داڕێژە:هه‌ڵبژارده‌ی دووه‌م
کارگەکانی تابووت پاژی دووەم بەشی 01
"پاژی دووەم"
'بەشی یەکەم'
نووسینی: شێرزاد حەسەن
كە لانکەکان دەبن بە تابووت
هەر كەسێك كە لە دایك دەبێت، لە هەر شوێنێكی ئەم دونیایەدا بێت، سەر بە هەر چین و توێژێك بێت، لە یەكەم رۆژەوە دەكەوێتە ناو بۆكسێك/ سندووقێك كە خوازە و مێتافۆرێكە بۆ ئەو ژینگەیەی مرۆڤ تێیدا پەروەردە دەبێت، هەر لە منداڵییەوە تا دوا ساتەوەختی تەمەنی.
لە ناو ئەو بۆكسەدا كە ئەگەر پۆڵایین بێت یان تەختەبەند، سەرەتا پێ بە پێ مرۆڤ هەوڵدەدات خۆی لە ناو یان لەگەڵ ئەو سندووقەدا بگونجێنێت، یان ئەوانیدیكە كە دەكرێت دایك و باوک و ژنان و پیاوانی بنەماڵە بن، بە زۆردارەكی هەموو ئەو بیر و باوەڕ و بۆچوونانەی كە خۆیان بڕوایان پێیەتی دەنێو رۆح و مێشكی منداڵەكاندا دەیانچێنن، یان كە فەراقە و هەراشتر دەبێت و دەچێتە قوتابخانە، یان ببێت بە میوانی بەردەوامی مزگەوت: مامۆستا و مەلا پێكەوە بەم چەشنە گۆشی دەكەن كە خۆیان پێیان جوان و پاك و راستە كە مەرج نییە ڕەوا و جوان و ڕەوشتمەندانە بێت، منداڵەكەش، چ كچ بێت و چ كوڕ، هەر ئەوەندە توانا ئاشكرا و شاراوەكانی عەقڵی بڕ دەكات.
هەموو هەڵگەڕانەوە و نەخێر و ملنەدانێكی خۆرسكییە، كەم و زۆری هەموو ئەو شتانەی لە تەمەنی ساواییدا نیگەرانی دەكەن وەك پێویستییە بایۆلۆژییەكان، بۆ گوزارشتكردن لە نارەزایەتی یان داوا و خواستەكانی خۆی، پەنا دەباتە بەر هاوار و گریان و وڕكگرتن و مۆنبوون لەتەك دەیەها لەو نیشانانەی كە دەبن بە بەڵگەی رەتكردنەوە و قایلنەبوون بەو دۆخەی تێیكەوتووە، دیارە لێرەدا زۆر خۆرسكانە و منداڵانە دەردەكەوێت، لە چاوی مندا هەمیشە قوومات لەسەر وەختی مەلۆتكەییدا لە تەك لانك و بێشكەدا یەكەمین شوێنە بۆ بەستنەوەی منداڵ كە زێدە كوشندەیە و بێبەشی دەكات لەو جووڵە خۆرسك و ئازادانەی كە لەش پێویستی پێیەتی، لە تەك شەتەكدانی بە دەسترازەش كە دەبنە كەرەستەیەك بۆ پەلبەستكردنی وەك كۆت و بەند، هەر هەمووشی ئامرازێكن بۆ سنوورداركردنی جووڵەكان، دیارە بە بیانووی خەوتنی خۆش و بە دووربوون لە خۆ ئازاردان و ترسی كەوتنە خوارەوە بووە.