکان. ئەو پۆلە پێشمەرگەیەش لە گوندەکە پشوویان دابوو.
لە ماوەی ئەو سێ مانگەدا لە گوندی گەورەدێ خەبات مارف هەڵدەستێت بەکردنەوە قوتابخانەیەک تا منداڵەکان فێری خوێندەواری بکات، خەڵکی گوندەکەش ئەو خانووەیان بۆ چاکردبوون. وێنەکەش لەبەردەمی قوتابخانەکەی خەبات مارفدا گیراوە.
بەڕێز خەبات مارف دەڵێت: لە ناو کۆمەڵێ فیلمی ئەو سەردەمە، هەر ئەمەیان دەرچوو، کەچەند وێنەیەک دەرچوون. چونکە ئەو سەردەمە سەردەمی کامێرای ئەنەڵۆگ بوو فیلمی کامێراکان لوولەیی بوون، 24 وێنەیی یان 36 وێنەیی هەبوون.
لە دوایی چرکاندی وێنەکان دەبوو بەپرۆسەی شتنەوەدا تێپەڕێت.
ئەوەش لە تاقیگاو لەلای وێنەگرەکان دەکرا و کاکی وێنەگر لە تاقیگاکەی خۆی فیلمەکە دەبردە ژوورێکی تاریک و دوای کردنەوە لوولەی فیلمەکان کە پیان دەوت (جام) جامەکەی دەخستە شلەیەکی تایبەت و هەڵیدەکێشا لەو شلە تایبەتە، دواتر پرۆسەی وشکردنەوە و چاپکردنی لەسەر کاخەزی تایبەت و دەبوو بە وێنە.
فیلمە لوولەیەکانی کامیرای ئەو سەردەمە ئەگەر لە کاتی خۆیدا پرۆسەی شتن و شۆردنەوەی بۆ نەکردایە دەسووتا.
واتا جام یان نەگەتیڤی فیلمە لوولەیەکە بە ڕەشی دەهاتە دەرێ بەبێ ئەوەی هیچ وێنەیەکی لەسەر تۆمار کرابێت، وێنەکان ڕەش دەبوون بۆیە پێان دەگووت فیلمەکە سووتاوە.
لەم سەردەمەشدا وەک ئیدیۆم: دەڵین فیلمی سووتاوە!!!
سەرچاوە: خەبات مارف
تێبینی: لە درێژەی زانیارێکانی کاک خەبات مارف سەبارەت بە وێنەکە بەمشێوەیە بۆ مانو بەرزنجی دوا:
هاورێ حامید یاخسەمەری کە لە دوایدا لە سێدارە درا، فیلمەکەی گەیاندبووە سلێمانی گەیشتبووە دەستی مامم غەفوری حاجی مارف و پاشان دایکم دەیگەێنێتە بەغدا، دواجار خاڵم سامان خەفاف کە ئەو کات لە پەیمانگای هونەرە جوانەکان وەک خوێندکارێک رێگەیەک ئەدۆزێتەوە و فیلمەکە ئەشواتەوە و دوایی پاش چەند ساڵێک دایکم زۆر ئازایانە ئەم فیلمە کە نەسوتابوو، گەیاندە ڤێننا.
ئیتر لە ڤێننا شۆردمەوە و رزاگاری بوو. ئەمە بۆیە باس دەکەم، بۆ ئەوەی بزانرێت، کارکردن لەو سەردەمەدا چۆن بووە!! و بەچاوو ئەقڵی ئەمڕۆ سەیری ئەو رۆژانە نەکرێت.
کامێرا ئەرکی زۆر بوو، وێنەگرتن زۆر گران دەکەوتەوە. پاش چرکاندن چەند رۆژێک چاوەرێت دەکرد، تا وێنەکان لای فۆتۆشۆپ وەرگریتەوە و وێنەکان ببینی و خۆت و بەختی خۆت، بەتایبەتی یەکێ کە شارەزا نەبووبێت. پرۆسەی گەیاندنکەش جوانی کارکردن و هەرەوەزی ئەو سەردەمە دەردەخات، کە لەو رۆژە سەخەتەدا، رۆژانە ملی دەیا گەنج دەکرا بە پەتا و دەخنکێنران، پرۆسەی تێکۆشان و خەبات بەردەوام بوو.
ئازایەتی کاک ئارام (هاورێ ئارام)لەگەڵ هاورێکانی لەوە دابوو، کە جورئەتی ئەو هەنگاوەیان هەبوو.
چێکڤاراش لەگەڵ هاورێکانی نەیانبردەوە، بەڵام براوە بە ئازادی بوو، هەر بۆ ئەوەش چووە شاخەکان و لەو پێناوەشدا هەردووکیان هەم کاک هاورێ ئارام و هەم چێکڤارا گیانیان بەخشی.
تەنانەت هەڵگرتنی کامێراکە لە هەڵگەران بە شاخەکاندا ئەرکێکی قورس بوو!.