سۆران حوسێنی
سۆران حوسێنی كوڕی خوالێخۆشبوو حاجی مامۆستا شێخ عیززەددین حوسێنی لە شەوی هەینی هەشتی مانگی سەرماوەزی ساڵی 1347 کۆچی خۆری بەرامبەر بە هەشتی مانگی ڕەمەزانی 1388ی کۆچی مانگی لە گوندی چیچۆران لە پێنج كیلۆمیتری ڕۆژهەڵاتی شاری بانە لەدایك بووە.
دیبلۆمی لە ئەدەبیات و زانستی مرۆیی و دواتریش لیسانسی لە مێژوو وەرگرتووە.
لەساڵی 1368 بەدواوە بە شێوەیەكی جیددی هەڵوەدای شێعر بووە و ساڵی 1370 بۆتە ئەندامی ئەنجومەنی شێعر وئەدەبی بانە.
پێش ساڵی حەفتا نامیلكەیێكی شێعری لە تیراژێكی كەم دا بڵاوبۆتەوە، دوای ساڵی حەفتاش لە بڵاو كردنەوەی كۆمەڵە شێعری "تا ئاربەبای خۆشەویستی " لە گەڵ ئەندامانی ئەنجومەنی ئەدەبی بانە هاوبەش بووە.
یەكەم كتێبی سەربەخۆی سۆران بەشێوەی پەرمی، كۆمەڵە شیعری " هەساو" ە كە لە ساڵی 84 دا كەوتە بەردەستی خوێنەران.
شێعری ئەو لە چەندین گۆڤار و ڕۆژنامە و نامیلكە و تایبەتنامەدا چاپ و بڵاو بوونەتەوە لەوانە دوو كۆمەلە شێعری "گوڵچینی شیعری شاعیرانی كورد" بەشی یەكەم لە بڵاوكردنەوەی ناوەندی بڵاوكردنەوەی فەرهەنگ و ئەدەبی كوردی ورمێ و کتێبی تا ئاربه‌بای خۆشه‌ویستیو کتێبی لە شاخەوە تا شار ئامادە کردنی فەخرەدینی ئامێدیان - سنە ساڵی 1387 و كۆمەڵە شێعری گازە لە ئامادە کردنی خانم ئامینە عەزیزی (سروور) و کتێبی بۆ دایک کۆکراوەی یووسف یووسفزادە و چیمەن باقری مەریوان ساڵی 1396و کتێبی گوڵبژێری شێعری کوردی هەنگاو ساڵی 1392 لە کۆکردنەوە و ئامادە کردنی عەزیز میرزاقادری و کتێبی فریشتەی هەرمان ساڵی 1396 هەر لە کۆکردنەوە و ئامادە کردنی عەزیز میرزاقادری و گۆڤارەكانی سروە ،مەهاباد، پەپوولە، شۆخ و شەنگ و ... .
سۆران حوسێنی كۆمەڵە چیرۆكی سێ دڵۆپ خوێنی سادق هیدایەت و شانۆنامەی وت و وێژ ی محەمەد ڕەحمانیان وشانۆی سەردەمی بێ تاوانی دوكتۆر قوتبەدین سادقی و چە‌ند شێعری لە فەرەیدوون موشیری و پەروین ئیعتیسامی و عوبەیدی زاکانی و ... كردۆتە كوردی .
هەروەها چەندین وتار و ڕەخنەی ئایینی و سیاسی و ئەدەبی بڵاو كردۆتەوە.
سۆران موجری یەكەمین فستیڤاڵی چیرۆك و بەرێوەبەری شەشەمین فستیڤاڵی چیرۆکی بانە و قایم مەقامی دەبیری ستادی دوازدەهەمین خولی فستیڤاڵی چیرۆکی بانە بووە.
ئه‌و یەكێك لە چالاكانی بواری ئەدەبی فەرهەنگی باژێری بانەیە و لە زۆربەی كۆڕە شێعرییەكانی ناوخۆ و دەرەوەی كوردستان دا بەشداری چالاكانەی هەبووە و به‌ڕێوه‌به‌ری ده‌یان کۆڕێ شێعری و چیرۆک و کۆبوونه‌وه‌ی ڕۆشنبیری و هاوچه‌رخیانه بووه و کۆمه‌ڵه چیڕۆکی ڕازه که هه‌ڵبژارده‌ی پێنج فستیڤاڵی چیڕۆک بووه و هه‌روها دوو کۆمه‌ڵه شێعری نه‌ورۆزانه به‌رهه‌می به‌شداربووانی کۆڕی نه‌ورۆزی 1390 و خەرمانە بەرهەمی بەشداربوانی کۆڕی هاوینی 1391 له بانه به تێکۆشانی ئه‌و له چاپ دراون.
لە ساڵی حەفتاوە لە دەستەی بەڕێوەبەرایەتی ئەنجومەنی شێعر و ئەدەبی بانەیە و نزیك بە دوازده ساڵ بەرپرسی ئەنجومەن بووە.
