مەحسوم کۆرکماز
مەحسوم کۆرکماز (عەگید) کێیە؟
لەساڵی 1956 لەشارۆچکەی فارقین-ی سەر بەشاری ئامەد لەدایکبووە.
ساڵی 1976 لەڕێگەی شەهید مەزڵوم دۆغانەوە ئاشنا دەبێت بە گروپی ئاپۆچییەکان و پەروەردەی ئایدۆلۆژی و سیاسیی و ڕێکخستنیی دەبینێت.
لە زستانی 1980دا دەچێتە کامپی شۆڕشگێڕانی فەڵەستینی لە لوبنان، ماوەی حەوت مانگ پەروەردە وەردەگرێت و پاشان دەگەڕێتەوە باکووری کوردستان.
ساڵی 1984 سەرپەرشتیی دەستپێکردنی خەباتی چەکداریی پەکەکە دەکات دژی سوپای تورک.
پاش خەباتی دوو ساڵ لە ناوچە جیاجیاکانی باکووری کوردستان و ڕێکخستنی دەستەکانی گەریلا و پەرەدان بە خەباتی چەکداریی و چالاکییکردن، فەرماندە عەگید لە 28ی ئازاری 1986 لە ڕوبەڕووبوونەوەیەکدا لەگەڵ ھێزەکانی سوپای تورکیا لە چیای گابار لە پارێزگای شیرناخ شەھید بوو، بەڵام ئەوە نەبووە هۆی کوژاندنەوەی مۆمی ڕووناکیی ئەم فەرماندەیە، بەڵکو لەئێستادا بووەتە فەرماندەیەکی ئەفسانەیی و سروشبەخش بۆ هەزاران شۆڕشگێڕ و تێکۆشەر.
هەفتەی قارەمانێتیی
پەکەکە هەمیشە شەهیدان وەک هەوێنی بەهێزکردنی تێکۆشان لەقەڵەم دەدات، بەجۆرێک هەر شەهیدێک لە فەرهەنگی پەکەکەدا بەواتای هەنگاوێکی دیکە دێت بۆ نزیکبوونەوە لە ئامانجەکە، بۆیە ناسنامەی “پارتی شەهیدان” بڕاوە بە باڵای پەکەکەدا.
هەفتەی قارەمانێتیی لە 21ی ئازار بە یادی شەهید مەزڵوم دۆغان دەستپێدەکات و لە 28ی ئازار بە یادی شەهیدبوونی فەرماندە عەگید کۆتایی دێت، لەو هەفتەیەدا گەلی کورد و پەکەکە یادی شەهیدان ڕێگای ئازادیی کوردستان دەکەنەوە و بەڵێنی سەرخستنی تێکۆشانەکەیان دووپات دەکەنەوە.
ساڵانە لە کوردستان و دەرەوەی وڵات لەماوەی ئەو هەفتەیەدا گەلی کورد بە ڕێکخستنی کۆڕ و سیمینار و چالاکیی جۆراوجۆر و یادی شەهیدانی کوردستان و هەردوو شەهیدی پێشەنگ مەحسوم کۆرکماز (عەگید) و مەزڵوم دۆغان دەکەنەوە.
گەریلاکانی ئازادیی کوردستانیش لەماوەی ئەو هەفتەیەدا بە چالاکیی سەربازیی دژی سوپای تورک، دەنگی فیشەکەکەی فەرماندە عەگید بە زیندوویی دەهێڵنەوە و بەڵێنی درێژەدان بە ڕێبازی شەهیدان دووپات دەکەنەوە.