سۆران یەکێک لە ئەندامانی دامەزرێنەری بنکەی ئەدەبی، فەرهەنگی بەڕۆژەی بانە و سێ دەورەی دوو ساڵە بەرپرسی ئەو بنکەش بووە.
هەروەسا یەكێك لە ئەندامانی لیژنەیەكە كە بە شێوەی سەربەخۆ و به هاوبه‌شی قوتابخانەی سه‌ره‌تایی ئه‌ندیشه‌ی نه‌و لە بانە دوو كتێبیان بۆ فێربوونی خوێندنی كوردی (خوێندن و نووسین به کوردی بۆ پۆلی یه‌که‌می سەرەتایی) ئامادە و بە چاپ گەیاندووە و ئێستا لە بازاڕدایە.
سۆران ماوەی دوو ساڵ ئەندامی دەستەی نووسەرانی گۆڤاری مناڵانەی شۆخ و شەنگ بووە.
سۆران لە خولی یەکەمی فستیڤاڵی مناڵ و مەلووچک لە شاری ئیوانی غەربی ئیلام یەکێک لە شاعیرانی شایانی ڕێز و لە خولی دووهەمی دا هەڵبژاردەی خەڵات و تەندیسی فستیڤاڵی وەرگرتوە. هەروەها هەڵبژێراوی یەکەمین خەڵاتی ئەدەبی مەولەوی کوردی سنە و براوەی یەکەمین خەڵاتی دوکتۆر ئیبراهیمی یوونسی بۆ کتێبی شێعری مناڵان بووە.
سۆران حوسێنی وەک بەرپرسی بنکەی بەڕۆژە هەڵبژێراوی سێیەمین خولی هەموو بنکە ئەدەبییەکانی ئێران لە لایەن بونیادی ئەدەبییاتی داستانی ئێران ساڵی 1398 لە تاران بووە.
سۆران داوەری بەشی ئەدەبی مناڵان لە خەڵاتی کتێبی ساڵی پارێزگای کوردستان (سەقز 1398) بووە.
تا ئێستا بەرهەمە چاپکراوەکانی سۆران بریتین لە :
- 1 – هەساو -کۆمەڵە شێعری کلاسیک و نوێ- ساڵی 84 – جەوانبەخت - بانە
- 2- په‌ڕه‌ژاڵ- کۆمەڵە شێعری نوێ- ساڵی 1387 لە لایەن ئینتیشاراتی "تاڤگە"ی سنە.
- 3- ژینامه - مەسنەوی- ساڵی 1388 له لایه‌ن ئینتیشاراتی گوتاری سه‌قز.
- 4- تیشکاوێژی دوایه‌مین هه‌ساره - هۆنراوە - مێژووی دامەزرانی مەککە و ژیانی پێغەمبەر تا کاتی بوونی بە پێغەمبەر(بەرگی یەکەم)- ساڵی 1389- لە لایه‌ن ئینتیشاراتی گوتاری سه‌قز.
- 5- به‌خته‌وه‌ری – هۆنراوە – سالێ 1389 - لە لایه‌ن ئینتیشاراتی گوتاری سه‌قز.
- 6- فڕی فڕی ، هۆنراوە بۆ مناڵان - ساڵی 1392 - لە لایه‌ن ئینتیشاراتی گوتاری سه‌قز.
- 7- ڕه‌نگامه‌ی یاری و برووسکه‌ی زانیاری - تایبەتنامەی ڕێکخراوی ئاگرکوژێنەوەی بانە بۆ مناڵان(نیگار و شێعر) لە لایه‌ن ئینتیشاراتی گوتاری سه‌قز. (چاپی یەکەم و دووهەم بە دەستکارییەوە.)
- 8- وێره‌کانی به‌ربنار - کۆمەڵە شێعری نوێ-ساڵی 1387- لە لایه‌ن ئینتیشاراتی گوتاری سه‌قز.
- 9- شار (قەسیدە شێعری نوێ)- لە لایه‌ن ئینتیشاراتی گوتاری سه‌قز.
- 10- حەجنامە (مەسنەوی سەفەرنامەی حەج- نامیلکە شێعر)
- 11 - ڕۆمانی ڕێواڵی لە جەرگەی گەرمای نێوەڕۆدا – ئینتیشاراتی گوتار – سەقز 1400
- 12- خەڵاتی دایەپەری - وەرگێڕان - هدیەای از فرشتە مادر (داستان کودک و نوجوان)از خانم زهرا سینایی (
- 13- بە دەم 'با' وە - کۆمەڵە شێعری مناڵان(لەژێر چاپدا) .
دیوانی غەزەل و چەندین دەفتەری شێعر و چیرۆک و شانۆنامە و بابەت و بەرهەمی دیکەی سۆران چاوەڕوانی چاپ و پەخشن.
سەرچاوە: تۆمارێکی تایبەت بۆ ماڵپەری (مانومیدیا) لە لایەن بەرێز سۆرانی حوسێنی سەبارەت بەکار و چالاکێکانی.